جالپى, ەلوردا مادەني شارالاردان كەندە ەمەس. كۇندە بولماسا دا كۇن ارالاتىپ دۋماندى, رۋحاني شارالاردان دەمالىپ, جايلانىپ قايتاتىن جۇرتتىڭ كوڭىلىنەن-اق ۇعاسىز مۇنى! دەسە دە, بيىل ەلوردانىڭ مادەنيەت سالاسىندا نەندەي ەلەۋلى وقيعالار, ەكشەۋلى تابىستار بولدى. جىلجىپ بارا جاتقان جىلان جىلىندا وسىعان از-كەم شولۋ جاسادىق.
[wppa type=»slideonly» album=»22″ size=»auto»][/wppa]
جاستار سارايى جاڭارادى
رەسمي مالىمەتكە سەنسەك, استانا قالاسى مادەنيەت باسقارماسىنا جەتپىسكە جۋىق مەكەمە مەن كاسىپورىن قارايدى ەكەن. ماماندار ماتەريالدىق تاريحي-مادەني قۇندىلىقتاردى تۇراقتى مەرزىمدىك تەكسەرۋدەن وتكىزىپ تۇرادى. بۇل شارانىڭ قورىتىندىسى قاعازعا قاتتالىپ قالماي, تاريح جانە مادەنيەت ەسكەرتكىشتەرىن قورعاۋ جونىندەگى قالالىق كوميسسيا وتىرىسىندا تالقىلاندى.
مۇراجاي جادىگەرلەرىن قالپىنا كەلتىرۋ جۇمىستارى دا ۇنەمى جالعاسىن تابۋدا. ءدال قازىرگى كەزدە رەسپۋبليكا داڭعىلىنىڭ بويىنداعى بايىرعى نىسانداردىڭ ءبىرى – جاستار سارايىنىڭ ساۋلەتى مەن قۇرىلىسىن جاڭعىرتۋعا دايىندىق شارالارى جۇرۋدە. ءحىح عاسىردىڭ سوڭىندا ىرگەسى قالانعان مۇسىلمان مەكتەبىنىڭ عيماراتى دا باسقارما نازارىنا ءىلىنىپتى. الداعى ەكى جىلدا تاريحي نىسان جاڭاشا رەڭككە ەنەدى دەپ سەندىرەدى مادەنيەت ماماندارى.
«يكوم قازاقستان» يگىلىگىمىزدى ەسەلەيدى
ەلوردانىڭ مۇراجايلارى جىلان جىلىندا 2844 شارا ۇيىمداستىرىپتى. ولاردى 342 مىڭعا تارتا كورەرمەن تاماشالاعان. مۇراجاي دەمەكشى, بيىلعى جاز ءبىزدىڭ مادەنيەتكە ۇلكەن سەرپىن اكەلگەنىن تاعى ايتىپ ماقتانساق, ايىپ بولماس. ماۋسىم ايىندا كۇللى قازاقتىڭ دالاسىن ات شاپتىرىم اۋماعىنا سىيدىرعان «اتامەكەن» ەتنو-مەموريالدىق كەشەنىندە «يكوم قازاقستان» حالىقارالىق مۇراجايلار كوميتەتى قۇرىلدى. جوبا اياسىندا ەل مۇراجايلارى ۇجىمدارىنا الەمدەگى ارىپتەستەرىمەن قويىن-قولتىق جۇمىس ىستەۋگە جول اشىلدى. ال مۇنداي قارىم-قاتىناس وسى سالاداعى الەۋەتىمىز بەن جەتىستىگىمىزدى ەسەلەي بەرەتىنىنە سەنىم مول.
