جاقىندا نۇر-سۇلتان قالاسى قوعامدىق كەڭەسىنىڭ جاڭا قۇرامى بەكىتىلىپ, جۇمىسىنا كىرىسىپ تە كەتتى. وعان بۇرىنعى قۇرامنان ەكى-اق ادام ءوتتى. سونىڭ ءبىرى مارات ءمۇستافيندى ەلوردانىڭ تىنىس-تىرشىلىگىنە سەرگەك قارايتىن بەلسەندى ازامات رەتىندە جاقسى بىلەمىز. قوعامدىق كەڭەستەردىڭ تاريحى باستالعان 2016 جىلدان بەرى گازەت ءتىلشىسى رەتىندە وتىرىستارىنا قاتىسىپ ءجۇرىپ, ەسىمىن ءجيى تىلگە تيەك ەتەتىن ەدىك. ونىڭ سەبەبى مارات كارىمۇلى باس قالا مەن شاھار تۇرعىندارىنا تىكەلەي قاتىسى بار اسا ماڭىزدى, وزەكتى ماسەلەلەر تالقىلانعاندا ءۇنسىز قالمايتىن. ءسوزىمىز جالاڭ بولماسىن, بىرنەشە دەرەكتى دە كەلتىرە كەتەيىك.
ەلوردانىڭ بايقوڭىر اۋدانىنىڭ قۇرىلعانىنا ءتورت جىل عانا بولدى. مارات مۇستافين بىلتىر كوكتەمدە وسى اۋدانعا قارايتىن «كيرپيچنىي» تۇرعىن الابىنداعى وتباسىلىق-دارىگەرلىك امبۋلاتوريانى جوندەۋ ماسەلەسىن كوتەردى. اقىرى ماسەلە وڭ شەشىلدى. مارات كارىمۇلى شاھاردىڭ شەتكى ايماقتارىن اباتتاندىرۋ ماسەلەسىنە دە جاۋاپتى مەكەمەلەردىڭ نازارىن ءجيى اۋداراتىن. ءۇش جىل بۇرىن ونوماستيكا ماسەلەلەرىنە ارنالعان وتىرىستا باس قالادا كورنەكتى مەملەكەت قايراتكەرى جۇمابەك تاشەنەۆكە ەسكەرتكىش ورناتۋ كەرەكتىگىن ايتتى. ءسويتىپ كوپتىڭ كوكەيىندەگى ماسەلەنى ءدوپ باستى. وتكەن جىلى جۇمابەك احمەتۇلىنىڭ ەسكەرتكىشى ەلوردادا بوي كوتەرگەنىنەن جۇرت حاباردار بولۋى كەرەك.
مارات كارىمۇلى قالانىڭ قوعامدىق كەڭەسىنىڭ جاڭا قۇرامىندا دا بەلسەندىلىگىنەن جاڭىلمايتىنىنا سەنىمدىمىز. ماسەلەن, جۋىردا «جەمقورلىققا قارسى ستراتەگيانى جۇزەگە اسىرۋ – پرەزيدەنت جولداۋىنان شىعاتىن ماڭىزدى مىندەت» تاقىرىبىندا دوڭگەلەك ۇستەل ءماجىلىسى ۇيىمداستىرىلدى. سوندا ءسوز سويلەگەن كەيىپكەرىمىز الەۋمەتتىك زەرتتەۋلەر ناتيجەسىنە سۇيەنىپ, مەملەكەتتىك مەكەمەلەردەگى جەمقورلىق فاكتىلەردى اشكەرەلەگەندەي بولدى.
مارات مۇستافين قوعامدىق كەڭەستىڭ ەنەرگيا تيىمدىلىگى, تۇرعىن ءۇي-كوممۋنالدىق شارۋاشىلىق, قۇرىلىس جانە ەكولوگيا ماسەلەلەرى جونىندەگى كوميسسيانىڭ مۇشەسى. بۇل – جانىنا ەتەنە جاقىن سالالار. وسىدان جارتى عاسىردان استام ۋاقىت بۇرىن ون جىلدىقتى ۇزدىك بىتىرگەن ول قازاق حيميا-تەحنولوگيا ينستيتۋتىنىڭ ينجەنەرلىك-قۇرىلىس فاكۋلتەتىن ءبىتىردى. قولىنا ديپلومىن الا سالاسىمەن, «تۋعان جەرگە تۋىڭ تىك» دەمەكشى, ءوزىن تۇلەتىپ ۇشىرعان قاسيەتتى تورعاي توپىراعىنا قايتىپ ورالىپ, ەلىنە قىزمەت ەتۋدى باستادى.
بۇل ۋاقىتتا تورعاي وبلىسىنىڭ قۇرىلعانىنا كوپ بولا قويماعان. جيىرما جاستان جاڭا اسىپ, جاستىق جىگەرى جالىنداپ تۇرعان جىگىت ەسىل قالاسىنداعى كەرامزيت-بەتون بۇيىمدارى زاۋىتىندا ەڭبەك جولىن باستاپ, شەبەر بولىپ جۇمىسقا ورنالاستى. ءارى قاراي تسەح باستىعى, زاۋىتتىڭ باس تەحنولوگى قىزمەتتەرىنە كوتەرىلدى. ارادا ەسىل اۋداندىق پارتيا كوميتەتىنىڭ ونەركاسىپ-كولىك ءبولىمىنىڭ مەڭگەرۋشىسى بولىپ قىزمەت ىستەپ, ءوزىن تاجىريبەلى مامان رەتىندە قالىپتاستىرعان زاۋىتقا ديرەكتور بولىپ تاعايىندالدى.
