[wppa type=»slideonly» album=»23″ size=»auto»][/wppa]
قازاقستاندا شەتەلدىڭ تاجىريبەسى جۇزەگە اسىرىلىپ, جول جانە پاترۋلدىك پوليتسيانىڭ ساپتىق بولىمشەلەرى بىرىكتىرىلدى. ەندى امبەباپ پوليتسەيلەر كوشە بۇزاقىلارىن تىزگىندەپ, اۋزىنا اششى سۋ تيسە, كۇش كورسەتۋگە ءازىر تۇراتىن تەنتەكتەردى جونگە سالۋعا, جول قوزعالىسى ەرەجەسى مەن قوعامدىق ءتارتىپتى بۇزعانداردى ۇستاپ, جازالاۋعا, ءسويتىپ, ءوز مۇمكىندىكتەرىن بارىنشا سارقا پايدالانۋعا كۇش سالۋدا. نەگىزىنەن, بۇل – قازاقستاندىق پوليتسيا قىزمەتكەرلەرىنىڭ جۇمىس تيىمدىلىگىن ارتتىرۋعا باعىتتالعان جوسپارلى دا جۇيەلى قولعا الىنعان ءىس-شارالار. ونىڭ بەرەرى قانداي, ەلىمىزدەگى قىلمىستى ازايتىپ, جول-كولىك وقيعالارىنىڭ الدىن الۋعا, كوشەلەردەگى كەلەڭسىزدىكتەر مەن ءتارتىپ بۇزۋشىلىقتى ازايتۋعا مۇمكىندىك بەرە مە؟ ارينە, بۇل ساۋالدارعا ۋاقىت تورەشى.
وسى جىلدىڭ قاراشا ايىنان باستاپ, ەلوردا ىشكى ىستەر ورگاندارىنا دا «امبەباپ پوليتسەي» جاڭا جۇمىس جۇيەسى ەنگىزىلىپ, پاترۋلدىك پوليتسيا جول پوليتسياسىمەن قوسىلعان بولاتىن. ىسكە كىرىسكەنىنە ءبىر ايدان استام ۋاقىت وتكەن باس قالاداعى جاڭا قۇرىلىمنىڭ جۇمىسىمەن جاقىنىراق تانىسۋدى ءجون كوردىك.
جۇمىستاعى باستى ۇستانىم – كىشىپەيىلدىك
استانا قالاسى ىشكى ىستەر دەپارتامەنتى جول-پاترۋلدىك پوليتسياسى پولكىنىڭ باس شتابى ن.تىلەنديەۆ داڭعىلىنىڭ بويىندا ورنالاسىپتى. الدىن الا ۋاعدالاسقانىمىزداي, ءبىزدى مۇندا شتاب باستىعى, پوليتسيا مايورى باقىتجان بيداحمەتوۆ قارسى الدى. ءبىز بارعان كەزدە پولك اۋىسىمدىق الماسۋ, كەشكى قىزمەت مىندەتتەرىن ءبولۋ ءۇشىن ساپقا تۇرعىزىلعان ەكەن.
كەزەكتى تۇگەندەۋدەن كەيىن باقىتجان جۇماحانۇلى قىزمەتكەرلەرگە قاراپ بىلاي دەدى:
– قۇرمەتتى ارىپتەستەر! سىزدەر قازىر كەزەكتى قىزمەتتەرىڭىزدى اتقارۋعا كىرىسەسىزدەر. بىزگە قوعامنىڭ ارتىپ وتىرعان جۇگى اۋىر. جۇمىس كەزىندە سىزدەر قوعامدىق ورىنداردا ىشىمدىك ىشكەندەردى تارتىپكە شاقىرۋ, ۇساق بۇزاقىلىقتار جاساۋ مەن قۇجاتى جوق قاڭعىباستاردى قابىلداۋ-رەتتەۋ ورىندارىنا جەتكىزۋ, اتىس, سۋىق قارۋلاردى زاڭسىز تاسىمالداۋ فاكتىلەرىنە توسقاۋىل قوياسىزدار. سونىمەن قاتار, جول قوزعالىسىن, كوشە قيىلىستارىندا كەپتەلىستەر تۋىنداعان جاعدايدا ونى رەتتەۋ ماسەلەلەرى دە سىزدەردىڭ مىندەتتەرىڭىزدە. اسىرەسە, وتباسىلىق الەۋمەتتىك-تۇرمىستىق جانجالداردا وتە مۇقيات بولىڭىزدار. ءبىزدىڭ جۇمىسىمىزداعى ەڭ باستى ەرەكشەلىك – ادامدارعا كىشىپەيىلدىلىك تانىتىپ, ولارمەن بارىنشا ءتىل تابىسا ءبىلۋ. كەز كەلگەن جاعدايدا وقيعانىڭ ءوربۋ بارىسىن ورتالىق شتابقا مالىمدەپ, اقىلداسا ارەكەت ەتۋ قاجەت.
