Жамбыл облысы
Таразда 80 отбасы жаңа пәтерлердің кілтін алып, қоныс тойын тойлады. «Нұрлы жер» бағдарламасы бойынша салынған көп пәтерлі тұрғын үйге әлеуметтік жағынан аз қамтылғандар, соғыс ардагерлері және ұзақ жылдар бойы кезекте тұрған бюджеттік мекеме қызметкерлері қоныстанды.
Түркістан облысы
Түркістан қаласында «Өлкетану» оқулығының тұсаукесер рәсімі өтті. 5-7-сыныптарға арналған оқулықта Түркістан облысының географиялық ерекшеліктері, аумақтық орны, әдебиеті мен мәдениеті, тарихы мен өнері толық қамтылған.
Алматы қаласы
Алдағы үш жылда 22 мың орындық 37 жатақхана бой көтереді. Қала билігі кейбір университеттерге жер телімдерін бөліп, құрылыс алаңдарына жылу, су, электр энергиясы сияқты инженерлік желілерді тартып, көмек көрсетуде.
Ақмола облысы
Бурабай баурайында «Бураbike» дәстүрлі қайырымдылық велошеруі өтті. Бұқаралық шараға биыл 2300 адам қатысты. Велосипедпен шеруге шыққандар арасында Олимпиада чемпиондары Александр Винокуров, Серік Сәпиев және кеше ғана Азия ойындарының екі дүркін чемпионы атанған Алексей Луценко сияқты танымал спортшылар болды.
Маңғыстау облысы
Ақтау қаласында тұңғыш рет смарт-мектеп ашылады. Жаңа заман талабына сай салынған ғимаратта толығымен сандық білім беру технологиясы енгізілген. «Ақылды мектеп» жобасы аясында бақылау-өткізу құрылғылары, ақпараттық терминалдар орнатылды.
Ақтөбе облысы
Ақтөбе облысында Білім күніне орай 9 жаңа мектеп пайдалануға беріледі. Бүгінгі таңда аталған өңірде 27 мектептің құрылысы жүріп жатыр. Соның ішінде 15-і жыл аяғына дейін тапсырылмақ.
Атырау облысы
Атырауда «Ата Заңды жатқа білемін!» атты байқау ұйымдастырылды. Байқаудың нәтижесінде үздік шыққан үш студент – Нұрдәулет Бағытжан, Гүлнұр Ғалиева және Назерке Нұрмұқановалар Х.Досмұхамедов атындағы Атырау мемлекеттік университетінің бір жылдық оқу грантына ие болды.
