استانا قالالىق ءدىن ىستەرى باسقارماسىنىڭ ۇيىمداستىرۋىمەن ەلورداداعى بەلسەندى جاستار مەن ۇيىمدارعا ارنالعان «جاڭا ءدىني قوزعالىستار جانە قازاقستاننىڭ قاۋىپسىزدىگى: جاستار كوزقاراسى» اتتى تاقىرىپتا دوڭگەلەك ۇستەل ءوتتى.
بۇگىنگى تاڭدا الەمدە ءدىني ەكسترەميزم مەن تەرروريزم ماسەلەلەرى وزەكتى سانالىپ وتىر. شىرماۋىقتاي شىرمالعان دۇنيەدەن شىعۋ دا وڭاي ەمەس. ەل قاۋىپسىزدىگىنە قاۋىپ توندىرەتىن جات اعىمدارعا ەسىكتى بەكىتىپ ۇستاۋ قاجەت. ونىڭ كەڭ تارالماۋىنىڭ ءتيىمدى ءبىر جولى – اقپاراتتىق-ناسيحاتتىق جۇمىستاردى كەڭىرەك جۇرگىزۋ. اسىرەسە, جاستار اراسىندا.
وسى ماقساتتا وتكىزىلگەن ءماجىلىستىڭ ءمانى دە وزگەشە بولدى. ەلورداداعى جوعارى ءبىلىمدى وقۋ ورىندارىنىڭ وكىلدەرى, تەولوگتار, قوعامدىق ۇيىمداردىڭ قىزمەتكەرلەرى ءدىني قۇندىلىقتار جونىندە ساليقالى ءسوز ءوربىتتى. ءدىني مامانداردىڭ پاراساتتى پىكىرلەرى تىڭدالدى. جاستار دا ءوز ويلارىن جەتكىزدى.
– جاستار – ەلىمىزدىڭ ەرتەڭگى قاناتى. ولاردىڭ الاڭسىز ءبىلىم الىپ, ازامات بولعانىن قالايمىز. ءتۇرلى ءدىني جات اعىمدارعا اربالماسا ەكەن دەيمىز. سوندىقتان باس قالاداعى جوعارى وقۋ ورىندارىندا ءبىلىم الىپ جاتقان بەدەلدى, ايتار ويى بار, وزات جاستاردى جيناپ, ءدىني ماسەلەلەر جايىندا ءسوز قوزعادىق. ولاردان كوپ ءۇمىت كۇتەمىز. العىر جاستار ءوز زامانداستارىنا ءدىني قۇندىلىقتار تۋرالى اڭگىمە ءوربىتىپ, اقپاراتتىق-ناسيحات جۇمىستارىن جۇرگىزبەك, – دەيدى ەلوردالىق ءدىن ىستەرى باسقارماسىنىڭ باسشىسى مىندەتىن اتقارۋشى نۇرداۋلەت المۇقانوۆ.
ازامات ەسەنجول
