Ұлыстың Ұлы күні Алматы ауданының Қырқыншы кентіндегі №29 мектепте «Армысың, әз Наурыз» атты мерекелік шара ұйымдастырылды.
Барлық исі мұсылман бірін-бірі көктем мерекесімен шынайы құттықтайтын бұл күнде осы ауданның тұрғындары аталмыш мектепке ағылды. Ұлттық нақышта безендірілген залдың ортасына ақ дастархан жайылып, оның үсті ұлттық тағамдарға толтырылыпты. Онда бауырсақтың түр-түрі, қазы-қарта, жал-жая, ірімшік, сүттен жасалған сан алуан тағамдар – бәрі тегіс қойылған. Мерекені қызықтауға келгендер де шат-шадыман көңіл-күймен өкпе-реніштерін ұмытып, наурыз көжеден дәм татып, төс қағыстырып, игі тілектерін білдіріп жатты. Осындай бір жарасымды сәтте ортаға шыққан Алматы ауданы әкімінің орынбасары Ә.Қуатбеков жиналғандарды көктемгі жаңару мерекесімен шын жүректен құттықтап, әр отбасына амандық, береке-бірлік, тыныштық тіледі.
– Күн нұрына жылынып, мал өсіп, ақ молайып, тіршілікке қасиет нұры құйылатын бұл мезгіл – бірліктің, ынтымақтың, береке мен татулықтың мерекесі. Ендеше, бірлігіміз нығайып, берекеміз арта берсін. Ұлыс оң, ақ мол болсын! – деді Әлихан Жұмаханұлы.
Шара барысында қазақ халқының салт-дәстүрлері, әдет-ғұрпы көрсетіліп, балаларға наурыз мерекесінің басты тағамы «Наурыз көже» туралы, «Қыдыр ата» жайында түсінік, мәлімет берілді. Соңынан спорттық шаралар ұйымдастырылып, жеңімпаздар мен мерекелік шараға қатысушыларға ынталандыру сыйлықтары үлестірілді.
