نۇر-سۇلتان قالاسىنداعى «حان شاتىر» سوو جانىنداعى الاڭدا اقمولا, پاۆلودار, قاراعاندى وبلىستارى جانە نۇر-سۇلتان قالاسىنىڭ تاۋار وندىرۋشىلەرىنىڭ اۋىلشارۋاشىلىق جارمەڭكەسى ءوتتى.
قالا تۇرعىندارى مەن قوناقتارى كۇننىڭ سۋىعىنا قاراماستان قاجەتتى ازىق-تۇلىك قورىن ساتىپ الۋدا. اسىرەسە, سيىر ەتى مەن ءسۇت ونىمدەرى, بالىق پەن كوكونىس كەڭ سۇرانىسقا يە. ال تاۋار قۇنى نارىقتاعى باعادان 10-15 پايىزعا ارزان.
«كۇن سۋىق بولسا دا ءوز ونىمدەرىمىزدى اكەلدىك. تۇرعىندار بىرتىندەپ جينالىپ جاتىر. كەشكى ۋاقىتتا دەيىن تاۋارلارىمىزدى ساتىپ, ەرتەڭ تاڭەرتەڭ تاعى دا شىعامىز. ءبىر بايقاعانىم, بالىق ونىمدەرىنىڭ باعاسى ارزان بولعاندىقتان تەز ءوتىپ كەتەدى» دەيدى ارداق ەسىمدى ساتۋشى.
بۇدان بولەك, تاۋارلاردىڭ ءتۇر-ءتۇرى ۇسىنىلۋدا, سونىڭ ىشىندە: سيىر ەتى, جىلقى ەتى مەن قوي ەتى, قۇس ەتى, ءسۇت جانە قىشقىل ءسۇت ونىمدەرى, كوكونىستەر (كارتوپ, پياز, ءسابىز, قىرىققابات), جەمىستەر, تاۋىق جۇمىرتقاسى, بالىق, جارما, ۇن جانە ت.ب. ونىمدەر بار.
«مەن بۇگىن الما مەن قيار, سيىر ەتى مەن بالىق ەتىن سالىپ الۋدامىن. سەبەبى المانىڭ قۇنى 350 تەڭگەدەن باستالادى ەكەن. ال ءۇيىمنىڭ جانىنداعى دۇكەننەن 550 تەڭگەدەن الىپ ءجۇرمىن. سەنبىلىك دەمالىسىمدى پايدالانىپ, جارمەڭكەگە كەلدىم» دەيدى سىمبات ەسىمدى قالا تۇرعىنى.
