Сарыарқа ауданының әкімі Павел Кулагиннің төрағалығымен кәмелетке толмағандардың құқығы мен қылмысына қатысты жиын өтті. Оған жергілікті полиция қызметі мен прокуратура өкілдері, кәсіпкерлер және қала тұрғындары қатысты.
Іс-шара барысында Сарыарқа ауданы прокуратурасының әлеуметтік-экономикалық саладағы заңдылықты бақылау жөніндегі бөлім прокуроры Ғалы Бексұлтанов баяндама жасап, балалар арасындағы суицид мәселесіне тоқталды. «Бүгінде Қазақстан осы проблема бойынша әлем елдерінің тізімінде алғашқы орында тұр. Мұның өзі – қынжылтарлық дерек. Әйткенмен, жыл сайын суицид көрсеткіші азайып келеді. Мәселен, 2013 жылы 21 факті тіркелсе, 2014 жылы 6 бала өз-өзіне қол жұмсауға әрекеттенген. Бірақ 2015 жылы бұл цифр 20-ға дейін жетті. Оның ішінде 2 жағдай өліммен аяқталды. Ал биыл әзірге 5 оқиға белгілі. Аталған індеттің алдын алу үшін тиісті жұмыстарды атқарып жатырмыз. Мектеп психологтарымен бірлесіп, оқушылармен ашық әңгіме жүргізудеміз. Әлеуметтік желідегі күдікті парақшаларды бақылап, біздің бүлдіршіндерімізге теріс әсер етпеуін қадағалаудамыз» деді ол. Осы тұста аудан әкімі Павел Кулагин суицидке мүмкіндік беретін жолдардың бәрін жауып, әсіресе, көпқабатты үйлердің шатырына шығатын есіктерді мықтап бекіту керектігін айтты.
Бұдан соң, Ішкі істер басқармасына қарасты Сарыарқа аудандық ювеналды полиция бөлімінің басшысы, полиция майоры Әлия Қолышпаева сөз алып, кәмелетке толмағандардың ұрынатын қылмысы жайлы мәлімдеді. «Жыл басынан бері балалар мен жасөспірімдер тарапынан 196 қылмыс жасалған. Көбінесе, ұялы телефон мен ақша ұрлығы жиі кездеседі» дей келе тәртіп сақшысы тәрбиенің рөлін шегелей жеткізді. Ювеналды полицияның ұйымдастыруымен балалар қылмысының алдын алуға бағытталған акциялар, жедел іс-шаралар, салауатты өмір салтын насихаттайтын эстафеталар тұрақты түрде өткізіліп отырады екен. Сонымен қоса, полиция майоры балаларға алкогольді ішімдік пен темекі өнімдерінің сатылуы турасында да әңгіме қозғады. Былтырғы жылмен салыстырғанда биыл мұндай фактілер едәуір азайған.
Ботагөз МАРАТҚЫЗЫ