وسىدان كەيىن ءار ەكيپاج ءوز ماشينالارىنىڭ جانىنا كەلىپ, تۇنگى كەزەكشىلىكتى اتقارۋعا دايىن ەكەندىكتەرىن باياندادى دا جۇمىسقا اتتانىپ كەتتى.
مۇندا تاۋلىك بويى ءۇش ءجۇز ەلۋ قىزمەتكەر كەزەكشىلىك اتقارادى ەكەن. ءار قىزمەتكەرگە ارناۋلى جەتوندار مەن «جول-پاترۋلدىك پوليتسياسى» دەگەن جازۋى بار كەۋدەشەلەر بەرىلىپتى. سونداي-اق, كيىمدەرىنىڭ جەڭدەرىنە جاڭادان بەكىتىلگەن ۇلگىگە سايكەس ايىرىقشا بەلگى (شەۆرون) تاعىلىپتى.
اۆتوكولىكتەرى دە گرافيكالىق سىزبالارى مەن بۇيىرىندەگى جازۋلارىن اكىمشىلىك پوليتسيانىڭ ساپتىق بولىنىستەرى اتاۋلارىنا سايكەستەندىرىپ, بۇرىنعى «جول پوليتسياسى» جانە «پاترۋلدىك پوليتسيا» جازۋلارىن «جول-پاترۋلدىك پوليتسياسى» دەگەن جازۋعا اۋىستىرىپتى.
جول-پاترۋلدىك پولكىنىڭ شتاب باستىعى باقىتجان بيداحمەتوۆتىڭ ايتۋىنشا, پاترۋلدىك جانە جول پوليتسياسى بولىمشەسىن بىرىكتىرۋ ارقىلى قالادا پاترۋلدىك جانە جول پوليتسيا قىزمەتكەرلەرى قوعامدىق ءتارتىپ پەن جول قاۋىپسىزدىگىن قامتاماسىز ەتۋگە قاتىستى وزدەرىنە جۇكتەلگەن امبەباپ مىندەتتەردى ويداعىداي جۇزەگە اسىرىپ كەلە جاتقان كورىنەدى. سونداي-اق, ولارعا بۇرىنعىداي قالادان تىسقارى جەرلەردەگى كۇرە جولداردا جول قاۋىپسىزدىگىن ساقتاۋ باسىمدىعى بەرىلگەن. ەكىنشىدەن, قىزمەتتى اتقارۋدىڭ جاڭا تۇرىنە كوشۋ بارىسىندا قىزمەتكەرلەرگە ارناۋلى جاتتىعۋدان ءوتۋ قاراستىرىلعان. اتاپ ايتقاندا, ولار جاڭا جاعدايدا جۇمىستى ۇيىمداستىرۋ تاسىلدەرىن ۇيرەنىپ, اكىمشىلىك زاڭدىلىق نورمالارىن مەڭگەرۋدە. ول دەگەنىمىز – قوعامدىق ءتارتىپ پەن جول قوزعالىسى ەرەجەسىن بۇزعان ادامدارعا قاتىستى اكىمشىلىك حاتتاما تولتىرۋدى, كولىك قۇرال-دارىن (ۆ جانە س) ساناتىنا سايكەس باسقارۋدى ۇيرەنۋ. بۇعان قوسا, قازىرگى كۇنى جاڭا قۇرىلىم – بارلىق جول-پاترۋلدىك بولىمشە قىزمەتكەرلەرىن تەحنيكالىق جاعىنان (بەينەجازۋ قۇرالدارىمەن, قۇقىق بۇزۋشىلىقتى, حالىقارالىق جانە قالاارالىق اۆتوبۋس جۇرگىزۋشىلەرىنىڭ ەڭبەك ءتارتىبى مەن دەمالۋ جاعدايىن انىقتايتىن اۆتوماتتى قوندىرعىلارمەن) جاراقتاندىرۋ ماسەلەسى قارالۋدا.
