جاڭا قونىسقا كوشتىك
«استانا اقشامى» گازەتىنىڭ ۇجىمى استانا قالاسى اكىمدىگىنىڭ قولداۋىمەن جاڭا جىلدى جاڭا قونىستا قارسى الدى.
باسىلىم بۇگىننەن باستاپ ەسىلدىڭ سول جاعالاۋىنداعى «نۇرسايا-2» تۇرعىن ءۇي كەشەنىندە ورنالاسقان گازەتتىڭ جاڭا رەداكتسياسىنان تارالا باستايدى.
قازاقتا «كورشىڭ جاقسى بولسا, قونىسىڭ جايلى بولادى» دەگەن ءسوز بار.
رەداكتسيا عيماراتىنىڭ وڭ قاپتالىندا ەڭسەسى بيىك – «اقوردا», سول جاعىندا قالانىڭ بويتۇمارىنا اينالعان – «ءبايتەرەك», ارقا تۇسىندا ەلدىڭ ايبىنىن اسقاقتاتقان – قورعانىس مينيسترلىگى, قارسى الدىندا كەلىسىم مەن بەيبىتشىلىكتىڭ كەپىلىنە اينالعان سىرتقى ىستەر مينيسترلىگىنىڭ عيماراتى ورنالاسقان.
مەملەكەتتىك بيلىك ورگاندارى, ديپلوماتيالىق وكىلدىكتەر, جەتەكشى ۋنيۆەرسيتەتتەر, زاماناۋي مەديتسينالىق كلينيكالار مەن ەڭ ءىرى مادەني وشاقتار دا وسىندا ورىن تەپكەن. سول جاعالاۋداعى ماڭىزدى مەكەمەلەردىڭ قاتارى ەندى مىنە, حالىقتىڭ كوزى, قۇلاعى ءھام ءتىلى بولا بىلگەن گازەت رەداكتسياسىمەن تولىعىپ وتىر.
تاۋەلسىزدىكپەن بىرگە جاساسىپ كەلە جاتقان ەلوردانىڭ باس باسىلىمىنىڭ ەڭ العاشقى سانى قازىرگى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى عيماراتىندا جارىق كورگەن بولاتىن. ودان كەيىن دە رەداكتسيا بىرنەشە رەت قونىس اۋداردى.
گازەتتىڭ اتاۋى دا ەكى رەت وزگەرتىلدى. الايدا, باسىلىم وزىندىك ۇستانىمى مەن باعىتىنان اينىعان جوق.
جيىرما جىلدان استام ۋاقىت بويى «استانا اقشامى» گازەتى سان سالانى قامتىپ, تولعاعى جەتكەن تاقىرىپتار توڭىرەگىندە سالماقتى ماقالالار جاريالاپ كەلەدى.
«جاقسى جەرگە جاتساڭ, جاقسى ءتۇس كورەرسىڭ» دەيدى. ەڭسەلى عيماراتقا قونىس تەپكەن رەداكتسيا ۇجىمىنىڭ قالامىنىڭ قۋاتى ارتىپ, جازارى كوبەيەدى دەگەن سەنىمدەمىز.
شىنار دوسان