ەلوردادا حالىقارالىق «جان شۋاق» سىيلىعى تابىستالدى. «Nur Otan» پارتياسىنىڭ «كەدەرگىسىز كەلەشەك» جوباسى اياسىندا وتكەن شارادا ارنايى كورمە ۇيىمداستىرىلدى. وندا مادەنيەت, سپورت, ءبىلىم مەن كاسىپكەرلىك سالاسىندا جەتىستىككە جەتكەن جاندار 7 اتالىم بويىنشا ماراپاتتالدى. ماقسات – الەۋمەتتىك كەدەرگىلەردى جويۋ مەن ەرەكشە قاجەتتىلىگى بار ادامداردىڭ پروبلەماسىنا قوعامنىڭ نازارىن اۋدارۋ.
اتالعان سىيلىق جىل سايىن قوعامدىق جۇمىستارعا بەلسەنە ارالاسقان مۇمكىندىگى شەكتەۋلى جاندارعا جانە ەرەكشە قاجەتتىلىكتەرى بار ادامداردىڭ ءومىر ءسۇرۋ ساپاسىن جاقسارتۋعا ۇلەس قوسقان ازاماتتارعا بەرىلەدى.
Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك اتاپ وتكەندەي, ەرەكشە قاجەتتىلىكتەرى بار ادامدارعا قولداۋ كورسەتۋ – ارقاشان بيلەۋشى پارتيا جۇمىسىنداعى باسىمدىقتاردىڭ ءبىرى. بۇگىندە ەلىمىزدە ەرەكشە قاجەتتىلىكتەرى بار 700 مىڭنان استام ازامات تۇرادى, ونىڭ 14%-ى – 18 جاسقا دەيىنگى بالالار.
«ەلباسى, پارتيا ليدەرى نۇرسۇلتان نازارباەۆتىڭ تاپسىرماسى بويىنشا وسى باعىتتاعى جۇمىستى جۇيەلەۋ ماقساتىندا ءبىز 2014 جىلى «كەدەرگىسىز كەلەشەك» پارتيالىق جوباسىن ىسكە قوستىق. جوبانىڭ ارقاسىندا ەرەكشە قاجەتتىلىكتەرى بار 40 مىڭعا جۋىق ازامات جۇمىسقا ورنالاستىرىلدى, 24 مىڭنان استام الەۋمەتتىك نىسانىندا ەرەكشە قاجەتتىلىگى بار ادامدار ءۇشىن بەيىمدەۋ جۇمىستارى جۇرگىزىلىپ, زاڭناماعا وزگەرىستەر ەنگىزىلدى, «بولاشاق» قورىنىڭ قولداۋىمەن 43 ينكليۋزيۆتى ءبىلىم بەرۋ كابينەتى اشىلدى. نۇرسۇلتان نازارباەۆ قورى قوماقتى جۇمىس اتقارۋدا. مەملەكەت باسشىسى قاسىم-جومارت توقاەۆ پارتيانىڭ سايلاۋالدى باعدارلاماسى اياسىندا تاعى 22 مىڭ الەۋمەتتىك ينفراقۇرىلىم نىسانىن بەيىمدەۋ, ەرەكشە قاجەتتىلىكتەرى بار ادامداردى جۇمىسقا ورنالاستىرۋ باعىتىنداعى ىستەردى جالعاستىراتىن بولادى» دەدى باۋىرجان بايبەك.
Nur Otan «بارلىق بالاعا – بىردەي مۇمكىندىك» قاعيداسىن جۇزەگە اسىرا وتىرىپ, ەلىمىزدەگى بارلىق كوللەدجدەر مەن جوعارى وقۋ ورىندارىندا, سونداي-اق مەكتەپتەر مەن مەكتەپكە دەيىنگى ۇيىمداردىڭ 70%-ىندا ينكليۋزيۆتى ءبىلىم بەرۋدى ەنگىزۋدى قامتاماسىز ەتپەك. وڭالتۋ ورتالىقتارىنىڭ سانى ۇلعايتىلىپ, ەرەكشە قاجەتتىلىكتەرى بار بالالاردى پسيحولوگيالىق-پەداگوگيكالىق جانە كوررەكتسيالىق قولداۋ بويىنشا مەملەكەتتىك تاپسىرىس ەنگىزىلەدى. اسىراۋشىسىنان ايىرىلعان بالالار ءبىر مەزگىلدە مۇگەدەكتىگىنە جانە اسىراۋشىسىنان ايرىلۋىنا بايلانىستى 2 جاردەماقى الاتىن بولادى.