ءبىر ەرەكشەلىگى, ادەتتەگىدەي جول جانە پاترۋلدىك پوليتسيا قىزمەتكەرلەرىنىڭ جۇمىسىن حابارلامالار مەن دابىل اتاۋلىنىڭ بارلىعى تۇسەتىن جەدەل باسقارۋ ورتالىعى ۇيلەستىرىپ وتىرادى. ءاربىر جول جانە پاترۋلدىك پوليتسيا بولىمشەسى ارنايى دابىل بەرگىش راديومەن كەز كەلگەن جول-كولىك وقيعاسىنا قاتىستى ماسەلەلەردى وتە جىلدام ءارى زاڭدىق تۇرعىدان انىقتاۋعا مۇمكىندىك بەرەتىن وسى زامانعى تەحنيكالىق قۇرال-جابدىقتارمەن قامتاماسىز ەتىلەدى. امبەباپ پوليتسەيلەرگە قويىلاتىن تالاپ تا ايرىقشا. ەڭ باستىسى, بۇل بولىمشە قىزمەتكەرلەرىنىڭ فورمالىق كيىمى كۇندەلىكتى جۇمىستا ىڭعايلى ءارى بىردەن ايشىقتالىپ تۇراتىن بولۋى ءتيىس. ويتكەنى, جول-پاترۋلدىك پوليتسيانىڭ الدىنا قويىلاتىن باستى مىندەت – قوعامدىق ءتارتىپتى قاداعالاۋ, قوعامدىق قاۋىپسىزدىكتى جانە جول قاۋىپسىزدىگىن ساقتاۋ.
«رەكستىڭ» شابۋىلىنان قورعانۋ
قالاداعى №2 تىرەك پۋنكتىنىڭ «يرگيز-21» جول-پاترۋلدىك پوليتسەيى قۇرامىندا اعا لەيتەنانت مىقتىبەك بەكتەمىروۆ, جۇرگىزۋشى, اعا سەرجانت قارشىعا ساعىنوۆ, پوليتسيا ينسپەكتورى, سەرجانت قۋات ءتۇسىپوۆ بار امبەباپ پوليتسيا ەكيپاجى جولعا شىقتى.
ولاردىڭ باقىلايتىن اۋدانى س.سەيفۋللين, ش.ءۋاليحانوۆ, ءا.سەمبينوۆ, ب.بەيسەكباەۆ, كەنەسارى, اسانقايعى, ا.يمانوۆ كوشەلەرى مەن اباي داڭعىلىنىڭ بويى ەكەن. ءبىرىنشى اۋىسىم تاڭەرتەڭگى 7.00-دەن 19.00-گە دەيىن بولسا, ەكىنشى اۋىسىم 19.00-دەن تاڭعى 7.00-گە دەيىن قىزمەت اتقارادى.
مىنە, العاشقى جول قوزعالىسىن ەرەجەسىن ورەسكەل بۇزۋ فاكتىسىنە كەزىكتىك. بەيسەكباەۆ كوشەسىنىڭ بويىندا ەكى اۆتوماشينا جولدىڭ قارسى باعىتىنا شىعىپ كەتىپ, قاراما قارسى كەلە جاتقان «مەرسەدەس» اۆتوموبيلىنە كوز كورىنە اپاتتىق جاعداي تۋعىزدى. وسى ساتتە جول ەرەجەسىن بۇزۋشىلاردى ەكيپاج قىزمەتكەرلەرى دە توقتاتىپ ۇلگەردى.
