Астана – туристерге тартымды қала
Бизнес-туристің Астанадағы бір күндік шығыны шамамен 600 АҚШ долларынан асады.
«Астана Конвеншн Бюро» ЖШС директорының орынбасары Махуас Хелена журналистерге арналған «Іскерлік туризмді дамыту үшін кәсіпкерлік қызметтерді қолдау» тақырыбындағы семинарда осындай деректі мәлім етті.
– Бірақ бұл – 2006-2016 жылғы статистикалық мәлімет. Соңғы екі жылдың көрсеткіші әзірге жарияланған жоқ, – дейді ол.
Оның айтуынша, халықаралық деңгейде өтетін конференция, форум сияқты түрлі шаралар қаланың әлеуметтік ахуалының жақсаруына зор серпін береді. Ал Астанада ондай шараларды өткізуге лайықты 30-дан аса көрікті орындар мен туристер аялдайтын 200-ден аса отель бар.
– Барселона, Париж, Прага, Вена қалалары осындай шараларды өткізуден көш бастап тұр. Жалпы, әлем елдері бойынша іс-шаралардан түскен бір жылдық қаржы 11 триллион долларды құраған. Міне, халықаралық шараларды өткізудің пайдасы осындай, – дейді Махуас Хелена. – Астанада жобалар өте көп. Жаңадан бой көтерген халықаралық әуежай мен теміржол бекеті заманауи үлгіде салынған. Жолаушыларға өте ыңғайлы. Осының арқасында Қазақстанды транзитті ел ретінде дамытуға болады. Жалпы, Астана – туристерге ыңғайлы қала. Елорданың Орта Азиямен қатар, көптеген әлем қалаларының арасында көшбасшы шаһарға айналуға мүмкіндігі мол.