Elımızdıŋ tükpır-tükpırınde Qazaqstan halqynyŋ bırlıgı künı merekesı toilanyp jatqanda Astanadaǧy Saryarqa audanynyŋ äkımdıgı de bırlık pen etnosaralyq kelısımnıŋ jarqyn merekesıne orai ıs-şara ūiymdastyrdy.
Tüskı saǧat 12.00-den bastap qala äkımdıgı ornalasqan alaŋǧa jūrt köptep jinaldy. Astananyŋ aspanyn än men küige bölep, sahnada estrada jūldyzdary öner körsettı. Halyqtyŋ süiıktısıne ainalǧan Gülnūr Orazymbetova, Almas Kışkenbaev, Jıger Aupbaev, Älışer Kärımov, Dos, Qairat Baekenov, Serık İbragimov syndy tanymal änşıler äuelete şyrqaǧan än jinalǧandarǧa merekelık köŋıl-küi syilady.
Konsertten bölek tūrǧyndar ūlttyq oiyndar jarysyn tamaşalap, järmeŋkeden özderıne ūnaǧan būiymdardy satyp alyp jatty. Sondai-aq elordalyqtar men qala qonaqtary asyq atu, qol küres, arqan tartys, gır köteru sekıldı jarystardy körıp, keibırı tıptı özderı de baq synady.
Sporttyq jarys jeŋımpazdary baǧaly tehnikalyq syilyqtarmen marapattaldy.
Merekelık ıs-şarada korei, şeşen-inguş, tatar mädeni ortalyqtarynyŋ ökılderı öner körsetıp, köpşılıktıŋ ystyq yqylasyna bölenude. Äsırese, kavkaz ūltynyŋ ökılderınen qūralǧan ūjymnyŋ «Zazan» biı jūrtşylyqty täntı ettı.
– Ūiymdastyruşylarǧa osyndai konsert ötkızgenı üşın alǧysym şeksız. Jūrt merekelık köŋıl küide, bärı de köŋıldı. Konsert öte tamaşa deŋgeide ötıp jatyr. Eresekter üşın de, balalar üşın de qyzyqty ıs-şara. Barşa qazaqstandyqtardy bügıngı Bırlık künı merekesımen qūttyqtaimyn! Aspanymyz aşyq, är otbasynda amandyq bolsyn! Elımız aman, jūrtymyz tynyş bolsyn! – dedı elordalyq Aleksandra Kornilova.