ەكى جۇرگىزۋشى دە ينسپەكتوردىڭ بۇيرىعىنا باعىنىپ, جولدىڭ وڭ جاق جيەگىنە توقتادى. ءبىرىنشىسى – مەملەكەتتىك ءنومىرى 292 انا 01 «بمب» اۆتوماشيناسى بولسا, ەكىنشىسى – مەملەكەتتىك ءنومىرى 802 اع 01 «لادا لارگۋس» اۆتوماشيناسى. العاشقى ماشينانىڭ جۇرگىزۋشىسى 1988 جىلى تۋعان ازامات ۆ.زاپيكين قاتەلىگىن بىردەن مويىنداپ, قۇجاتتارىن ينسپەكتورعا ۇسىنىپ جاتقاندا, ەكىنشى ۆ.بوريسوۆيچ دەگەن جۇرگىزۋشى ءوزىنىڭ جول ەرەجەسىن ماجبۇرلىكتەن بۇزعانىن ايتىپ, اشۋ شاقىردى. الايدا, جول ينسپەكتورلارى قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكستىڭ 463-بابىنىڭ 3-تارماعى بويىنشا جول قوزعالىسى ەرەجەسىن بۇزعانىن وعان سابىرمەن ءتۇسىندىرىپ بەردى.
كەلەسى كەزەكتە باسقارۋ ورتالىعىنان اسانقايعى كوشەسىندەگى 67-ۇيدە ۇلكەن توبەت ءيتتىڭ بوسانىپ كەتىپ, كوشەدەگى جۇرگىنشىلەرگە قاۋىپ ءتوندىرىپ تۇرعاندىعى تۋرالى دابىل كەلىپ ءتۇستى. اۆتوپاترۋل باعىتتى بىردەن اتالعان مەكەنجايعا قاراي بۇردى. راسىندا دا, كىشىگىرىم تايىنشاداي سارعىل توبەت كوشە بويىندا «سايران سالىپ» ءجۇر. توپ جەتەكشىسى مىقتىبەك بەكتەمىروۆ كولىكتەن تۇسكەن بويدا قولىنا ۇستاعان قۇتىداعى سۇيىقتىقتى توبەتتىڭ بەتىنە شاشتى. توبەت قىڭسىلاپ بارىپ, تۇمسىعىن قارعا كومدى. سويتسەك, بۇل دەنساۋلىققا ەش زيانى جوق ۋاقىتشا دەنەنى دارمەنسىزدەندىرەتىن اششى قىزىل بۇرىشقا ۇقساس ءدارى ەكەن. مىقتىبەكتىڭ ايتۋىنشا, قىزمەت كەزىندە نەشە ءتۇرلى ادامدار كەزدەسەدى. ماسەلەن, تاياۋدا ءبىر مەيرامحانادا ىشىمدىكتىڭ بۋىنا ەسىرگەن ەكى توپ ءسال نارسەگە كەلىسە الماي قالىپ, جاپپاي توبەلەس شىعارعان كەزدە وسى مىقتىبەكتىڭ ەكيپاجىنا جەدەل دابىل ءتۇسىپتى.
«وقيعا ورنىنا كەلسەك, دىپ-دىرداي ەرەسەك ادامدار ءبىر-بىرىمەن جاعا جىرتىسىپ, جۇدىرىقتاسىپ ءجۇر. ايىرعانعا كونبەيدى. نە ىستەرگە كەرەك؟ وسى ءدارىنى قولدانۋعا تۋرا كەلدى. بەتتەرىنە شاشىپ كەلىپ جىبەرگەندە, التى ادام جان-جاققا دومالاپ ءتۇستى, قولدارىنا كىسەن سالىپ, ماشيناعا اپارىپ توعىتتىق. ايتپەسە, كۇش بەرمەس ەدى», – دەپ ەسىنە الادى ول.
