ۇرپاققا – ونەگە
استانا قالالىق تىلدەردى دامىتۋ باسقارماسى جەڭىس مەرەكەسىنە وراي «تۇران» مەيرامحاناسىندا ەلوردالىق مايدانگەرلەر مەن سوعىس جىلدارىندا تىلدا ەڭبەك ەتكەن ارداگەرلەرگە داستارقان جايىپ, «اتالار ەرلىگى – ۇرپاققا امانات» اتتى يگىلىكتى شارا وتكىزدى.
ىزگىلىكتى شارادا الدىمەن سوعىستان ورالماعان بوزداقتار مەن بۇگىندە ارامىزدا جوق ارداگەرلەردىڭ رۋحىنا ارناپ, دۇعا باعىشتالدى. ودان كەيىن ءتىل باسقارماسىنىڭ باستىعى ءتىلەۋعالي قىشقاشباەۆ ءوتىپ وتىرعان شارانىڭ ماڭىزىنا توقتالىپ, ارداگەرلەرگە ءىلتيپاتتى لەبىزىن ءبىلدىردى. رەسپۋبليكالىق ارداگەرلەر كەڭەسىنىڭ توراعاسى ومىرزاق وزعانباەۆ سول سوعىس بۇلتى تونگەن جىلدارداعى قازاقستاندىقتاردىڭ ەرەن ەرلىگى مەن جانقيارلىق ەڭبەگى جايىندا تەرەڭىرەك ءسوز قوزعادى.
– ءبىز ول كۇندەردى ەشقاشان ۇمىتپايمىز. سوعىسقا ەلىمىزدەن ميلليوننان استام ادام اتتاندى. سولاردىڭ 700 مىڭى ەلگە ورالدى. بەيبىت كۇندە تۋعان جەردىڭ دامۋىنا ەرەكشە ۇلەس قوستى. بۇگىندە ارداگەرلەردىڭ تەڭ جارتىسى توسەككە تاڭىلىپ, ۇيدە جاتىر. سوندىقتان ارامىزدا جۇرگەن مايدانگەرلەردى ايالايىق. ءبىر عانا وسى استانا تابانىنان 47 كەڭەس وداعىنىڭ باتىرى, 7 داڭق وردەنىنىڭ تولىق يەگەرى اتانعان ازاماتتار شىقتى, – دەدى ارداگەرلەر كەڭەسىنىڭ توراعاسى.
سونداي-اق, ەلورداداعى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ارتىستەرى قوناقتارعا سوعىس كەزىندە جازىلعان اقىنداردىڭ ولەڭدەرىن وقىپ, مايدان ءاندەرىن شىرقادى. باۋىرجان مومىشۇلىنىڭ انا ءتىلىمىز تۋرالى ايتقان تولعامدارى ايتىلدى. سوعىس ارداگەرى ءمىنايدار بورانباەۆ جاستارعا باتاسىن بەردى. تۇجىرىپ ايتقاندا, ادەمى كەشتەن قاريالاردىڭ كوڭىلى ءبىر كوتەرىلىپ قايتتى.
ازامات ەسەنجول