Астана – спорт қаласы
Астана қаласы Туризм, дене тәрбиесі және спорт басқармасының ұйымдастыруымен жалпықалалық «Астана – спорт қаласы» атты бұқаралық шара өтті. Бұл Мемлекет басшысы Нұрсұлтан Назарбаевтың елімізде бұқаралық спортты дамыту жөнінде Қазақстан халқына арнаған Жолдауында айқындалған тапсырмаларды жүзеге асырудың аясында атқарылып келе жатқан тұрақты шаралардың бірі болды.
Атап айтқанда, демалыс күндері елорданың көпшілік демалатын орындары бұқаралық спорт алаңдарына айналып шыға келді. Ұйымдастырушылар бір мезгілде қаланың тұс-тұсындағы саябақтарда түрлі спорттан сайыстар өткізіп, оған қала тұрғындары қалауынша қатысуға мүмкіндік алды. «Жерұйық», «Президенттік», «Арай», «Ғашықтар», «Астаналық», «Студенттер» саябақтары мен Отан қорғаушылар алаңы және Ата Түрік атындағы бақта мыңдаған астаналықтар мен қала қонақтары дене шынықтырып қана қоймай, көтеріңкі көңіл-күйге бөленді. Бұқаралық жарыстарға қатысушылар Астана қаласыда жүргізілетін спорт секцияларында тәрбие алып жүрген балалар мен жастардың көрсетілімдік өнерін тамашалады. Атап айтқанда, боксшылар, теннисшілер, футболшылар, гимнастшылар, велосипедшілер және басқа да спорт түрлерімен айналысушылар шеберліктерін көрсетті.
Көпшілікке арналған «Көңілді старт» жарыстарына қатысушылардың қатары көп болды. Бұл бәсекелерде балалар ата-аналарымен бірге күш сынасып жатты. Роликпен сырғанаушылар мен доп ойнаушылардың сан-қилы ептіліктеріне жұртшылық сүйсініп қол соқты. Стритбол сайыстары да қызықты өтті. Теннисші бапкерлердің өткізген шеберлік сабақтарына қатысушылар да аз болған жоқ. Қазақстанның еңбек сіңірген жаттықтырушысы А.Кочетков велосипед спортына қызығушыларға кеңес берді.
– «Студенттер» саябағында өткен спорт мерекесіне қатысқаныма қуаныштымын. Осы шараға келгенім көптен бері ойымызда жүрген бір мәселемізді шешіп алдық. Інім енді бокс секциясына баратын болды. Бапкерлермен жолығып, қай жерге, қандай бапкерге баратынымызды біліп алдық. Көпшілікке арналған осындай жарыстар жиі болып тұрса деген тілегіміз бар. Сонда Астанамыз шын мәнінде спорт қаласына айнала түседі деп ойлаймын, – дейді Л.Гумилев атындағы Еуразия ұлттық университетінің студенті Индира Құрбанбаева қуанышын жасырмай.
Иә, соңғы жылдары бұқаралық сипат алған осындай спорттық шараларға қызығушылық танытқан астаналықтар қатары көбейіп келе жатқаны байқалады. Жексенбі сайын саябақтарда әуесқой жүгірушілердің жиналатыны, Есіл өзені жағалауында функ-
ционалдық гимнастиканың ұйымдастырылатыны қалыпты шараға айналды. Осындай ізгілікті дүниелер арқылы Астана шын мәнінде бұқаралық спорттың қаласына айнала бастады.