ءوز كەزەگىندە قازاقستان مۇگەدەكتەر كونفەدەراتسياسىنىڭ پرەزيدەنتى جانات وماربەكوۆا «جان شۋاقتى» تاپسىرۋ ءراسىمى 2008 جىلدان بەرى وتكىزىلىپ كەلە جاتقانىن جانە وسى جىلدار ىشىندە سىيلىققا 70-تەن استام ادام يە بولعانىن اتاپ ءوتتى. بيىل 17 وڭىردەن 58 ادام ۇسىنىلىپ, ولاردىڭ ىشىنەن اشىق داۋىس بەرۋ ناتيجەسىندە ۇيىمداستىرۋ كوميسسيانىڭ شەشىمىمەن 7 ۇزدىك نومينانت انىقتالدى.
سونىمەن «مىقتى ەرىك-جىگەرى جانە جەڭىسكە دەگەن ۇمتىلىسى ءۇشىن» نوميناتسياسى بويىنشا الپينيست, حالىقارالىق دارەجەدەگى سپورت شەبەرى ماريا اۋەزوۆا ماراپاتتالدى. بيىل ول ەۆەرەست بازالىق لاگەرىندە 5364 م جانە كالا پاتحار تاۋىندا 5640 م بيىكتىكتى باعىندىردى.
«ەرەكشە قاجەتتىلىكتەرى بار ادامدارعا قاتىستى قوعامدىق سانانىڭ وڭ وزگەرىستەرىنە قوسقان ۇلەسى ءۇشىن» سىيلىعىنىڭ يەگەرى قوعام قايراتكەرى نياز سۇندەتاليەۆ بولدى.
«ەرەكشە قاجەتتىلىكتەرى بار ادامداردىڭ پروبلەمالارى مەن ءومىرىن اقپاراتتىق قامتۋعا قوسقان ۇلەسى ءۇشىن» نوميناتسياسى بويىنشا سىيلىقتى تانىمال بلوگەر الماس ەرجان الدى. «ەرىكتىلەر قوزعالىسىن دامىتۋداعى جەتىستىكتەرى ءۇشىن» مۇسىنشەنىڭ يەگەرى قوعام قايراتكەرى گۇلناز قوسمۋرزيەۆا بولدى. ول پاندەميا كەزىندە قاراجات جيناۋدى ۇيىمداستىرىپ, 2 مىڭنان استام مۇقتاج جانعا كومەك كورسەتتى.
«كاسىپكەرلىك بەلسەندىلىكتى دامىتۋعا قوسقان ۇلەسى ءۇشىن» نوميناتسياسى بويىنشا سىيلىقتى ەرەكشە قاجەتتىلىگى بار بالانىڭ اناسى گۇلميرا پارمىشەۆا يەلەندى. ول ەرەكشە بالالارعا ارنالعان دامىتۋ ويىنشىقتارىن شىعاراتىن كىshkentai جوباسىن ىسكە قوسقان. «ونەر جانە مادەنيەت سالاسىنداعى ۇزدىك جەتىستىكتەرى ءۇشىن» سىيلىعىنىڭ يەگەرلەرى بولىپ «ءبىز سىزدەردى جاقسى كورەمىز!» حالىقتىق كلوۋندار تەاترى تانىلدى. تەاتر ترۋپپاسى ەستۋ قابىلەتى بۇزىلعان ارتىستەردەن تۇرادى. «سپورت سالاسىنداعى ۇزدىك جەتىستىكتەرى ءۇشىن» اتالىمىندا پاۋەرليفتينگ بويىنشا سپورتشى, 2016 جىلعى ريو-دە-جانەيرودا وتكەن جازعى پاراليمپيادا ويىندارىنىڭ كۇمىس جۇلدەگەرى راۋشان قويشىباەۆا ماراپاتتالدى.
رەسمي دەرەك بويىنشا ەلىمىزدە مۇگەدەكتىگى بار 700-دەن استام ادام ءومىر سۇرەدى, ولاردىڭ 25 پايىزعا جۋىعى جۇمىسپەن قامتىلعان. ال 2025 جىلعا قاراي بۇل كورسەتكىشتى 30 پايىزعا جەتكىزۋ جوسپاردا بار.