مىنە, ەندى كوشەدە وتكەن-كەتكەن ادامدارعا ايبات شەككەن توبەت ءيتتى دە وسىلاي اۋىزدىقتاۋعا تۋرا كەلىپ تۇر. ءۇي يەسى گۇلستان قوجامقۇلوۆا شىعىپ ءيتىن «رەكس», «رەكس» دەپ شاقىرىپ, بۇعاۋلايمىن دەگەنشە, ءدارىنىڭ ۋىتى باسىلدى ما, الىپ توبەت اناداي جەردە تۇرعان مىقتىبەككە تاعى تاپ بەردى. بۇل جولى ەسەسىن جىبەرمەي قاۋىپ الماققا بەكىنگەن سەكىلدى. مىقتىبەك تە قولىنداعى جاڭاعى اششى ءدارىنى تاعى شاشىپ ۇلگەردى. يت قىڭسىلاپ, بەتىن قارعا كومدى.
اباي داڭعىلىندا ش.ءۋاليحانوۆ كوشەسى قيىلىسىنا جاقىن ماڭدا اۆتوكولىك قوزعالىسىنا ايتارلىقتاي كەدەرگى كەلتىرەتىن وقيعا ورىن الدى. كولىكتىڭ توقتاپ تۇرۋىنا تىيىم سالاتىن جول بەلگىسىنە قاراماستان, يەلەرى بىرنەشە ءاۆتوموبيلدى قاڭتارىپ كەتىپ قالعان. سونىڭ سالدارىنان ەداۋىر كەپتەلىس پايدا بولىپتى. اۆتوپاترۋل بىرنەشە جەڭىل ماشينانىڭ مەملەكەتتىك ءنومىرىن اعىتىپ الىپ, ماڭدايشا اينەگىنە جول ەرەجەسىن بۇزعانى ءۇشىن ايىپپۇلدى قايدا كەلىپ تولەيتىنى تۋرالى مەكەنجايى جازىلعان جازبا قالدىردى.
– ءيا, راس, مەن ءسابيىمدى بالاباقشادان الۋ ءۇشىن تەك بەس مينۋتقا عانا ماشينامدى قويىپ كەتكەنمىن, – دەپ اقتالدى قايتىپ ورالعان «مازدا» ءاۆتوموبيلىنىڭ جۇرگىزۋشىسى.
– بۇل جەردە ءسىزدىڭ قانشا ۋاقىتقا كەتكەنىڭىز ماڭىزدى ەمەس, ەڭ باستىسى, ءسىز جول قاۋىپسىزدىگىنە نۇقسان كەلتىرەتىن جول قوزعالىسى ەرەجەسىن ورەسكەل بۇزدىڭىز, – دەپ ينسپەكتور قۋات ءتۇسىپوۆ جۇرگىزۋشىنىڭ قاتەلىگىن دالەلدەپ بەردى.
ەندى ءبىر جول-كولىك وقيعاسىن جاساعان جۇرگىزۋشى جول-پاترۋل ماشيناسى جەتكەنشە جابىرلەنۋشىمەن ءوزارا بەيبىت كەلىسىمگە كەلگەن ەكەن. «ءبىز مۇنداي وزدەرى كەلىسكەن جاعدايدا حاتتاما تولتىرمايمىز. تەك, ەكى جۇرگىزۋشىنىڭ دە قۇجاتتارىن تەكسەرىپ, دۇرىس بولسا, جوندەرىنە جىبەرەمىز» دەپ ءتۇسىندىردى ءمان-جايدى مىقتىبەك بەكتەمىروۆ.
جول رەتتەۋشىگە دە شەبەرلىك قاجەت
بارلىق پاترۋلدەردىڭ قولىندا راتسيا. قىزمەتكەرلەر تۇندە كەزەكشىلىك اتقارعاندىقتان, ولارعا دابىل قاعۋ ءۇشىن مۇنداي قوندىرعى ابدەن قاجەت. ءتىپتى, دارحان سەمباەۆ اۆتومات تا اسىنىپ الىپتى. «وتكەن تۇندە تويدان شىققان ەكى ادامنىڭ ماشينالارىنان ەكى اتىس قارۋى تابىلدى. وسىنداي كەزدە ولار قولدارىنا اۆتومات ۇستاعان پوليتسەيدى كورسە, ارتىق ارەكەتكە بارماي, بۇيرىققا باعىنا باستايدى. باتىرعا دا جان كەرەك دەگەن. قانشا دەگەنمەن, اۆتوماتتىڭ ءتۇسى سۋىق كورىنەتىن بولسا كەرەك» دەيدى ول.
