بيىل جاڭادان اشىلعان ىشكى جانە حالىقارالىق اۋە باعىتتارى بويىنشا 2019 جىلعى 11 ايداعى جولاۋشىلار اعىنىنىڭ كورسەتكىشى 4,6 ملن جولاۋشىعا جەتكەن. ال رەيستەر سانى وتكەن جىلمەن سالىستىرعاندا 3,7 پايىزعا ۇلعايىپتى. وسىعان وراي, ەلوردا اۋەجايىندا 5 ميلليونىنشى جولاۋشىنى انىقتاۋعا ارنالعان سالتاناتتى ءىس-شارا ءوتتى.
5 ميلليونىنشى جولاۋشىنىڭ اتى ەسەپتەۋ جولىمەن انىقتالدى. پاۆلودار قالاسىنان «Fly Arystan» اۆياكومپانياسىنىڭ KC7312 رەيسىمەن العاش رەت ۇشاققا وتىرىپ, نەمەرەلەرىمەن ۇشىپ كەلگەن زەينەپ نۇرعازينا مەرەيتويلى بيلەتتىڭ يەسى اتاندى. سالتاناتتى شارادا نۇرسۇلتان نازارباەۆ حالىقارالىق اۋەجايى باسقارماسىنىڭ توراعاسى رادىلبەك ءاديمولدا جەڭىمپازعا اۋەجاي اتىنان جول شابادانىن تابىس ەتىپ, جينالعانداردى اۋەجايدىڭ جەتىستىگىمەن تانىستىردى. سونداي-اق «Fly Arystan» اۆياكومپانياسى اتىنان كەز كەلگەن باعىت بويىنشا ۇشۋعا سەرتيفيكاتى بەرىلدى. ءارى «Astana Convention Bureau» استانانىڭ ەڭ ۇزدىك قوناقۇيلەرىنىڭ ءبىرى «The Ritz-Carlton Astana» تۇرۋعا جانە ەلوردانىڭ كورىكتى جەرلەرىنە بارۋعا ارنالعان سەرتيفيكات سىيلادى.
– مەن ءۇشىن بۇگىنگى وقيعا – ۇلكەن قۋانىش ءارى كۇتپەگەن جايت. ەلورداعا ەكى نەمەرەممەن بىرگە بىرنەشە كۇنگە قوناققا كەلدىم. بۇگىنگى تاڭ وسىنداي قۋانىشتى وقيعادان باستالدى. وسىنداي سىيلىقتار ءۇشىن بارلىعىڭىزعا العىس بىلدىرەمىن. ومىرىمدە ءبىرىنشى رەت وسىنداي جاعداي ورىن الىپ وتىر. ۇشاقپەن العاشقى ساپارىم ماعان ساتتىلىك سىيلادى. ەندى مەن ساتتىلىككە سەنەمىن. الداعى جىل بارشاڭىزعا تەك قۋانىش سىيلاسىن! – دەپ زەينەپ نۇرعازينا ءوزىنىڭ قۋانىشىن ءبولىستى.
جادىرا مۇراتبەكوۆا
