سانكت-پەتەربۋرگ قالاسىنا جەڭىس مەرەكەسى قارساڭىندا جولىمىز ءتۇستى. ءۇش ءجۇز جىلدىق تاريحى بار, قازىعىن پەتر پاتشا قاداعان قالانىڭ اريستوكراتيالىق سىمباتى القىزىل تۋدىڭ كولەڭكەسىندە قالىپ, مايدانگەرلەر رۋحى اسپانداپ تۇرعانداي. سولاي بولۋى كەرەك تە شىعار. ۇلى وتان سوعىسىنىڭ ەڭ قاندى بەتتەرىنىڭ ءبىرى وسى قالادا جازىلدى.
قازاقتىڭ قوس قارلىعاشى ءاليا مەن مانشۇكتىڭ جانە مىڭداعان قازاقستاندىقتاردىڭ ماڭگى ولمەس ەرلىگى وسى جەردە جازىلىپ, بوزداقتاردىڭ قاسىقتاي قانى وسى توپىراققا توگىلدى. ال جاۋ قورشاۋىندا قالعان لەنينگرادتىقتاردى جەبەگەن جامبىلدىڭ:
«لەنيگرادتىق ورەنىم,
ماقتانىشىم سەن ەدىڭ!
نەۆا وزەنىن سۇيكىمدى,
بۇلاعىمداي كورەمىن…» دەگەن جىرىنىڭ جازىلعانىنا جەتپىس جىلدان اسسا دا ءالى دە ەكى ەلدىڭ اراسىن جاقىنداتىپ تۇر. سول سەبەپتى دە جامبىل اتامىزعا قويىلعان ەسكەرتكىشكە تاعزىم ەتۋ جول ساپارىمىزدىڭ باستى ماقساتى دا ەدى. ارحيتەكتور فەليكس رومانوۆسكي جانە سكۋلپتور ۆالەنتين سۆەشنيكوۆ جاساعان اقىن ەسكەرتكىشى وسىدان 13 جىل بۇرىن ۇلكەن جولدان باستاۋ الاتىن ورامدا قويىلىپتى, كوشەنى جامبىل اتىمەن اتاپتى. سانكت-پەتەربۋرگ جانە لەنينگراد وبلىسىنداعى قازاقتاردىڭ باسىن قوساتىن «اتا-مەكەن» قوعامىنىڭ توراعاسى ءسارسەنعالي قۇسپانوۆتى وسى جەردە كەزدەستىردىك. قازاق قوعامىنىڭ بەلسەندىلەرى ءداستۇر بويىنشا اقىن ەسكەرتكىشى مەن پيسكاريوۆ مەموريالدى قورىمىنداعى سەنبىلىككە قاتىسادى ەكەن.
لەنينگراد قورعانىسى كەزىندە قۇربان بولعانداردىڭ ءماڭگىلىك مەكەنىندە «لەنيگرادتى قورعاۋ كەزىندە قۇربان بولعان قاھارمەن قازاقستاندىق وتانداستارىمىزدىڭ ەرلىگى مەن داڭقى ماڭگى ساقتالادى» دەگەن جازۋى بار تاقتا قاعىلىپتى. ونىڭ مىندەتتى تۇردە قازاق-ورىس تىلدەرىنە جازىلۋىن قاداعالاعان سارسەنباي اعامىز ەكەن. جالپى, قازاق
قوعامىنىڭ مۇشەلەرى قازاق تاريحىنا قاتىستى ەسكەرتكىشتەردى كۇتىپ ۇستاۋدى مىندەتىنە العان. جەرگىلىكتى اكىمشىلىك ءتيىستى كولىك پەن قۇرال-جابدىقتارىن عانا بولەدى.
– ءاليا مولداعۇلوۆا وقىعان مەكتەپتە مۇراجاي بار. جىل سايىن قازاقتىڭ باتىر قىزىمەن بىرگە سوعىسقان ارداگەرلەردى قازاق ۇيىندە جيناپ, قۇرمەت كورسەتۋشى ەدىك. الايدا, جىلدان جىلعا ولاردىڭ دا قاتارى دا سيرەپ بارا جاتىر, – دەدى ءسارسەنباي قۇسپانوۆ.
جالپى, وسى ساپار بارىسىندا كەزدەسكەن ادامداردىڭ ىقىلاس-پەيىلىنە قاراپ قازاقستاندىق جاۋىنگەرلەرگە دەگەن قۇرمەتتىڭ ايرىقشا ەكەنىن ەرىكسىز اڭعاردىم. جىل سايىن جەڭىس كۇنى قارساڭىندا جامبىل جاباەۆ ەسكەرتكىشى جانىندا مەكتەپ وقۋشىلارى, قوعامدىق ۇيىمداردىڭ بەلسەندىلەرى, ەلشىلىك وكىلدەرىنىڭ قاتىسۋىمەن ءتۇرلى پاتريوتتىق شارالار ۇيىمداستىرىلادى ەكەن. وسىنداي تاعىلىمدى شارالاردى وتكىزۋدە, ارينە, سانكت-پەتەربۋرگ قالاسىنداعى قازاق قوعامىنىڭ مۇشەلەرى ولشەۋسىز ەڭبەك ءسىڭىرىپ جۇرگەنى ءسوزسىز.
ۇلى وتان سوعىسى تاريحىن زەردەلەسەك لەنينگراد ءۇشىن بولعان قيان-كەسكى شايقاستىڭ ورنى بولەك دەۋگە تۇرادى. جاۋ قۇرساۋىندا قالعان قالانى قورعاۋ كەزىندە قانشاما كەڭەستىك جاۋىنگەرلەر وققا ۇشىپ, جەر جاستاندى. ەڭ باستىسى قاسىق قانى قالعانشا ايقاستان شەگىنبەگەن مايدانگەرلەرىمىز جاۋدى لەنينگرادعا كىرگىزبەي, بەتىن قايتاردى. وسىنداي تاريحي شايقاس كەزىندە قانشاما قازاقستاندىق ازاماتتار دا ەرلىكتىڭ ۇلگىسىن كورسەتتى. ال سول ەرلىكتىڭ جەرگىلىكتى تۇرعىندار تاراپىنان ەلەنىپ, ەسكەرىلۋى شىن مانىندە كوڭىلدى مارقايتىپ, ەڭسەڭدى كوتەرەدى ەكەن.
ايگۇل ۋايسوۆا,
سانكت-پەتەربۋرگ
