جەڭىسكە جەتەلەگەن جىگەر

رەسەيدە ءوتىپ جاتقان الەم چەمپيوناتىندا بۇرناعى كۇنى 1-تۋردىڭ ويىندارى وينالىپ ءبىتتى. ال 20 ماۋسىمعا قاراعان ءتۇنى سانكت-پەتەربۋرگتە رەسەي مەن ەگيپەت اراسىنداعى كەزدەسۋمەن قۇرامالار كەلەسى تۋردىڭ ويىندارىنا كىرىسىپ كەتتى. ەسەپتى كەزەڭدە 5 ويىن وينالدى. بۇلاردىڭ اراسىندا سەنەگالدىڭ پولشانى 2:1 ەتىپ ۇتۋى ءتۋرنيردىڭ كۇتپەگەن ناتيجەلەرى قاتارىنا جاتادى. ال رەسەي ەگيپەتتى 3:1 ەتىپ تىزە بۇكتىرۋى ارقىلى كەلەسى كەزەڭگە شىعۋدىڭ بەرىك نەگىزىن قالادى.

ماۋسىمنىڭ 19-ى كۇنى ۆولگوگرادتا تۋنيس جانە انگليا قۇرامالارى كەزدەستى. بۇل ەسەپتى كەزەڭدەگى ەڭ قىزىقتى ماتچتاردىڭ ءبىرى بولدى. وندا «فۋتبول وتانىنىڭ» ۇلاندارى بارىنشا باسىم وينادى. الايدا اعىلشىندار وزدەرىنىڭ وسى ارتىقشىلىقتارىن ونشالىقتى ءتيىمدى پايدالانا المادى. سوندىقتان ۇشىراسۋدىڭ سوڭعى مينۋتىنا دەيىن تابلوداعى ەسەپ 1:1 بولىپ تۇردى. دەگەنمەن كەزدەسۋدىڭ اقىرىنا دەيىن جەڭىستەن ۇمىتتەرىن ۇزبەگەن البيون جىگىتتەرى سول دەگەندەرىنە جەتتى.

اعىلشىندار ويىندى وتە قارقىندى باستادى. ولار 2-مينۋتتا-اق ەسەپ اشىپ كەتۋگە ءسال قالدى. بريتانيالىقتاردىڭ قارسى قاقپاعا قاراي لەكىتە جاساعان شاپپا-شاپ شابۋىلدارى قاۋىپتى بولا ءتۇستى. الدىمەن دەلە اللي قاپتالدان سۋىرىلىپ شىعىپ, قارسى قاقپاعا سولقىلداتا دوپ ۇردى. بىراق ونىسى قورعاۋشىلاردىڭ ءبىرىن جاناپ ءوتىپ, اۋتقا كەتتى. بۇدان كەيىن بەرىلگەن بۇرىشتاما دوبىن گارري ماگۋاير باسپەن سوعىپ, ماڭدايشا جانىنان جىبەردى. ارادا ءبىر مينۋت وتكەندە, راحيم ستەرلينگ باعان تۇبىندە دجەسسي لينگاردتان العان دوبىن ۇتىمدى پايدالانا الماي قالدى.

مىناداي جويقىن قىسىمدى تۋنيستىك گولكيپەر مۋە اسسەننىڭ جۇيكەسى كوتەرە المادى. سول سەبەپتى 16-مينۋتتا ونى فارۋك بەن-مۋستافامەن الماستىرۋعا تۋرا كەلدى. بۇعان دەيىن ول ءبىر دوپ جىبەرىپ تە العان ەدى. گول 11-مينۋتتا سالىندى. اۋەلى دجوردان حەندەرسون الىستان جۇگىرىپ كەلىپ, دوپتى قاقپاعا قاراي جونەلتتى. مۇنىڭ سوڭى بۇرىشتاماعا اپاردى. ال ستاندارتتى جاعدايدا بەرىلگەن دوپتى دجون ستوۋنز قاقىراتا سوقتى. ونى داربازاشى قايتارعانىمەن, تىم الىسقا ۇزاتا المادى. سول ساتتە دوپقا بۇرىن جەتكەن حارري كەين ەسەپ اشىپ ۇلگەردى.

تۋرنير تابلوسى

I تۋر

18 ماۋسىم
سوچي. بەلگيا – پاناما 3:0

گولدار: دريس مەرتەنس (47), رومەلۋ لۋكاكۋ (69, 75)

19 ماۋسىم

ۆولگوگراد. تۋنيس – انگليا 1:2

گولدار: فەرۋدجاني ساسسي (35, پەنالتي) – حارري كەين (11, 90+1) سارانسك.

كولۋمبيا – جاپونيا 1:2

گولدار: حۋان كينتەرو (39) – سيندزي كاگاۆا (6, پەنالتي), يۋيا وساكا (73) ماسكەۋ, «سپارتاك».

پولشا – سەنەگال 1:2

گولدار: گجەگوج كرىحوۆياك (86) – تياگو سيونەك (37, اۆتوگول), م’بايە نيانگ (60)

II تۋر

20 ماۋسىم

سانكت-پەتەربۋرگ. رەسەي – ەگيپەت 3:1

گولدار: احمەد فاتحي (47, اۆتوگول), دەنيس چەرىشەۆ (59), ارتيوم دزيۋبا (62 (3:0) – موحامەد سالاح (73, پەنالتي)

اعىلشىندار گول سوققاننان كەيىن ءبىرشاما باسىلىپ قالعانداي كورىندى. بىراق احۋالدى باقىلاۋدا ۇستاۋىن توقتاتقان جوق. ولار قارسىلاستارىنىڭ ويىن جۇيەسىن وقتىن-وقتىن بۇزىپ تۇرۋىن جالعاستىرا بەردى. انگليالىقتار قاپتالدان قۇيعىتىپ كەلىپ, قاقپا ماڭىندا دۇربەلەڭ تۋعىزۋدى جيىلەتە باستادى. ال تۋنيستىكتەر ارا-تۇرا قارسى شابۋىل جاساۋعا كوشتى. سولاردىڭ بىرىندە اعىلشىن قورعاۋشىسى كايل ۋوكەر قارسىلاسىن شىنتاعىمەن قاعىپ ءتۇسىردى. كولۋمبيالىق تورەشى ۆيلمار رولدان سوزگە كەلمەستەن بىردەن پەنالتي بەلگىلەدى. ونى 35-مينۋتتا فەردجاني ساسسي قاقپا تورىنان شىعاردى. ءسويتىپ, كۇتپەگەن جەردەن ەسەپ تەڭەسىپ كەتتى.

