«نۇر وتان» پارتياسى جانىنداعى «جاس وتان» جاستار قاناتىنىڭ استانا قالالىق فيليالى مەن استانا قالاسى جاستار ساياساتى ماسەلەلەرى باسقارماسىنىڭ ۇيىمداستىرۋىمەن اقمولا وبلىسىنداعى زەرەندى دەمالىس ورتالىعىندا «جاستار – بولاشاق ەنەرگياسى» ۇرانى اياسىندا بەلسەندى جاستارعا ارنالعان جازعى لاگەر جۇمىسىن قورىتىندىلادى.
«جازعى لاگەرگە جىل بويى استانادا وتكەن ساياسي-قوعامدىق شارالارعا بەلسەندى قاتىسقان 150-گە جۋىق جاستار جينالدى. ولاردىڭ اراسىندا ۇزدىك ستۋدەنتتەر, جۇمىسشىلار, سپورتشىلار, ونەرپازدار جانە ەرىكتىلەر بولدى. ءۇش كۇن بويى بىلىكتى مامان-باپكەرلەردەن ءتالىم العان جاستار جاڭا يدەيالارمەن, تىڭ كۇشپەن قارۋلانىپ قايتقانى ءسوزسىز.
– بۇل لاگەرگە شاقىرىلعان جاستاردىڭ ءبارى – استانا قالاسىندا وتەتىن مەملەكەتتىك جانە قوعامدىق شارالارعا بەلسەندى قاتىسۋشىلار. سوندىقتان ولارعا جاقسى دەمالىس ۇيىمداستىرۋدى ءجون سانادىق. مۇندا ولار وزدەرىنىڭ ۇيىمداستىرۋشىلىق تاجىريبەلەرىن جەتىلدىرەتىن بولادى. ترەنينگتەر, سەمينارلار, ءتۇرلى تانىمدىق ويىندار وتكىزىلەدى, – دەپ اتاپ ءوتتى استانا قالاسى جاستار ساياساتى ماسەلەلەرى باسقارماسىنىڭ وكىلى اقۇلان تاستەمىر.
جازعى لاگەردىڭ باستى ماقساتى – استانالىق جاستاردىڭ بىرلەسۋىن نىعايتۋ ارقىلى ۇلت جوسپارىنىڭ «100 ناقتى قادامىن», «نۇر وتان» پارتياسىنىڭ «جاستار – وتانعا!» باعدارلاماسىن جۇزەگە اسىرۋعا, سونىمەن قاتار ەكسپو-2017 حالىقارالىق كورمەسىن وتكىزۋگە ۇلەس قوسۋعا دايىنداۋ. وسى ورايدا لاگەردە بولعان جاستاردىڭ بەلسەندىلىگىن ارتتىرۋعا باعىتتالعان «ۇلى دالانىڭ ۇلاندارى» اتتى مەرەكەلىك باعدارلاما وتە مازمۇندى ءارى قىزىقتى ءوتتى. ونىڭ اياسىندا ۇيىمداستىرىلعان شىعارماشىلىق بايقاۋ, سپورت سايىستارىندا جاستار ءوز قابىلەتتەرىن كورسەتتى.
تۇپتەپ ايتقاندا, استانالىق بەلسەندى جاستار جازعى لاگەردەن ءتالىم دە, كۇش-قۋات تا جيناپ قايتتى.
عالىم قوجابەكوۆ
