ماۋسىمنىڭ سوڭعى جارمەڭكەسى

بۇگىن استانا قالاسى اكىمدىگى الدىنداعى الاڭدا كەزەكتى اۋىل شارۋاشىلىعى جارمەڭكەسى وتەدى.

وسىدان ءبىر اي بۇرىن باستالعان ايماقتارداعى اگروونەركاسىپ قىزمەتكەرلەرى مەن تاۋار وندىرۋشىلەردىڭ ەلوردالىقتارعا ۇسىناتىن سالەمدەمە-تارتۋلارى ماۋسىمىن استىقتى ءوڭىر  اقمولا وبلىسى اياقتايدى.  راسى كەرەك, بازار نارقىنان 15-20 پايىزعا ارزان باعامەن ساتاتىن ازىق-تۇلىك پەن كۇندەلىكتى تۇتىناتىن تاۋارلار لەگى ەلوردالىقتار كوڭىلىنەن شىعىپ كەلەدى. اسىرەسە, اتىراۋدىڭ بالىعى مەن شىعىس قازاقستاننىڭ بالىنا, قىزىلوردانىڭ كۇرىشىنە حالىقتىڭ سۇرانىسى مول ەكەندىگى انىق بايقالدى. ەندى, مىنە, بيىلعى سوڭعى جارمەڭكە دە الاڭدا ەسىگىن ايقارا اشپاق.

كاسىپكەرلىك جانە ونەركاسىپ باس­قارماسى ساۋدا جانە قىزمەت سالاسى ءبولىمىنىڭ مالىمەتىنشە, وسى جولى ساۋدا كورىگىن ءوڭىردىڭ ون جەتى اۋدانىنان ءۇش جۇزدەن اسا كاسىپورىن قىزدىرا تۇسپەك.

اتاپ ايتقاندا, قالالىق الاڭدا 120 ساۋدا ورنى اشىلىپ, 4 كيىز ءۇي تىگىلەدى. استانا قالاسىنىڭ تۇرعىندارى مەن قوناقتارىنا تاۋاردىڭ ەلۋ ءۇش ءتۇرى بويىنشا 500 توننادان اسا ءونىم  ۇسىنىلادى. سونىڭ ىشىندە, 190 توننا كارتوپ, 89 توننا كوكونىس, 83 توننا ەت پەن شۇجىق ونىمدەرى, 50 توننا ۇن, 20 توننا ءسۇت پەن ءسۇت ونىمدەرى, 10 توننا قانت, 4,5 توننا بالىق, 3 توننا جارما, 213 مىڭ دانا جۇمىرتقا جانە 9 مىڭ ليتر وسىمدىك مايى اكەلىنەدى.

الاڭدا جارمەڭكەگە كەلۋشىلەر نازارىنا كونتسەرتتىك باعدارلاما ۇسىنىلىپ, وندا ءتۇرلى شىعارما­شى­لىق ۇجىمنىڭ ەكى جۇزدەن اسا وكىلى  ونەرلەرىن ورتاعا سالادى.

ساعي  ورال