سەيسەنبى كۇنى قازاق جانكۇيەرى ءبىر قۋانىپ قالدى. ازەربايجان ۇلتتىق قۇراماسىمەن جولداستىق كەزدەسۋ وتكىزگەن قازاقستان ۇلتتىق قۇراماسى ايقىن باسىمدىق تانىتتى. ستانيمير ستويلوۆ باپتايتىن قازاق فۋتبولشىلارى 3:0 ەسەبىمەن جەڭىسكە جەتتى.
«استانا ارەنا» ستاديونىنا جينالعان 22500 جانكۇيەر ويىننىڭ 12-مينۋتىندا ورىندارىنان تىك تۇرىپ, العاشقى گولدى سوققان رومان مۇرتازاەۆقا جانە وعان ادەمى پاس شىعارعان باۋىرجان يسلامحانعا قوشەمەت كورسەتتى. ارادا ەكى-اق مينۋت وتكەندە مۇرتازاەۆتىڭ ءوزى جارتىلاي قورعاۋشىمىز مۋجيكوۆتىڭ اياعىنا دوپ سالىپ بەردى. سەرىكجان بولسا ءساتتى مۇمكىندىكتى ءمۇلت جىبەرمەي, ەسەپتى ەسەلەدى.
ەكى مينۋتتا ەكى دوپ وتكىزىپ الىپ, ەسەڭگىرەپ قالعان ازەربايجان جىگىتتەرى قانشا تىرىسقانىمەن, ەريچ قاقپاسىنان ساڭىلاۋ تابا المادى. ويىننىڭ ءبىرىنشى بولىگى وسىلايشا 2:0 ەسەبىمەن اياقتالدى.
ەكىنشى تايمدا ويىن ءۇردىسى وزگەرە قويعان جوق. ەكى جاق تا الما-كەزەك شابۋىلدار ۇيىمداستىرىپ, ەسەپتى ەسەلەۋگە ۇمتىلىپ-اق باقتى. جولداستىق كەزدەسۋ بولعان سوڭ ەكى جاقتان دا بەس ويىنشىدان الماستى. سولاردىڭ ءبىرى قازاقستان قۇراماسىنداعى ەڭ جاس ويىنشى باقتيار زاينۋتدينوۆ ماتچتىڭ 90-مينۋتىندا ازەربايجان قۇراماسىنىڭ قاقپاسىندا ءۇشىنشى رەت الا دوپتى تۋلاتىپ ءتۇسىردى.
وسى ويىننان تۇيگەنىمىز, «استانا» كومانداسىن ءتورت رەت قاتارىنان قازاقستان چەمپيونى ەتكەن, ەكى رەت چەمپيوندار ليگاسىنىڭ توپتىق تۋرنيرىنە شىعارعان بولگار مامانى ستانيمير ستويلوۆتىڭ «شەبەرلىك قولتاڭباسىن» انىق اڭعاردىق. بۇل جەڭىس بيىل كۇزدە باستالاتىن ۋەفا اياسىنداعى ۇلتتار ليگاسىنا ۇمىتپەن قاراتتى. وسىنداي ويىن ورنەگىن ساقتاپ, شەبەرلىگىن ۇشتاي تۇسسە, قازاقستان قۇراماسى الداعى ەۋروپا چەمپيوناتىنا دا جولداما الىپ قالار دەگەن وي دا قىلاڭ بەرگەندەي.