مارات كارىمۇلىنىڭ كىندىك قانى جانگەلدين اۋدانىنىڭ اقكول اۋىلىنىڭ توپىراعىنا تامدى. بۇل توپىراقتا بيىل 150 جىلدىق مەرەيتويى ەل كولەمىندە عانا ەمەس, يۋنەسكو دەڭگەيىندە اتاپ وتىلەتىن ۇلت ۇستازى احمەت بايتۇرسىنۇلى دۇنيەگە كەلدى.
مارات مۇستافين دا ۇلاعاتتى ۇستازداردىڭ شاڭىراعىندا تۋدى. اكەسى كارىم مەن اناسى ءنابيرا سول وڭىردەن شىققان تالاي ازاماتتاردى ءبىلىم نارىمەن سۋسىنداتىپ, تاربيەلەدى. ەلگە قىزمەت ەتىپ, ابىرويعا كەنەلدى. سونداي ونەگەلى وتباسىندا تۋعان مارات كارىمۇلى دا ۇيادا كورگەنىن ىستەپ كەلە جاتىر. تورعاي وبلىسى ءبىر جابىلىپ قالىپ, وتكەن عاسىردىڭ توقسانىنشى جىلدارى قايتا اشىلعاندا مارات اعامىز ارقالىق قالاسىنا اكىم بولدى. 1997-2014 جىلدار ارالىعىندا قازاقستان رەسپۋبليكاسىنىڭ تورعاي, اقمولا وبلىستارى بويىنشا باعا جانە مونوپولياعا قارسى ساياسات كوميتەتتەرىنىڭ, تابيعي مونوپوليالاردى رەتتەۋ, باسەكەنى قورعاۋ جانە شاعىن كاسىپكەرلىكتى قولداۋ اگەنتتىگى دەپارتامەنتىنىڭ توراعاسى, اگەنتتىكتىڭ سولتۇستىك قازاقستان وبلىسى بويىنشا دەپارتامەنت باسشىسى بولىپ قىزمەت اتقاردى.
2014 جىلدان 2016 جىلعا دەيىن قازاقستان رەسپۋبليكاسى ۇلتتىق ەكونوميكا مينيسترلىگىنىڭ تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتىنىڭ استانا قالاسى بويىنشا دەپارتامەنتىنىڭ باسشىسى قىزمەتىن اتقاردى. سول 2016 جىلدان بەرى نۇر-سۇلتان قالاسى قوعامدىق كەڭەسىنىڭ مۇشەسى بولىپ ۇزبەي سايلانىپ كەلە جاتىر.
وسى كۇندەرى مارات كارىمۇلى مەرەيلى جەتپىس جاستىڭ جوتاسىنا شىعىپ جاتىر. زەينەتكەرمىن عوي دەپ قول قۋسىرىپ وتىرعان جوق. جىگەرىن جوعالتپادى. جوعارىدا جازعانىمىزداي, قالالىق قوعامدىق كەڭەس مۇشەسى جانە «TSM Logistics» تاسىمالداۋ پروتسەسىنە قاتىسۋشىلار قاۋىمداستىعى» زتب ۆيتسە-پرەزيدەنتى.
الماتى ەكونوميكا جانە ستاتيستيكا ينستيتۋتىنىڭ «ەكونوميكا» فاكۋلتەتىن سىرتتاي ءبىتىردى. اقش (ۆاشينگتون, اريزونا شتاتى) جانە ۇلىبريتانيا (لوندون) ەلدەرىندە باسقارۋشىلىقتى جەتىلدىرۋ ورتالىقتارىندا ءبىلىم الدى.
ۇزاق جىلعى ەڭبەگى باعالانىپ, «قۇرمەت» وردەنىمەن جانە كوپتەگەن مەدالدارمەن ماراپاتتالدى. 2008 جىلى سولتۇستىك قازاقستان وبلىسى بويىنشا «جىل ادامى» اتاندى. اقش-تىڭ اريزونا شتاتىنداعى تۋسون قالاسىنىڭ (1995 ج.) جانە ارقالىق قالاسىنىڭ (2002 ج.) «قۇرمەتتى ازاماتى». بىرنەشە رەت تسەلينوگراد, تورعاي وبلىستارى جانە ەسىل اۋدانى كەڭەستەرىنىڭ دەپۋتاتى بولىپ سايلاندى. جاقىندا مەرەيتويىنىڭ الدىندا وعان ەسىل اۋدانىنىڭ «قۇرمەتتى ازاماتى» اتاعى دا بەرىلدى.
مارات ءمۇستافيننىڭ اكەسى كارىم عاسىر جاسادى. كەزىندە جانگەلدين اۋدانىنا رەسمي ىسساپارمەن بارعان قازاقستاننىڭ تۇڭعىش پرەزيدەنتى نۇرسۇلتان نازارباەۆقا باتاسىن بەرگەن اقساقالدىڭ 100 جاسقا تولۋ قۇرمەتىنە 2010 جىلى بۇكىل تورعاي ەلى ات شاپتىرىپ, توي جاسادى.
مارات كارىمۇلى جارى گۇلنار مالعاجدارقىزىمەن بىرگە ءۇش بالا ءوسىرىپ, تاربيەلەدى. قازىر ءۇش پەرزەنتى دە ومىردەن ءوز جولدارىن تاۋىپ, اتا-اناسىنا نەمەرە ءسۇيدىرىپ وتىر. مارات كارىمۇلىن مەرەيتويىمەن قۇتتىقتاپ, شوبەرە, شوپشەك كورىڭىز دەيمىز.
