Көрмеде – бас қала келбеті
Ұлттық музейде елорданың 25 жылдығына арналған «Елімнің жүрегі – Астана» атты көрме ашылды. Аталмыш көрмені «АСТ» Астана әлеуметтік технологиялар» орталығы ұйымдастырды.
Бұл орталықтың мақсаты – әлеуметтік жобалар мен бағдарламаларды және әлеуметтік әріптестікті іске асыруға халықты тарту. Сол арқылы ерекше қажеттілігі бар балаларды әлеуметтік оңалтуға және қоғамға араласуға жәрдемдесу. Соның ішінде балалар қабілетін ашып, болашаққа деген сенімді жүрегіне ұялату. Осы көрме де сол мақсатта ұйымдастырылды.
Көрменің ашылуында «АСТ» Астана әлеуметтік технологиялар» орталығының жетекшісі Динара Құрманқызы, арт-терапевт Еркінбек Есімов сөз сөйледі. Ұйымдастырушылардың айтуынша, осы орталық 180 бенефициарға қызмет көрсетеді. Олардың көбісінде шығармашылық талант байқалады. Ал көрмеге қойылған суреттерде елорданың символына айналған «Бәйтерек» монументі, Әскери-тарихи музей сияқты бас қаланың көрнекті ғимараттары мен көз тартар тұрғын үй кешендері, қаланың әсем көріністері бейнеленген.