كەشە ۇلتتىق اكادەميالىق كىتاپحانادا ەلورداداعى يۋنۋس ەمرە تۇرىك مادەنيەتى ورتالىعى مەن قازاقستان جازۋشىلار وداعىنىڭ نۇر-سۇلتان قالالىق فيليالى قازاق تىلىنە اۋدارتىپ, كىتاپ ەتىپ باسىپ شىعارعان «يۋنۋس ەمرەنىڭ تاڭدامالى ولەڭدەرى» اتتى جيناقتىڭ تانىستىرىلىمى ءوتتى.
كىتاپ تۇرىك پروفەسسورى ەردوعان بوز دايىنداعان ءماتىندى نەگىزگە الا وتىرىپ ءتارجىمالاندى. اقىننىڭ 13-14 عاسىرلاردا جازعان «ناسيحاتتار كىتابى» جانە «ديۋان» جيناعىنىڭ 72 ولەڭىن اۋدارماشى قازىرگى تۇرىك تىلىنە ىڭعايلاپ, ءماتىن تۇرىندە دايىنداپ شىقتى. اتالعان ءماتىندى جولما-جول يۋنۋس ەمرە تۇرىك مادەنيەتى ورتالىعىنىڭ ديرەكتورىنىڭ مىندەتىن اتقارۋشى, Ph دوكتورى الماگۇل يسينا قازاق تىلىنە اۋداردى. ال 19 قازاق اقىنى وسى ءماتىندى ولەڭگە اينالدىردى.
ديۋان جيناعى يۋنۋس اقىندىعىنىڭ شىڭى دەپ سانالادى. جارىق كورگەن كىتاپتا قازاقشا اۋدارما مەن 13-14 عاسىرلارداعى تۇرىكشە تۇپنۇسقاسى بىرگە ۇسىنىلعان. يۋنۋس ەمرە – انادولى جۇرتىندا ءياساۋيدىڭ مەكتەبىن جالعاستىرۋشى اقىن, ولەڭدەرىن ياساۋي جولىمەن ءتۇسىندىرىپ جازعان. ولەڭدەرىنىڭ يدەياسى ادامزاتتى سۇيۋگە, اقيقاتقا, سابىرعا, ياعني ادامزاتتىق قۇندىلىقتارعا ۇندەيدى.
– يۋنۋس ەمرە جىلىنا بايلانىستى تۇركيانىڭ يۋنۋس ەمرە ينستيتۋتى مەن قازاقستان جازۋشىلار وداعىنىڭ نۇر-سۇلتان قالالىق فيليالى بىرلەسىپ, يۋنۋستىڭ 72 ولەڭىن قازاق تىلىنە اۋدارىپ, كىتاپ ەتىپ باسىپ شىعاردى. بۇل جوباعا قازاقستاننىڭ ەڭ تالانتتى 19 جاس اقىن اۋدارماشىسىن قاتىستىردىق. سەبەبى جاڭا اقىندار, جاس اقىندار – قازىرگى ەۋروپانىڭ دا, باتىستىڭ دا, شىعىستىڭ دا ولەڭ ورنەگىن بىلەتىن ىزدەنىمپاز, بۇگىنگى ادەبيەتكە وزىندىك قولتاڭباسىمەن كەلگەن اقىندار. يۋنۋس ەمرە جىرلارىنىڭ اۋدارماسىنا ەرەكشە ورنەك بەرەدى دەپ ويلادىق. يۋنۋستىڭ جىرلارىن ەرتەدەن قازاق تىلىنە اۋدارىپ جۇرگەن ايتۋلى اقىنداردىڭ اراسىندا نەسىپبەك ايتۇلى, ۇلىقبەك ەسداۋلەت, وتكەندە عانا يۋنۋستىڭ جىرلارىن جەكە كىتاپ ەتىپ شىعارعان سۆەتقالي نۇرجان ەسىمدەرىن ەرەكشە اتاپ وتۋگە بولادى. بۇل اعا اقىندار اۋدارمالارىنىڭ ورنى بولەك, – دەيدى جازۋشىلار وداعىنىڭ حاتشىسى, وسى ۇيىمنىڭ نۇر- سۇلتان قالالىق فيليالىنىڭ ديرەكتورى داۋلەتكەرەي كاپۇلى.
1000 دانا بولىپ جارىق كورگەن يۋنۋستىڭ تاڭدامالى ولەڭدەر جيناعى قازاقستاننىڭ وبلىس ورتالىقتارىنداعى بارلىق كىتاپحانالار مەن ۋنيۆەرسيتەتتەرگە تارتۋ ەتىلەدى.