ون توعىز پرەمەرا پەردەسىن ءتۇردى
اڭگىمە باعىتىن بارىمىزگە تانىس مەملەكەتتىك فيلارمونيانىڭ ساحناسىنا بۇرساق. بيىل ونداعى كوركەمونەرپازدار 451 كونتسەرت قويىپ, ەلىمىزدىڭ سەگىز ايماعىنا, جەتى رەت شەت مەملەكەتكە گاسترولدىك ساپارمەن شىعىپ قايتىپتى. ال, بىلتىر عانا اكادەميالىق مارتەبە العان قاللەكي تەاترىنىڭ ۇجىمى سەگىز پرەمەرانىڭ تۇساۋىن كەستى. تىزبەلەي سالۋدا قيىن ەمەس: «كۇن ساۋلەسى تۇسپەگەن», «قىز جىبەك», «تاڭعاجايىپ پلانەتا», «ءبىر كەم دۇنيە», «ۇكىلى جۇلدىز», «ابىلاي حاننىڭ ارمانى», «قوزى كورپەش – بايان سۇلۋ», «ءۇمىت»… ويتكەنى, اتىن اتاساق بولعانى, ءبارى دە كۇنى كەشەگىدەي كوز الدىمىزعا ورالا بەرەدى.
ماكسيم گوركي اتىنداعى اكادەميالىق ورىس دراما تەاترى دا بەس قويىلىمىنىڭ پرەمەراسىن وتكىزدى. «جاستار» تەاترى ەكى پرەمەراسىمەن ەسىمىزدە قالىپتى. العاشقىسى – 10 ناۋرىزدا وتكەن «كوك پەن جەردىڭ اراسى» قويىلىمى بولسا, كەيىنگىسى – جۋىردا عانا تانىستىرىلعان «اساۋعا تۇساۋ». «ناز» تەاترى جىلدىڭ باسىندا العاش رەت «مىڭ ءبىر ءتۇن» ەرتەگىسىن قويعان بولاتىن. قۋىرشاق تەاترىنىڭ ارتىستەرى دە «مەن سياقتى جاسا», «ماۋگلي», «انا قۇدىرەتى», «ارىستان پاتشا» سىندى سپەكتاكلدەرىن ساحنالاپ, شىعارماشىلىق ىزدەنىستە ەكەندىكتەرىن بايقاتتى. ايتپاقشى, وسى جىلى بەيبىتشىلىك جانە كەلىسىم سارايىندا وتكەن «جەرۇيىق» روك-وپەراسىنىڭ پرەمەراسىن تىڭ بەتبۇرىس دەي الامىز. جالپى سانعا جۇگىنسەك, ەلوردا تەاترلاردا جىل باسىنان بەرى 896 سپەكتاكل, ونىڭ ىشىندە 19 پرەمەرا وتكىزسە, ولاردى 260 مىڭ كورەرمەن تاماشالاپتى.
«EXPO»-عا دايىندىق – ىرگەلى ءىستىڭ باستاۋى
2013 جىلى استانانىڭ مادەني ۇجىمدارى فرانتسيا, يتاليا, تۇركيا, رەسەي, ۋكراينا قالالارىندا ءوز ونەرلەرىن پاش ەتتى. دەنيس ماتسۋەۆتىڭ قولداۋىمەن وتكەن «Astana Piano Passion», «ازيا جاڭعىرىعى» تسيرك ونەرىنىڭ حالىقارالىق فەستيۆالدەرى, سەرگەي بەزرۋكوۆتىڭ «سيرانو دە بەرجەراك» سپەكتاكلى, استاناداعى سانكت-پەتەربۋرگ قالاسىنىڭ مادەنيەت كۇندەرى, رەسەيلىك «سوۆرەمەننيك» تەاترىنىڭ «تري سەسترى», «س ناستۋپايۋششيم …», «يستوريا ليۋبۆي» سپەكتاكلدەرى, فرانتسيالىق ليلل ۇلتتىق وركەسترىنىڭ, وڭتۇستىك كورەيانىڭ «Maestri» ەرلەر حورىنىڭ كونتسەرتتەرى مادەني ارالاس-قۇرالاستىققا تۇيىق ەمەس ەكەنىمىزدى بىلدىرسە كەرەك.
مادەنيەت باسقارماسى باسشىلىعى ۇسىنعان قۇجاتتاعى «بۇگىندە 2017 جىلى ەلوردادا وتەتىن حالىقارالىق «EXPO» كورمەسىنە وراي ۇلكەن جۇمىستار اتقارىلۋدا» دەگەن جولدار دا سالادا ىرگەلى ءىستىڭ باستالعانىن راستايدى.
اسحات رايقۇل
