استانا قالاسى تىلدەردى دامىتۋ باسقارماسىنىڭ باستاماسىمەن «ورتاق ەل – ورتاق ءتىل» تاقىرىبىندا دوڭگەلەك ۇستەل ءماجىلىسى ءوتتى. وزەكتى اڭگىمە وربىتۋگە پارلامەنت دەپۋتاتتارى, ساياساتكەرلەر, ءمادەنيەتتانۋشىلار, ەتنو-مادەني ءبىرلەستىكتەردىڭ وكىلدەرى قاتىستى.
دوڭگەلەك ۇستەلدى جۇرگىزۋشى ءتىلدەردى دامىتۋ باسقارماسىنىڭ باسشىسى ەربول تىلەشوۆ مەملەكەتتىك ءتىلدىڭ مارتەبەسىن كوتەرۋ جونىندە ەلباسى نۇرسۇلتان نازارباەۆتىڭ قازاقستان حالقى اسسامبلەياسىنىڭ حح سەسسياسىندا ءسويلەگەن سوزىنە توقتالىپ, شاراعا شاقىرىلعان قوناقتاردى ايتۋلى تاقىرىپ بويىنشا اڭگىمەگە شاقىردى. ءوز كەزەگىندە سەنات دەپۋتاتى عاريفوللا ەسىم قازاقستان قوعامىنداعى قازاق ءتىلىنىڭ ماڭىزدىلىعى تۋرالى, ەلىمىزدەگى بىرلىك پەن بەرەكەگە دانەكەر بولاتىن بىردەن-ءبىر اتقارۋشى فۋنكتسيا مەملەكەتتىك ءتىل, ياعني, قازاق ءتىلى ەكەنىن تىلگە تيەك ەتتى. ءماجىلىس دەپۋتاتى ورازكۇل اسانعازى دا مەملەكەتتىك ءتىلدىڭ بۇگىنگى احۋالىنا توقتالىپ, «الداعى ۋاقىتتا وسىنداي جيىنداردى الدىمەن قازاقشا امانداسۋدان باستاۋىمىز كەرەك» دەگەن ۇسىنىس-پىكىرىن دە جەتكىزدى. دوڭگەلەك ۇستەلگە قاتىسۋشى ەتنو-مادەني ورتالىقتار وكىلدەرى دە ءوز ويلارىن ورتاعا سالىپ, پارلامەنت دەپۋتاتتارىنىڭ ايتقاندارىنا قولداۋ ءبىلدىردى.
شارا سوڭىندا استانا قالاسى ىشكى ساياسات باسقارماسى باسشىسىنىڭ ورىنباسارى ا.سەيدۋمانوۆ ەلوردانىڭ قوعامدىق-ساياسي ءومىرىندە بەلسەندى جۇمىس اتقارىپ ءجۇرگەن بىرقاتار ەتنو-مادەني ءبىرلەستىكتەردىڭ وكىلدەرىنە ەلباسىنىڭ اتىنان بەرىلگەن العىس حاتتاردى تابىس ەتتى.
ەركەجان ساتىمبەك