الاڭداعى ويىن بولسا ءبىر جاقتى اعىلشىنداردىڭ قولىندا ەدى. سودان بولار-اۋ, احۋالدىڭ بۇلايشا وزگەرىپ كەتۋى ولاردى باسىندا ءبىراز ابىرجىتىپ تاستادى. وسىدان بارىپ, تاعى بىرنەشە قارسى شابۋىلدىڭ ورىن الۋىنا جول بەرىپ قويدى. سول جوڭكىلىستەر ماۋرىتىندە تۋنيستىك ۆاحبي حازري ءتىپتى تارازى باسىن ءوز كومانداسىنا قاراي اۋدارىپ كەتە جازدادى. بىراق كوپ ۇزاماي انگليا فۋتبولشىلارى ءوز-وزدەرىنە كەلىپ, ماتچتىڭ تاعدىرىن شەشۋدىڭ قامىنا قايتا كىرىستى. ادەتتەگىشە, ستەرلينگ قاپتالدان العا قاراي زۋلادى. ونى جولاي قارسى جاق قاعىپ قۇلاتتى. سودان سوڭ بەرىلگەن دوپتى قاقپا الاڭىندا ستەرلينگ شالقالاي ۇرىپ, قاقپاعا باعىتتاپ ەدى, ارەكەتى بوسقا كەتتى. سالدەن كەيىن ونىڭ كەمشىلىگىن ستوۋنز تا قايتالادى. ال تۋنيستىكتەردىڭ ەندى العا ۇمتىلۋعا مۇرشالارى دا كەلمەي قالدى.

الاڭداعى بۇل كورىنىس ەكىنشى تايمدا دا كوپ وزگەرمەدى. اعىلشىندار تاعى كەڭ اۋقىمدا شابۋىلعا كوشتى. افريكالىقتار مۇنى پرەسسينگ جاساۋ ارقىلى زالالسىز ەتۋگە كۇش سالدى. سونداي تەكەتىرەس مەزەتتەرىنىڭ بىرىندە كەين قاقپا الاڭى ىشىندە شالىپ قۇلاتىلدى. بىراق اربيتر بۇل ءۇشىن 11 مەترلىك بەلگىلەۋگە تاۋەكەل ەتە المادى. مۇنىڭ ەسەسىنە, حارري ءوزىنىڭ ويىنداعى كەلەسى دوبىن تارتىس ۇستىندە سالدى. بۇل كەزدە كەزدەسۋدىڭ نەگىزگى ۋاقىتى ءبىتىپ, قوسىمشا ءبىرىنشى مينۋت ءجۇرىپ جاتىر ەدى. گول بۇرىشتامادان دوپ بەرىلگەننەن كەيىن سوعىلدى. ونى ماگۋاير جەتكىزدى. ال كەين اياعىنا دوپ تيىسىمەن قاقپاعا قاراي قاتتى ۇردى. بۇعان تۋنيستىك قاقپاشى توسقاۋىل قويا الماي قالدى. ءسويتىپ, اعىلشىندار ەڭ سوڭعى ساتتە ەسەپتى 2:1-گە جەتكىزىپ, جەڭىس بيىگىنەن تابىلدى.

قىسقا-نۇسقا

* ماۋسىمنىڭ 20-سىنا دەيىن چەمپيوناتتا 17 ماتچ وينالدى.

* بۇل ويىنداردا ەڭ كوپ كەز دەسكەن ەسەپ – 1:0. ول 6 رەت تىركەلدى.

* 17 ماتچتا 42 گول سوعىلدى. سوندا ءار ماتچقا ورتا ەسەپپەن 2,47 دوپتان كەلىپ تۇر.

* وسى ارالىقتا 1 فۋتبولشى الاڭنان قۋىلىپ, 52 فۋتبولشى ەسكەرتۋ الدى.

* 17 ماتچتى 811970 ادام تاماشالادى. بۇل – ءار كەزدەسۋدە ورتا ەسەپپەن 47790 كورەرمەن بولدى دەگەن ءسوز.

* جانكۇيەرلەر «لۋجنيكيدە» وتكەن رەسەي – ساۋد ارابياسى, گەرمانيا – مەكسيكا اراسىنداعى ويىندارعا ەڭ كوپ جينالدى. ولارعا 78011 ادام كەلدى.

* ەڭ از كورەرمەن ەكاتەرينبۋرگتە وتكەن ەگيپەت – ۋرۋگۆاي اراسىنداعى كەزدەسۋدە تىركەلدى. بۇل ويىندى ستاديوندا 27015 ادام كوردى.

* وسى كەزگە دەيىن 10 پەنالتي بەلگىلەنىپ, ولاردىڭ 8-ءى قاقپاعا ءتۇستى.

* چەمپيوناتتا 1 حەت-تريك, 4 دۋبل جاسالدى, 5 اۆتوگول سوعىلدى.

سەرىك ءپىرنازار