نازارباەۆ ورتالىعى مەن نيدەرلانديا ەلشىلىگى استانالىقتارعا الەمگە ايگىلى گوللاند كەسكىندەمەشىسى ۆينسەنت ۆان گوگ سالعان سۋرەتتەردىڭ كوشىرمەسىن كورسەتتى.
گوللانديانىڭ استاناداعى كۇندەرى اياسىندا ۇيىمداستىرىلعان كورمەگە نيدەرلاندى كورولدىگىنىڭ قازاقستانداعى توتەنشە جانە وكىلەتتى ەلشىسى پەيتەر ۆان لەۋۆەن قاتىستى. ول جينالعان جۇرتپەن بىرگە قىلقالام يەسىنىڭ پەيزاجدارى مەن اۆتوپورترەتتەرىنەن قۇرالعان 44 تۋىندىنى تاماشالادى. «ۆينسەنت ۆان گوگ – اتى اڭىزعا اينالعان ادام. ونىڭ شىعارماشىلىعى وزىنەن كەيىنگى بۋىنعا قاتتى اسەر ەتتى. ول شىن مانىسىندە ۇلى سۋرەتشى بولدى. ماحاببات پەن قايعىعا تولى تۋىندىلارى قايتالانبايتىندىعىمەن ەرەكشەلەندى. ۆينسەنت ۆان گوگتىڭ كاسىبي شەبەرلىگى پابلو پيكاسسومەن بىردەي. بۇگىنگى كۇنگە سۋرەتشىنىڭ 1700 جۇمىسى جەتتى. بۇگىن استانانىڭ ونەرسۇيەر قاۋىمىنا كەرەمەت مۇمكىندىك ۇسىنىلدى دەپ ويلايمىن. سەبەبى, سىزدەر وزگەلەر ىزدەپ ءجۇرىپ سۇيسىنەتىن سۋرەتتەردى الىسقا بارماي-اق, شىعىندالماي-اق, ءوز ەلدەرىڭىزدە كورىپ وتىرسىزدار. سىزدەر مەن بىزدەرگە وسىنداي جاعداي جاساعان قازاقستاننىڭ بيلىك باسىنداعى تۇلعالارىنا جانە نازارباەۆ ورتالىعىنا العىس ايتامىن», دەدى ەلشى كورمەدە سويلەگەن سوزىندە.
«نۇرسۇلتان نازارباەۆ باسقارىپ وتىرعان ەل ورتالىق ازيا ايماعىنىڭ تۇراقتىلىعىنا ۇيىتقى بولىپ وتىر. ال, استانا ساياسي, مادەني جانە ءدىني باعىتتا حالىقارالىق جيىن وتكىزەتىن جانە سودان قورىتىندى شىعاراتىن دانا قالا رەتىندە تانىلۋدا. بۇل قالا قولعا العان بارلىق ءىسىن ابىرويمەن اتقارادى. سىزدەر وتە ادەمى قالادا تۇراسىزدار, سىزدەر باقىتتىسىزدار», دەدى ول.
وسىدان سوڭ ەلشى نيدەرلاندى مەن قازاقستان بارلىق باعىتتا قويىن-قولتىق ارالاساتىنىن ايتىپ, ىنتىماقتاستىقتىڭ تامىرى تەرەڭدەي بەرەتىنىن باياندادى. «مەن بۇعان كامىل سەنەمىن جانە دوستىعىمىز بەن ارىپتەستىگىمىزدى جالعاستىرۋ جولىندا ايانباي ەڭبەك ەتەمىن», دەدى پەيتەر ۆان لەۋۆەن.
جادىڭىزدا ءجۇرسىن, ۆينسەنت ۆان گوگ سۋرەت سالۋدى 30 جاسىندا باستاعان.
نەگىزىنەن قاراپايىم جانداردىڭ ءومىرىن بەينەلەگەن. ونىڭ «شارۋا قىز», «كارتوپپەن جۇرەك جالعاۋشىلار», «سەنا ۇستىندەگى كوپىر», «تانگا اكەي پورترەتى» اتتى كارتينالارى تۇڭعىش تۋىندىلارى رەتىندە تاريحتا قالعان.
عۇمىرىنىڭ سوڭعى ەكى ايىندا ۆينسەنت ۆان گوگ جان اياماي ەڭبەك ەتىپ, دۇنيەگە 80 كارتينا اكەلگەن. ءدال وسى ۋاقىتتا ونىڭ ونەرىن باعالاۋشىلاردىڭ قاتارى كوبەيىپ, سۋرەتشىنىڭ اتاق-داڭقى ارتقان. الايدا, قىلقالام يەسىنىڭ دەنساۋلىعى سىر بەرىپ, ول جۇيكە اۋرۋىنا شالدىققان. ەڭ وكىنىشتىسى ۆينسەنت ۆان گوگ وزىنە ءوزى قول جۇمساپ, تاپانشامەن اتىلىپ ولگەن.
قانات ماحامبەت
