جاستاردى جالعان ءدىني اعىمداردىڭ ارباۋىنان ساقتاۋ ماقساتىندا استانا قالاسى اكىمدىگى مەن ءدىن پروبلەمالارىن زەرتتەۋ ورتالىعى ەكسترەميزم مەن تەرروريزمگە قارسى اقپاراتتىق ءتۇسىندىرۋ جۇمىستارىن باستادى. 5 قازانعا دەيىن استاناداعى بىرقاتار جوعارى وقۋ ورىندارىنىڭ ستۋدەنتتەرى ءدىن وكىلدەرىمەن كەزدەسىپ, دەسترۋكتيۆتى جالعان توپتار جايىنداعى ماڭىزدى اقپاراتتارمەن تانىسادى.
ءدىن ماسەلەلەرى جونىندەگى اقپاراتتىق-تۇسىندىرمە توپتارىنىڭ العاشقى جيىندارىنىڭ ءبىرى س. سەيفۋللين اتىنداعى قازاق اگروتەحنيكالىق ۋنيۆەرسيتەتى مەن قازاق تەحنولوگيا جانە بيزنەس ۋنيۆەرسيتەتىندە ءوتتى. مۇندا «نۇر استانا» ورتالىق مەشىتىنىڭ نايب-يمامدارى نۇرلان رامازانوۆ پەن مارات بەكتازينوۆ ستۋدەنتتەرگە اداسقان توپتاردىڭ سيپاتى مەن ماقساتتارىن اڭگىمەلەدى. «يسلام – بەيبىتشىلىكتى ناسيحاتتايتىن تازا ءدىن. پايعامبارىمىز (وعان اللانىڭ سالاۋاتى مەن سالەمى بولسىن) «ناعىز مۇسىلمان وزگەلەرگە تىلىمەن دە, قولىمەن دە زيان كەلتىرمەيدى» دەگەن. قازىرگى تاڭدا يسلامنىڭ اتىن جامىلعان تەرىس اعىمدار بار. ولار قۇراننىڭ اياتتارى مەن راسۋلاللاھتىڭ حاديستەرىن بۇرمالاپ تۇسىندىرگەن كوسەمدەردىڭ ارتىنان سوقىر ەرىپ, سانالارى سان ساققا جۇگىرىپ, اداسىپ ءجۇر. ۇلتتىق قۇندىلىقتارىمىز بەن ادەت-عۇرىپ, سالت-ءداستۇرىمىزدى وزگەرتۋگە, سوعان قاراما-قايشى ارەكەت ەتۋگە شاقىرادى. ولاردان ساق بولىڭىزدار. نەگىزگى ءدىني مالىمەتتى سەنىمدى كوزدەردەن, ياعني ءبىلىمى بار ارنايى ورىنداردان العان ءجون. تەررورلىق ارەكەتتەردى جالاۋلاتاتىن اداسۋشىلار قۇراننىڭ اياتتارىن بۇرمالاپ, تۋرا ماعىناسىندا قابىلدايدى. ماسەلەن, قاسيەتتى قۇران كارىمدە «اللانىڭ جولىندا شىنايى جيھاد جاساڭدار» دەگەن ايات بار. سونى سوزبە-ءسوز ءتۇسىنىپ, ارام پيعىلدارىنا پايدالانادى.
جاستاردىڭ ءدىني ساۋاتىن ارتتىرىپ, ەكسترەميزم مەن تەرروريزمدى الدىن الۋدى كوزدەيتىن جيىن بارىسىندا دەرەكتى فيلم كورسەتىلىپ, كەلۋشىلەرگە «بىلگەنىڭىز ماڭىزدى» اتتى جادىنامالار تاراتىلدى. مۇندا دەسترۋكتيۆتى كۋلت پەن جالعان ءدىني اعىمداردىڭ باستى بەلگىلەرى كورسەتىلگەن.
قالا اكىمدىگىنە قاراستى ءدىن پروبلەمالارىن زەرتتەۋ ورتالىعىنىڭ باسشىسى ءجۇسىپ جۇماعۇلوۆتىڭ ايتۋىنشا, ەلورداداعى ءدىني احۋالدى تۇراقتى نازاردا ۇستاۋ باعىتىندا بىرقاتار ساراپتامالار جۇرگىزىلەدى. ماسەلەن, ورتالىق بىلىكتى ماماندار مەن پوتەنتسيالدى راديكالداردىڭ قاتىسۋىمەن تەرەڭدەتىلگەن سۇحباتتاردى ۇيىمداستىرادى.
ءمادينا جاقىپ
