حالىقارالىق «ەكسپو» كورمەسىن دۇركىرەتىپ ابىرويمەن وتكىزگەن ەلوردادا جاز بويى ۇلتتىق ويىندارىمىز سالتانات قۇردى. كەشە ءداستۇرلى «التىن تۇعىر» سىيلىعىمەن ماراپاتتاۋ راسىمىندە استانانىڭ اتى ەرەكشە اتالىپ, ۇلتتىق سپورتتى ۇلىقتاۋعا بارىنشا قولداۋ كورسەتكەن قالا اكىمدىگىنە ارنايى العىس حات تابىستالدى.
استانادا بيىل ۇلتتىق سپورت تۇرلەرىنەن دۇركىن-دۇركىن جارىس ءوتىپ, حالىقارالىق شارانىڭ كورىگى قىزدى. «قازانات» اتشابارىنا قازاق اۋىلى قونىپ, ءار وڭىردەن, ءار ەلدەن كىل دۇلدۇلدەر كەلىپ, باق سىنادى. سولاردىڭ ىشىنەن ەڭ اۋقىمدىلارىن اتاپ ايتساق, جامبى اتۋدان العاش رەت «التىن جەبە» حالىقارالىق ءتۋرنيرى, «ەكسپو كۋبوگى» بايگەسى, الامان بايگە, كوكپار ۇيىمداستىرىلدى. سونداي-اق, ەلىمىزدىڭ جانە الەمنىڭ ءاپايتوس بالۋاندارىن بەلدەستىرگەن قازاق كۇرەسىنەن «قازاقستان بارىسى», «الەم بارىسى» جانە الەم چەمپيوناتى ءوتتى.
«التىن تۇعىر» سىيلىعى وسىنداي ۇلتتىق سايىستىردا جۇلدىزى جانعان ۇزدىكتەرگە تابىستالادى. ماراپاتتاۋ راسىمىندە ۇلتتىق سپورت تۇرلەرى قاۋىمداستىعىنىڭ قۇرمەتتى پرەزيدەنتى قايرات ساتىبالدى ارنايى ءسوز سويلەپ, «ەلىمجان» توسبەلگىسىن مادەنيەت جانە سپورت ءمينيسترى ارىستانبەك مۇحامەديۇلى مەن اتىراۋ وبلىسىنىڭ اكىمى نۇرلان نوعاەۆقا تاقتى. وعان قوسا, ۇلتتىق سپورتتى ۇلىقتاۋعا ەرەكشە اتسالىسقان وڭىرلەردىڭ قاتارىندا استانا قالاسىنىڭ اكىمدىگىنە بەرىلگەن ارنايى العىس حاتتى شاھار باسشىسىنىڭ ورىنباسارى ەرمەك امانشاەۆ قابىلداپ الدى.
ال جەكەلەگەن اتالىمدار بويىنشا «ۇزدىك جامبى اتۋشى» – ايتبەك سارىباي, «ۇزدىك اۋدارىسپاق ويىنشىسى» – نارماعامبەت يمانعازىۇلى, «ۇزدىك بالۋان» – ەلامان ەرعاليەۆ, «ۇزدىك تەڭگە ءىلۋشى» – ماعجان ساپاربەكوۆ, «ۇزدىك بۇركىتشى» – تاتتىمبەت كاپۇلى, «ۇزدىك توعىزقۇمالاق ويىنشىسى» حاكىم ەلەۋسەنوۆ اتاندى.
ورىنبەك وتەمۇرات