قازىر استانادا امبەباپ پوليتسەيلەر جاڭا ۇلگىدەگى توسبەلگىلەر مەن كيىمنىڭ جەڭىنە تاعاتىن شەۆروندارمەن جابدىقتالعان. ال, جەزلدەر تەك ۇتقىر ەكيپاجعا بەرىلەدى. ويتكەنى, ەرەجە بويىنشا امبەباپ پوليتسەيلەر جول بويىنداعى كۇزەت كەزىندە اۆتوموبيل جۇرگىزۋشىلەرىن توقتاتادى. كەيدە بۇيرىققا باعىنباي قاشاتىندار بار. ونداي كەزدە ءتيىستى اقپارات الداعى جاقىن ماڭداعى پوليتسياعا بەرىلەدى.
امانگەلدى يمانوۆ جانە شوقان ءۋاليحانوۆ كوشەلەرىنىڭ قيىلىسىنداعى باعدارشام ءوشىپ قالىپ, سول جەردەگى جول قوزعالىسىن رەتتەۋگە ارمان سارسەكوۆ ەسىمدى ينسپەكتور كەلدى. قيمىلى شيراق. ءاپ-ساتتە كوشە قيىلىسىندا كەپتەلىسكە ءتۇسىپ قالعان اۆتوموبيلدەردى باعىت-باعىتىمەن جوندەرىنە اتتاندىردى. اڭگىمەگە تارتتىق.
– بۇرىن پاترۋلدىك پوليتسيادا جۇمىس ىستەگەنمىن. وتكەن قىركۇيەك ايىندا ارناۋلى مەكتەپتە قايتا دايىندىقتان وتتىك. بولاشاق امبەباپ پوليتسەيلەر قاتارىندا قىزمەت اتقارعىسى كەلەتىندەردىڭ جۇرگىزۋشىلىك كۋالىگى بولۋى قاجەت. سونىمەن قاتار جول قوزعالىسى ەرەجەسىن بەس ساۋساقتاي ءبىلىپ, قول قيمىلىمەن كوشە قيىلىستارىنداعى اۆتوموبيل تاسقىنىنىڭ ءجۇرىسىن رەتتەۋگە داعدىلانۋ مىندەتتى. سونداي-اق, اۆتوموبيل جۇرگىزە ءبىلۋىڭ دە باستى نازارعا الىنادى. ءبارىن ءبىر كۇندە مەڭگەرىپ كەتتىم دەپ ايتا المايمىن. ءبىز جۇمىس بارىسىندا ءبىر-بىرىمىزدەن ۇيرەنەمىز, – دەيدى ول.
ماسەلەن, كەزەكشىلىككە شىققان ەكيپاج جول قوزعالىسى ەرەجەسىن بۇزۋشىنى توقتاتادى. وعان جىبەرگەن قاتەلىگى تۋرالى ءتۇسىندىرىپ, جول ينسپەكتورى حاتتاما تولتىرعان كەزدە بۇرىنعى پاترۋل قىزمەتكەرى ونى مۇقيات قاراپ تۇرىپ, قايتالايدى. كەيدە كەرىسىنشە دە بولادى. مىنە, تاجىريبە جۇزىندەگى ۇيرەنۋ ۇردىستەرى كۇن سايىن وسىلاي بىرتە-بىرتە قالىپتاسادى.
ءبىر بايقاعانىمىز, جۇمىستارىن اياقتاعاننان كەيىن امبەباپ پوليتسەيلەر ۇيلەرىنە قايتۋعا اسىقپايدى. ءبىر جارىم, ەكى ساعاتتاي كەپتەلىسكە ءتۇسىپ قالعان اۆتوكولىكتەردى قالاي دا تەزىرەك «تارقاتۋ» ءۇشىن رەتتەۋىشتىك ماشىققا جاتتىعادى. ال, شىن مانىندە ول دا ۇلكەن شەبەرلىكتى قاجەت ەتەتىن كۇردەلى جۇمىس.
