Қала әкімі Алтай Көлгінов бірқатар ірі сауда желілерінің басшыларымен кездесті. Келесі жылдан бастап сауда желілеріне «айналым механизмі» бойынша бөлінетін сома көбейетін болады.
«Азық-түлік қауіпсіздігі мәселесі – басты назарда. Біз әлеуметтік маңыздағы азық-түліктің бағасын тұрақтандыру үшін бірқатар шараларды жүзеге асырдық. Сауда желілеріне «айналым механизмі» бойынша бөлінетін соманы 13 есеге – 180 млн теңгеден 2,4 млрд теңгеге дейін өсірдік. Бұл әрекетіміз әлеуметтік маңызды тауарлардың 16 түрінің бағасын қолжетімді ұстап тұруға мүмкіндік береді. Сонымен бірге, сатып алуды ұлғайттық және бағаны тұрақтандыруға қатысатын сауда желілерінің санын 4-тен 12-ге көбейттік. Олар: Магнум, Астықжан, Кенмарт, Вкусмарт, А2, Метро, Анвар, Рахмет, Ақмол, Смолл, «Астаналық» базары, Шапағат сауда орындары» деп жазды А.Көлгінов әлеуметтік желідегі парақшасына.
Сонымен бірге, шаруа қожалықтарымен қосымша 704 млн теңгеге 5 мың тонна көкөніс сатып алуға форвардтық келісім жасалды. Нан өнімдерінің бағасын тұрақтандыру үшін жергілікті наубайханаларға 600 млн теңгеден аса қаржы бөлінген.
Елордада барлығы 7 логистикалық кешен бар. 4 көтерме-тарату орталығының құрылысы жүріп жатыр (үшеуі – жеке инвесторлар есебінен). Инвесторлар жылыжайлар, азық-түлік базарларын, көкөніс қоймаларын, сүт зауытын және басқа да нысандарды салу жөніндегі жеке жобаларды қолдаған. Бұл шаралар да азық-түлік қауіпсіздігін нығайта түсіп, нарықты жергілікті тауарлармен толтыруға мұрындық болады.
