Ата заңнан арна алған
Ата заң – еліміздің басты құжаты, тәуелсіздігіміздің тірегі. Осынау Заң қабылданғаннан бері елімізде талай жүйелі өзгеріс орын алды. Соның ішінде елордамыз Алатау баурайынан Сарыарқа төріне қоныс аударды. Ал 20 жыл ішінде бас қалада қарқынды құрылыс жүргізіліп, Астана адам танымастай өзгеріп, әлемдегі әдемі шаһарлардың біріне айналды.
Жалпы, «Конституция» сөзі латын тілінен аударғанда «құрылыс» деген мағынаны білдіреді. Бұл тұрғыда Астананы салу және дамыту жұмыстары осы басты құжат аясында жүзеге асырылуда.
Құрылысы қарқынды қаланың дамуы 2007 жылдан бастап «Астана бас жоспары» ғылыми-зерттеу жобалау институтының шығармашылық ұжымы әзірлеген жаңа тұжырымдамалық жоспар бойынша жүргізілді. Осы уақытта тұрғын үй және азаматтық құрылыс саласындағы ағымдағы жағдайды талдау, қаланың аумағында кесте бойынша қызмет көрсету жоспарына жедел мониторинг жүргізу сияқты бірқатар мәселелер шешімін тапты. Президенттің Жарлығы бойынша Астананың 2030 жылға дейінгі дамуы жөніндегі Бас жоспарына өзгерістер енгізіліп, 2009 жылдың 28 қаңтарында бекітілді. Оның бірінші кезеңі 2008-2011 жылдар аралығында болғандықтан, 2011 жылдың 30 шілдесінде Бас жоспарға өзгерістер мен толықтырулар енгізіліп, онда қала құрылысының негізгі қағидаттары көрсетілді. Содан «ЭКСПО-2017» көрмесін өткізу жөніндегі 2013-2018 жылдарға арналған іс-шаралар жоспарының 47-тармағына сәйкес, Бас жоспарға тағы да тиісті өзгерістер мен толықтырулар енгізіліп, ол 2016 жылдың 23 желтоқсанында бекітілді. Бас жоспар бойынша 2030 жылға қарай Астанада 1 миллион 200 мың халық тұрады деген болжам бар. Осыған орай қаладағы тұрғын үй құрылысының дамуы, инженерлік және көлік инфрақұрылымын дамыту жұмыстары жүргізілетін болады. Айта кету керек, Бас жоспарда конституциялық нормалар қатаң сақталады.
Елбасымыз бір сөзінде: «Біздің басты парызымыз – Конституцияға ұқыпты қарап, өз елімізді, тарихымызды қалай құрметтесек, оны да солай құрметтеуіміз қажет» дейді. Яғни, тәуелсіз елдің мызғымас тұғырына айналған Ата заң – елдіктің киелі кітабы іспетті қастерлі құжат. Конституция – қазақ мемлекетінің дамылсыз дамуына, үздіксіз өсуіне кепіл болған барша заңдарының қайнар көзі, бастау бұлағы, өміріміздің, тыныс-тіршілігіміздің ел-жұрт болып бірігіп, мемлекет құруымыздың айғағы. Елордалықтарды осынау елдік мереке, Конституция күнімен шын жүректен құттықтаймын! Баршаңызға мықты денсаулық, отбасыларыңызға береке, бақыт тілеймін! Астанамыз одан әрі көркейе берсін! Еліміздің азаттығы мәңгілік болсын!
Сәрсембек ЖҮНІСОВ,
«Астана бас жоспары»
ҒЗЖИ» ЖШС директоры