مىنا قىزىقتى قاراڭىز, امبەباپ پوليتسەي كەيدە پەداگوگتىڭ دا رولىنە ەنىپ كەتەتىن جاعدايلار بولادى ەكەن. اعا سەرجانت دارحان سەمباەۆ كوشەنىڭ بەلگىلەنبەگەن جەرىنەن بەس-التى جاسار بالاسىمەن ءوتىپ بارا جاتقان كەلىنشەكتى توقتاتتى.
– جولدىڭ بەلگىلەنبەگەن جەرىنەن ءوتۋ ومىرىڭىزگە قاۋىپتى, ءسىز جول ەرەجەسىن ورەسكەل بۇزىپ تۇرسىز, – دەپ ەدى. كەلىنشەك بەت باقتىرمادى. «ەكى ءجۇز, ءۇش ءجۇز مەتر جەردەگى باعدارشامنان اينالىپ ءوتىپ جۇرۋگە ۋاقىتىم جوق. ونىڭ ۇستىنە جاقىن كەلە جاتقان كولىك تە كورىنبەيدى, نەسىنە مەنى توقتاتاسىز؟» – دەپ اشۋ شاقىردى.
ال دارحان بولسا, كەلىنشەكتى ەرەجەمەن تانىستىرىپ, ول ءوزىنىڭ عانا ەمەس, جاس بالاسىنىڭ دا ءومىرىن قاتەرگە تىگىپ تۇرعاندىعىن باسا ايتتى. بۇگىن اناسىمەن بىرگە جولدىڭ كەز كەلگەن جەرىنەن كەسىپ وتكەن ءسابي ەرتەڭ كوشەگە جالعىز شىعا قالسا, تاپ سولاي اناسىنىڭ قاتەلىگىن اينىتپاي قايتالارى ءسوزسىز. مىنە, وسىنى جول ينسپەكتورى اسىقپاي دالەلدەرمەن ءتۇسىندىرۋ ءۇشىن جارتى ساعات ۋاقىتىن سارپ ەتتى.
ايتا بەرسە, مۇنداي مىسالدار جەتىپ ارتىلادى. ءبىزدىڭ ماقساتىمىز – جاڭادان قوسىلعان ەكى قۇرىلىمنىڭ بىرىككەن جاڭا جۇمىسىنىڭ تىڭ بەتتەرىن كورسەتۋ ەدى. بۇنىڭ ءتۇپ توركىنى ەۋروپا ەلدەرىندە جاتىر. ولاردا جول پوليتسياسى نەمەسە پاترۋلدىك پوليتسيا دەگەن ۇعىم جوق. قازاقستان دا جاقسىنى قابىلداپ, گرۋزيانىڭ تاجىريبەسىن وزىنە پايدالانۋدى ءجون كوردى. ساراپشىلاردىڭ پىكىرىنشە, وسىنىڭ بارلىعى قايتكەن كۇندە سىبايلاس جەمقورلىققا توقتاۋ سالامىز دەگەن ىزدەنىستەن تۋعان يگى قادامدار.
بىرىكتىرىلگەن جول-پاترۋل پوليتسياسى پولكىندە 780 بىلىكتى مامان قىزمەتكەر بار. شتاب باستىعى باقىتجان بيداحمەتوۆتىڭ ايتۋىنشا, ىستەلىپ جاتقان جۇمىستىڭ بارلىعى دا قالاداعى قىلمىستى ازايتىپ, وتباسىلىق-تۇرمىستىق كيكىلجىڭدەردى باسۋعا, كامەلەتكە تولماعاندار مەن باسقا دا قىلمىستاردىڭ الدىن الۋعا باعىتتالعان. ءبىز وعان رەيد بارىسىندا تولىق كوز جەتكىزدىك.
تاڭاتار تولەۋعاليەۆ
