جۇرتىمەن بىرگە جاسار

جىل تولدى قايىرىلعالى ەر قاناتى,

حالقىنىڭ جۇرەگىندە قالعان اتى.

وشپەيدى ومىردەگى سالعان ءىزى,

سونبەيدى ولەڭدەگى جانعان وتى.

جاراتقان جاتقان ورنىن جارىق قىلسىن,

جۇماقتا جەز كيىگىن جولىقتىرسىن.

ۇلتىنىڭ قامىن جەگەن قارشادايدان,

ۇل تۋسا, كاكىمبەكتەي بولىپ تۋسىن!

ءسۇيىندى جاقسىلىقتىڭ بارلىعىنا,

كۇيىندى قاتال زامان تارلىعىنا.

عاسىردىڭ ءوزى كۋا كەشەگى وتكەن,

ەل جۇگىن ارقالاعان نارلىعىنا.

تاعدىردىڭ باسقا ءتۇستى تايتالاسى,

ءانىڭدى دەگەندەي ءبىر قايتالاشى؟

ىزدەپ تۇر كاكىمبەگىن كۇڭىرەنىپ,

ورمان-كول, تاۋ مەن تاسى, ساي-سالاسى.

ولەڭنىڭ  تۇنىعىنان سۋسىنداعان,

قازاقتاي شىن اقىندى كىم تىڭداعان؟

ىزدەپ ءجۇر كاكىمبەگىن الاسۇرىپ,

اققۋلار كولدى اينالىپ سۇڭقىلداعان.

تۇسەتىن  الىستارعا كوز قيىعى,

اركىمنىڭ وزىنە ايان ءوز بيىگى.

جولىقپاي كاكىمبەگى جابىرقايدى,

جاپاننىڭ جەلدەي ەسكەن جەز كيىگى.

سارالاپ جورتقان ءىزىن ارى-بەرى,

كۇرسىنە ەسكە الادى قالىڭ ەلى.

سەكىلدى ساعىنىشتىڭ بەلگىسىندەي,

سارعايعان سارىارقانىڭ سارى بەلى.

پەندە جوق جەر بەتىندە ولمەيتۇعىن,

قايعىنى ۋاقىت قانا ەمدەيتۇعىن.

جۇرتىمەن بىرگە جاسار ءان مەن جىرى,

جۇرەگىن تىڭداعاننىڭ تەربەيتۇعىن.

سارتىلداپ جىلدار وتەر, كۇندەر وتەر,

عۇمىردى تاۋسىلمايتىن كىم دامەتەر؟

بەينەسى قايران اسىل اعالاردىڭ,

كوز كورگەن بىزدەرمەنەن بىرگە كەتەر.

نەسىپبەك ايتۇلى