جاڭا ۇلگىدەگى مەكتەپ-ليتسەي

Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك پەن نۇر-سۇلتان قالاسىنىڭ اكىمى التاي كولگىنوۆ ەكى جىل بۇرىن «CA Garden Schools» جەكە كومپانياسىنىڭ باسقارۋىنا بەرىلگەن №54 مەكتەپ-ليتسەيدىڭ جۇمىسىمەن تانىستى.ەكى جىل ىشىندە ينۆەستور جوندەۋ جۇمىستارى مەن ماتەريالدىق-تەحنيكالىق بازانى جاڭارتۋعا 100 ملن تەڭگەدەن استام قاراجات سالعان. وpen spase ۇلگىسىندە جۇمىس ىستەيتىن co-working الاڭدارى, intellectum قوسىمشا ءبىلىم بەرۋ بولمەسى جانە لەكتسيا­عا, شىعارماشىلىققا, مەدياعا ارنالعان ءۇش بولىكتەن تۇراتىن garden hub لەكتسيا بولمەلەرى سياقتى جاڭا جۇمىس الاڭدارى اشىلدى. ءبىرىنشى قاباتتاعى ديرەكتوردىڭ كابينەتى مۇعالىمدەر بولمەسى بولىپ قايتا جابدىقتالدى.
مەكتەپ ديرەكتورى شاكارىم سەيسەنبايدىڭ ايتۋىنشا, ءبىلىم بەرۋ جۇيەسىن جەتىلدىرۋ ماقساتىندا مۇعالىمدەر ۇنەمى بىلىكتىلىك ارتتىرۋ كۋرستارىنان وتەدى. مۇنداعى مۇعالىمدەر مەرەكە كۇندەرى كەزەكشىلىك جاساۋ سياقتى باسقا دا ءوز مىندەتتەرىنە كىرمەيتىن جۇمىستارمەن اۋرەلەنبەيدى. ال مەكتەپ تۇلەكتەرى ەلىمىز بەن شەت ەلدەردەگى ۇزدىك ۋنيۆەرسيتەتتەرگە وقۋعا ءتۇستى. Nur Otan پارتياسى توراعاسىنىڭ ءبىرىنشى ورىنباسارى مەكتەپتەگى وڭ وزگەرىستەرگە بيزنەس ەنگىزگەن مەنەدجمەنت جۇيەسىنىڭ ارقاسىندا قول جەتكىزىلگەندىگىن جانە مۇنداي تاجىريبەنى باسقا وقۋ ورىندارىنا تاراتۋدىڭ ماڭىزدىلىعىن اتاپ ءوتتى.
«ەلدەگى ادامي كاپيتالدىڭ ساپاسى مۇعالىمدەرگە جانە ءبىلىم بەرۋ دەڭگەيىنە بايلانىستى. سوندىقتان جۇيەنى زاڭنامالىق دەڭگەيدە جەتىلدىرۋ ءۇشىن پارتيا تاراپىنان ءبىز وسىنداي ءبىلىم وردالارىنىڭ ءساتتى قادامدارىن زەردەلەۋدەمىز. سونىمەن قاتار Nur Otan پارتياسىنىڭ توراعاسى ن.نازارباەۆتىڭ باستاماسىمەن وسى ماماندىقتىڭ مارتەبەسىن كوتەرۋگە, مۇعالىمدەرگە جۇكتەمەنى ازايتۋعا جانە ولاردىڭ مىندەتىنە كىرمەيتىن جۇمىستاردى اتقارۋىنا جول بەرمەۋگە باعىتتالعان «مۇعالىمنىڭ مارتەبەسى تۋرالى» زاڭ جوباسى جاسالدى. مەملەكەت باسشىسى قاسىم-جومارت توقاەۆ الداعى ءتورت جىلدا مۇعالىمدەردىڭ ەڭبەكاقىسىن ەكى ەسەگە كوتەرۋدى تاپسىردى. Nur Otan مۇعالىمدەرگە كومەكتەسۋ, جاعداي جاساۋ جانە ولاردىڭ مۇددەلەرىن قورعاۋ ءۇشىن وسى باعىتتا بەلسەندى جۇمىس ىستەيدى» دەدى باۋىرجان بايبەك.