F توبى: گەرمانيا. مەكسيكا.شۆەتسيا. كورەيا
ءۇش كونتينەنت كۇشتىلەرىنىڭ كەرۋەنىن ءتۇزىپ وتىرعان بۇل توپ ەڭ ۇيىمشىل شوعىر رەتىندە اتاپ ءوتىلىپ وتىر. اڭگىمە مۇنداعى كوماندالاردىڭ بەلگىلى ءبىر تارتىپكە باعىناتىنى تۋرالى عانا ەمەس. ونى قاتتى ۇستاناتىن نەمىستەردىڭ ءوزى بۇگىندە ەركىندەۋ ويناۋعا كوشىپ كەتكەن. گاپ قۇرامالاردىڭ ويىن مودەلدەرىن قۇرۋلارىندا. ايتالىق, شۆەدتەر قورعانىسقا قاتتىراق كوڭىل بولەدى. كورەيلەر جىلدام قاۋىرت شابۋىلداردان ءناپاحا ىزدەيدى. مەكسيكالىقتار الاڭنىڭ ورتاسىندا قاقپاقىلداپ, ءبىر-بىرلەرىنە دوپ بەرگەنگە اۋەس. بىراق بۇلاردىڭ اراسىندا ءبارىبىر نەمىستەردىڭ دەسى باسىم. ءسىرا, ودان كەيىنگى ورىنعا مەكسيكا تالاساتىن شىعار.
گەرمانيا قۇراماسى
گەرمانيا قۇراماسى ىرىكتەۋ تۋرنيرىندە ءوزىنىڭ ناعىز الەم چەمپيونى ەكەنىن تانىتىپ, بارلىق 10 ماتچتا دا جەڭىسكە جەتتى. ول سوعىلعان گول (43) جاعىنان دا رەكورد جاسادى.
«نەمىس ماشيناسى» الەم چەمپيونى اتانۋدىڭ سانى جاعىنان برازيليادان كەيىن يتاليامەن بىرگە ەكىنشى بولىپ تۇر, كوماندا مۇنداي اتاققا 4 رەت (1954, 1974, 1990, 2014) قول جەتكىزدى. ەندى وسى جولى السا, باستى باسەكەلەسىمەن تەڭەسەدى. بۇدان بولەك, 1 مارتە (2017) كونفەدەراتسيا كۋبوگىن ۇتىپ, 3 رەت (1972, 1980, 1996) ەۋروپانىڭ چەمپيونى, 1 ساپار (1976) وليمپيادا چەمپيونى بولدى.
نەمىستەردىڭ ىرىكتەۋ تۋرنيرىنەن شىعا الماي قالعان كەزى بولعان ەمەس. ولار 1930 جىلى ۋرۋگۆايدا وتكەن ءبىرىنشى چەمپيوناتقا ەكونوميكالىق, 1950 جىلى برازيلياعا ەكىنشى دۇنيەجۇزىلىك سوعىستان كەيىن ۇلتتىق فەدەراتسيانىڭ بولماۋى سەبەپتەرىنەن عانا بارا المادى. سونىمەن, ەندى 13-ءىنشى جاھاندىق جارىستارىنا قاتىسقالى وتىر.
مەكسيكا قۇراماسى
مەكسيكالىقتار كونكاكاف-تا الدىنا كوماندا سالعان جوق. ولار وتكەن جىلدىڭ قىركۇيەگىندە ىرىكتەۋ ءتۋرنيرى اياقتالۋعا 3 تۋر قالعاندا, جولدامانى قامتاماسىز ەتتى. قۇراما سودان كەيىن اقش, كوستا-ريكا جانە پاناما جاساقتارىمەن وتكەن شەشۋشى راۋندتا دا ۇتىلعان جوق. ءسويتىپ, چەمپيوناتقا 16-نشى مارتە جولداما الدى.
بۇعان دەيىنگى 6 فينالدىق تۋرنيردە مەكسيكا 1/8 فينالعا شىعىپ وتىردى.
كوماندا كونكاكاف كۋبوگىن 10 رەت (1965, 1971, 1977, 1993, 1996, 1998, 2003, 2009, 2011, 2015) ۇتىپ العان, 2012 جىلى وليمپيادا چەمپيونى بولدى.
شۆەتسيا قۇراماسى
وسى شۆەتسيا قۇراماسى يتاليانىڭ مۋنديالعا بارار جولىن كەسىپ, باستى سەنساتسيالاردىڭ ءبىرىن جاسادى. ول توپتىق ويىنداردان كەيىنگى قايتپا-قايت ماتچتاردا الەمنىڭ 4 دۇركىن چەمپيونىن جولدان قاعىپ تاستادى. «ترە كرۋنۋردىڭ» توپتاعى جەڭىسىن دە ەرەكشە اتاپ وتۋگە بولادى. ول فرانتسۋزداردى العا جىبەرىپ قويعانىمەن, نيدەرلاندتاردى ارتتا قالدىردى.
شۆەدتەر وسىمەن 12-ءنشى رەت جاھاندىق دوداعا قاتىسقالى تۇر. بۇل جولى ولارعا قۇرامادا ويناۋدان باس تارتقان زلاتان يبراگيموۆيچسىز قيىن سوعۋى دا مۇمكىن.
سكانديناۆتار 1 رەت (1958) ءوز ەلىندە وتكەن چەمپيوناتتا برازيليالىقتارعا جول بەرىپ, ءۇشىنشى بولىپ قالسا, 1950, 1994 جىلدارى قولا جۇلدە الدى. ال 1948 جىلى وليمپيادادا توپ جاردى.
كورەيا قۇراماسى
كورەيا قۇراماسى ەلەكتىك توپ تۋرنيرىندە يران كومانداسىنان كەيىنگى ەكىنشى ورىنعا جايعاستى. بىراق باستى باسەكەلەسىنەن 7 ۇپاي قالىپ قويدى. ول 10 ويىننىڭ 4-ەۋىندە جەڭىسكە جەتۋ ارقىلى رەسەيگە جولداما الىپ شىقتى.
الداعى الەم چەمپيوناتى كورەيلەر ءۇشىن 10-ىنشى باسىرەلى باسەكە بولادى. ازيا قۇرلىعىندا ازىرگە بىردە-ءبىر قۇراما مۇنداي تابىسقا جەتكەن جوق. كوماندا 2002 جىلى ءوز الاڭىندا وتكەن الاماندا ەڭ ۇلكەن تابىسىنا جەتتى. گوللاند مامانى گۋس حيددينك جاتتىقتىرعان قۇراما جولاي يتالياندار مەن يسپانداردى جولدان شىعارىپ تاستاپ, جارتىلاي فينالعا دەيىن باردى. بىراق مۇندا ولارعا تورەشىلەردىڭ دە ىقپالى از بولعان جوق.
كورەيا قۇراماسى ازيادا ەكى رەت – 1956, 1960 جىلدارى چەمپيون بولعان.
