استانالىق جاستارعا بيىك عيماراتتان سەكىرۋ سانگە اينالدى. ەلىمىزدە كەنجە دامىعان روۋپ-دجامپينگ دەپ اتالاتىن بۇل سپورت تۇرىنە قىزىعۋشىلىق كۇن ساناپ وسكەنىن الەۋمەتتىك جەلىدەن-اق بىلۋگە بولادى. قالا سىرتىنداعى قۇرىلىسى اياقتالماعان عيمارات توبەسىنەن سەكىرۋگە بەل بۋعاندار قاتارىن نەگىزىنەن ستۋدەنتتەر قۇرايدى.
جاستىق جەلىك جارعا جىقپاسا يگى. بيىك عيماراتتان سەكىرۋدە قاۋىپسىزدىك ەرەجەلەرىن ساقتاۋ اسا ماڭىزدى. جاقىندا ءوزىم كۋا بولعان كوكتال كوشەسىندە ۇيىمداستىرىلعان «ەكستريم» شاراسىندا استانالىق جاستار 48 مەتر بيىكتىكتەن (16 قاباتتى ءۇي) سەكىردى. قايتالانباس اسەر العىسى كەلەتىندەردىڭ كوبى قىزدار ەكەن. ءبىرى ءوز قورقىنىشىمدى جەڭۋ ءۇشىن كەلدىم دەسە, ەندى ءبىرى ارىقتاعىسى كەلەتىنىن العا تارتتى.
ۇيىمداستىرۋشىلار الەۋمەتتىك «ۆكونتاكتە» جەلىسىندەگى ءوز پاراقشالارىنا سەكىرۋدىڭ ەرەجەسىمەن كەڭىنەن تانىستىرعان. الايدا, عيمارات باسىنا بارعاندا ەرەجە جايىندا قالادى. قان قىسىمىن ولشەپ, جۇرەك جۇمىسىن تەكسەرىپ, الكوگول ىشكەن-ىشپەگەندىگىن قاداعالاپ جاتقان ادام جوق. 3000 تەڭگەسىن ساناپ بەرگەندەردى كەزەك-كەزەگىمەن سەكىرتە بەرەدى. سونداي ءساتتىڭ بىرىندە جانار ەسىمدى ەۋرازيا ۇلتتىق ۋنيۆەرسيتەتىنىڭ ستۋدەنتى ءۇشىنشى قاباتتىڭ قابىرعاسىنا سوعىلا جازدادى. سەبەپ – قاۋىپسىزدىك ەرەجەسىنە قۇلاق اسپاعان. «جانار بيىكتىكتەن سەكىرگەندە دەنەسىن تومەن تاستاۋدىڭ ورنىنا, قورىققان بولار, اياعىمەن سەكىرىپ كەتتى. ناتيجەسىندە تومەنگى قاباتتىڭ قابىرعاسىنا سوعىلۋعا ءسال قالدى. ءبىز سەكىرەر الدىندا ەرەجەسىمەن تانىستىرامىز. ەگەر ەرەجەنى دۇرىس ساقتاماي, ءوزىنىڭ دەنساۋلىعىنا, ومىرىنە قاۋىپ تونسە, ءبىز جاۋاپ بەرە المايمىز» دەيدى ۇيىمداستىرۋشىلاردىڭ ءبىرى.
جوعارىدا ايتىپ كەتكەندەي, سانگە اينالدى دەۋىمىزدىڭ سەبەبى بار. ويتكەنى, جاستاردىڭ سەكسەن پايىزى الەۋمەتتىك جەلىدەگى جەكە سۋرەتىنە سەكىرۋ كەزىندە تۇسكەن فوتوسىن قويۋدى قالايدى. «جالپى, بۇل سپورت ءتۇرى بىزگە كەرەك پە؟» دەگەن ساۋالدى استانالىق پسيحولوگ ليمانا قويشيەۆاعا قويعان ەدىك.
–ارينە, كەرەك. قازىر ءححى عاسىر. ادامداردىڭ ءبىر-بىرىمەن بۇرىنعىداي شۇيىركەلەسىپ, اڭگىمەلەسۋى ازايىپ كەتتى. ەسەسىنە ۆيرتۋالدى الەم پايدا بولدى. بۇل سپورت ءتۇرىنىڭ جارناماسى دا الەۋمەتتىك جەلى ارقىلى قارقىن الۋدا. ادامدار وسىلايشا بيىكتىكتەن سەكىرۋ ارقىلى ىشتەگى سترەستەن, ەشكىمگە ايتا الماعان سىردان ارىلعىسى كەلەدى. ادرەنالين الۋ ءۇشىن دە كەرەك. پسيحولوگيالىق تۇرعىدان الساق, ادامداردىڭ بارىنە بىردەي قاجەت دەپ ايتا المايمىن. ەموتسياعا تەز بەرىلەتىن ادامدار ءۇشىن زيانى كوپ. ويتكەنى, سەكىرۋدەن كەيىن ونداي ادامداردىڭ پسيحيكاسى بىرازعا دەيىن قالپىنا كەلە المايدى. ەكىنشى جاعىنان, بۇل– ەۋروپاعا ەلىكتەۋشىلىك. مەنىڭ بىلۋىمشە, استانادا دەمالىس كۇندەرى قالا سىرتىنا وسىنداي دەمالىس ءجيى ۇيىمداستىرىلادى. كونسترۋكتور جاستارعا تەحنيكالىق قاۋىپسىزدىك ەرەجەسىن قىسقاشا تانىستىرادى. الايدا ەرەجەنىڭ سوڭىندا ادام ومىرىنە تىكەلەي جاۋاپ بەرمەيتىندىكتەرىن اشىق جازادى. سول سەبەپتى, ۇيىمداستىرۋشىلاردىڭ اراسىندا پسيحولوگ مامانداردىڭ دا بولعانى ءجون دەپ سانايمىن. كەيبىر ادامدار, سەكىرۋگە دايىندالىپ كەلگەنىمەن, جەمە-جەمگە كەلگەندە ىشكى دايىنسىزدىعىن كورسەتىپ قويادى. بۇل ءوز كەزەگىندە ونىڭ پسيحيكاسىنا كەرى اسەرىن تيگىزەدى, – دەيدى مامانىمىز.
كامەلەتتىك جاسقا تولماعان جەتكىنشەكتەر دە اتا-اناسىنىڭ جازباشا رۇقساتىمەن سەكىرە الادى ەكەن. بايقاعانىمىز, سەكىرۋ الاڭىندا توتەنشە جاعداي ورىن السا, جەدەل قىزمەت كورسەتەتىن ماماندار تۇگىلى مەديتسينالىق العاشقى كومەك بەرەتىن قىزمەتكەرلەر دە جوق. ءبىزدىڭ ايتپاعىمىز, بوي جازىپ, كوڭىل كوتەرۋدىڭ تاپتىرماس ءتۇرى دەپ تانيتىن جاستار سەكىرۋ كەزىندە قاۋىپسىزدىك قاعيدالارىن قاتاڭ ساقتاپ, ءوز ومىرلەرىنە جاۋاپتىلىق تانىتسا ەكەن.
گۇلميرا ايماعانبەت,
g.aimaganbet@astana-akshamy.kz
