انكارا دەكلاراتسياسى قابىلداندى
ءماجىلىس توراعاسى نۇرلان نىعماتۋلين باستاعان قازاقستاندىق دەلەگاتسيا انكارادا ءوتىپ جاتقان تۇركپا شارالارى شەڭبەرىندە اسسامبلەيانىڭ پلەنارلىق وتىرىسىنا قاتىستى.
ازەربايجان, قازاقستان, قىرعىزستان جانە تۇركيا پارلامەنتشىلەرى باس قوسقان وتىرىس نەگىزىنەن تۇركپا-نى قۇرۋ تۋرالى تاريحي كەلىسىمنىڭ 5 جىلدىعىنا ارنالدى. القالى جيىنعا قاتىسۋشىلار ۇيىم از عانا ۋاقىتتا مەملەكەتارالىق قاتىناستاردىڭ دامۋى مەن باۋىرلاس ەلدەردى جاقىنداتۋعا ۇلەس قوسىپ, ءۇنقاتىسۋ الاڭىنا اينالعانىن اتاپ ءوتتى. ءماجىلىس توراعاسى ن.نىعماتۋلين ءوز كەزەگىندە اسسامبلەيانىڭ الداعى ۋاقىتتاعى ءىس-شارالارىنىڭ باعىتىنا نازار اۋدارىپ, ونىڭ وزەكتىلىگىن باعالادى. «اسسامبلەيا الداعى قىزمەتىندە ايقىن كۇن ءتارتىبىن ناقتىلاپ, ءوزىنىڭ مۇمكىندىگىن كەڭەيتۋ ماقساتىندا بەلسەنە جۇمىس ىستەيتىن بولادى» دەدى ن.نىعماتۋلين. ىنتىماقتاستىقتىڭ جارقىن بولاشاعى باعىتىندا تاراپتار قاۋىپسىزدىك, يننوۆاتسيا, مادەنيەت پەن ءبىلىم سالالارىندا ءوزارا بايلانىستى تەرەڭدەتە ءتۇسۋدى قۋاتتايدى. پلەنارلىق وتىرىستا اسسامبلەيانىڭ باسشىلىق قۇرامىندا بولاتىن وزگەرىستەرمەن تانىستىرىلدى. تۇركپا-نىڭ باس حاتشىسى بولىپ الداعى ءتورت جىلعا قازاقستان پارلامەنتى سەناتى اپپاراتى باسشىسىنىڭ ورىنباسارى جاندوس اسانوۆ ءبىراۋىزدان سايلاندى. تۇركپا-نىڭ ەندىگى پلەنارلىق وتىرىسى كەلەر جىلى باكۋ قالاسىندا وتەتىن بولدى. تۇركى تىلدەس مەملەكەتتەر پارلامەنتشىلەرى كەزدەسۋىنىڭ قورىتىندىسى بويىنشا انكارا دەكلاراتسياسى قابىلداندى.
ەركەجان ساتىمبەك