مەملەكەت باسشىسىنىڭ بيىلعى «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋى حالىقتىڭ كوكەيىندە جۇرگەن وزەكتى سۇراقتاردىڭ جاۋابىنا اينالدى.
«بارىنە بىردەي مۇمكىندىك بەرەتىن وركەنيەتتى ەل – ادىلەتتى قازاقستاندى قۇرۋ» جولىنداعى عىلىم جانە ءبىلىم بەرۋ ۇيىمدارىنىڭ رولىنە توقتالا كەلە, پرەزيدەنت اسىرەسە اۋىلداعى بالالار ءۇشىن ءبىلىم بەرۋ مۇمكىندىكتەرىن جەتىلدىرۋدى تاپسىرعان ەدى. وسى رەتتە ءوزىم وقيتىن استانا قالاسىنداعى Esil University ستۋدەنتتەرىنە بارلىق جاعداي جاسالعان. الىستان كەلگەن ستۋدەنتتەر جاتاقحانامەن قامتىلدىق. پاۆلودار وبلىسىنىڭ تەرەڭكول اۋىلىندا دۇنيەگە كەلگەن مەن شاعىن عانا اۋىلدان ارمان قۋىپ ەلىمىزدىڭ باس قالاسىنا كەلگەنمىن, بۇگىندە استانادا ءبىلىم الىپ جاتقانىمدى ماقتان ەتەمىن. قازىر قازاقستان پاتريوتتار اكادەمياسىنىڭ وقۋشىسىمىن. ءوزىم ءان مەن بيگە جاقىن بولعاندىقتان, ۋنيۆەرسيتەت قابىرعاسىندا اrt كلۋبتىڭ مۇشەسى اتاندىم.
بيىلعى جولداۋ جالپى ەلدىڭ ەكونوميكاسىن دامىتۋ, بارلىق ازامات ءۇشىن تەڭ مۇمكىندىكتەردى قامتاماسىز ەتۋ جانە تۇراقتى بولاشاق قۇرۋ باعىتىنا ارنالدى. جوعارىدا اتاپ وتكەنىمدەي, اۋىلدان كەلگەن ستۋدەنتتەر ءۇشىن جاسالىپ وتىرعان مۇمكىندىكتەر اياسى كەڭ. ول – جاتاقحانا, ءبىلىم گرانتتارى مەن جەڭىلدىكتەر. سونىمەن قوسا, ءبىلىم ساپاسىن ارتتىرۋ جانە جاس كاسىپكەرلەردى قولداۋ باستاماسى ءبىزدى ۇلكەن جەتىستىكتەرگە شابىتتاندىرادى.
«جاستارعا جان-جاقتى قولداۋ كورسەتۋ – مەملەكەتىمىزدىڭ باستى مىندەتىنىڭ ءبىرى. ەڭبەكپەن قامتيتىن ءتۇرلى شارا ارقىلى كەلەسى جىلى 100 مىڭ جاستى جۇمىسقا ورنالاستىرۋىمىز كەرەك. جاستاردىڭ كاسىپكەرلىك باستامالارىنا قولداۋ كورسەتۋ جالعاسادى. ولارعا جەڭىلدەتىلگەن تارتىپپەن جىلدىق ءوسىمى 2,5 پايىز بولاتىن شاعىن نەسيە بەرىلەدى. بۇل شارالار قوعامنىڭ بارىنشا ۇيلەسىمدى ءارى ادىلەتتى بولۋىنا ىقپال ەتەدى» دەدى پرەزيدەنت.
بولاشاقتا ەلىمىزدە ەڭبەكقور ادام, كاسىبي مامان ەڭ سىيلى ادام بولماق. ياعني ەڭبەك ادامىنىڭ مارتەبەسى ارتا تۇسپەك. بۇل ءۇردىس جاستاردىڭ شەت ەل اسپاي ەلدە قالىپ, ءوز ءىسىن باستاۋىنا ۇلكەن قولداۋ بولادى دەپ سەنەمىن.
بيىل وتاندىق جوعارى وقۋ ورىندارىنىڭ ءبىرىنىڭ بازاسىندا بريتاندىق Heriot-Watt University جانە تۇرىكتىڭ Hacettepe University فيليالدارىن اشۋدى قاراۋ جوسپارلانعان. جوعارى ءبىلىم بەرۋدى ينتەرناتسيونالداندىرۋ بويىنشا جۇمىستار ءبىزدىڭ Esil University دە ءساتتى جۇرگىزىلۋدە. اتاپ ايتار بولساق, ۋنيۆەرسيتەت كانادا ۋنيۆەرسيتەتىمەن (وڭتۇستىك كورەيا) جانە ەۋروپالىق ۋنيۆەرسيتەتپەن (شۆەيتساريا) بىرلەسىپ قوس ديپلومدى ءبىلىم بەرۋ باعدارلاماسىن جۇزەگە اسىرۋدا. سونداي-اق باكالاۆرياتتىڭ 22 ءبىلىم بەرۋ باعدارلاماسى, 11 ءبىلىم بەرۋ ماگيستراتۋراسى جانە دوكتورانتۋرانىڭ 5 ءبىلىم بەرۋ باعدارلاماسى بويىنشا ماماندار دايارلاۋدى جۇزەگە اسىرۋدا. ءبىزدىڭ تۇلەكتەر مەملەكەتتىك ورگانداردا, IT-ورتالىقتاردا جانە استانالىق بانكتەردە, ءىرى اكتسيونەرلىك قوعامدار مەن حالىقارالىق كومپانيالاردا جۇمىس ىستەيدى. سونىمەن قاتار, ۋنيۆەرسيتەتتە شىعارماشىل جاستاردى قولداۋعا ارنالعان TikTok ستۋديا جانە مەديا, سپورت, art كلۋبتار بار. ياعني ءبىلىم الۋمەن قاتار, ءوزىمىزدى دامىتۋ مۇمكىندىگى دە قاراستىرىلعان.
جالپى قازىرگى جاستار ماماندىق تاڭدار كەزدە ويلانىپ, ءوزىنىڭ قىزىعۋشىلىعىن ەسكەرۋى كەرەك دەپ ەسەپتەيمىن. ءوز باسىم ەكونوميكالىق, ياعني قارجى باعىتىندا تاڭداعان ماماندىعىمدى جاقسى كورەمىن. جاستار ناقتى ءبىر ماماندىقتىڭ قىر-سىرىن جەتىك بىلۋگە ۇمتىلعانى ءجون. ءوز سالاسىنىڭ شەبەرىنە ءاردايىم سۇرانىس بولادى. وسكەلەڭ ۇرپاق قازاقستاندا عانا ەمەس, وزگە ەلدەردە دە باسەكەگە قابىلەتتى بولۋى كەرەك. بۇل دا جولداۋدا ايتىلعان باسىم باعىتتىڭ ءبىرى. قازىرگى ەڭبەك نارىعىندا جان-جاقتى جانە ءوز ىسىنە سەنىمدى ادامدارعا سۇرانىس كوپ. سوندىقتان تاڭداعان ماماندىعىمىز بەن ىسىمىزگە ادال بولۋ ءۇشىن جاقسى وقىپ, باسەكەگە قابىلەتتى مامان بولۋعا ۇمتىلۋىمىز كەرەك.
انەليا مۇراتوۆا,
استانا قالاسى ەسىل ۋنيۆەرسيتەتى ەكونوميكالىق قاۋىپسىزدىكتى قامتاماسىز ەتۋ فاكۋلتەتىنىڭ ستۋدەنتى
