بۇگىن «جاستار» سارايىندا «سارايشىقتان سالەم ساز» باعدارلاماسى اياسىندا دينا نۇرپەيىسوۆا اتىنداعى اكادەميالىق قازاق حالىق اسپاپتار وركەسترىنىڭ كونتسەرتى وتەدى. اتىراۋلىق ونەر ۇجىمىنىڭ ەلورداعا گاسترولدىك ساپارى «كۇي اناسى» رەسپۋبليكالىق قورىنىڭ ۇيىمداستىرۋىمەن كۇيشى دينانىڭ ەسكەرتكىشىنە تاعزىم ەتىپ, گۇل شوقتارىن قويۋ راسىمىنەن باستالدى.
اتالعان قور جەتەكشىسى, كۇي اناسىنىڭ شوبەرەسى تولەگەن قۋانىشەۆ ونەرپازدارعا قوش كەلدىڭ ايتىپ, كۇيشىنىڭ ءومىر تاريحى مەن شىعارمالارى جيناقتالعان كىتاپتى سىيلادى. بەلگىلى كۇيشى-ۇستاز, قازاقستاننىڭ مادەنيەت قايراتكەرى ايتجان توقتاعان باتاسىن بەرىپ, وركەستر ارتىستەرى دينا نۇرپەيىسوۆانىڭ كۇيلەرىن ورىنداپ, ۇجىم مۇشەلەرى «كۇيشىلەر» اللەياسىنا شىرشا وتىرعىزدى.
دينا نۇرپەيىسوۆا اتىنداعى اكادەميالىق قازاق حالىق اسپاپتار وركەسترى جانىنان «سارماد» ەتنو-فولكلورلىق ءانسامبلى قۇرىلعان. اتالمىش ونەر ۇجىمىنىڭ «الاش اماناتى» اتتى كونتسەرتتىك باعدارلاماسىن ەرتەڭ «جاستار» سارايىنان تاماشالاۋعا بولادى.
