Sanaly ömırın būqaralyq sporttyŋ damuyna arnap, älı de osy salada eŋbek etıp jürgen Däulet Hamzinnıŋ aitary anyq, boiauy qanyq. Belbeu küresınen ūlttyq därejedegı töreşını äŋgımege tartyp, sūhbattasqan edık.
– Selinograd oblysy Astrahan audanyndaǧy Jaltyr stansasynda tudym. Auyl balalarymen bırge dop teuıp, futbolǧa qatty qyzyqtyq. İnstitutta oqyǧan jyldary üstel tennisınen şeberlıgımdı şyŋdap, türlı deŋgeidegı sporttyq turnirlerge qatystym. Şükır, sportta jolym bolǧan adammyn. Ekeuınen de sport şeberlıgıne ümıtker atandym, – dep bastady äŋgımesın ol.
1984 jyly Selinograd auyl şaruaşylyǧy institutyn sport jäne dene şynyqtyru mamandyǧy boiynşa bıtırıp, institut qabyrǧasynda eŋbek jolyn bastap, studentterdı sportqa baulidy. 1987 jyly Qazaq agrarlyq tehnikalyq universitetınde aǧa oqytuşy qyzmetın atqarady.
2009 jyly, aǧartuşylyq qyzmetımen qosa, Astana qalasynyŋ Dene şynyqtyru jäne sport basqarmasy janyndaǧy sporttyq-būqaralyq ıs-şaralardy ötkızu direksiiasynda belsendı eŋbek etıp, elordada sporttyq ıs-şaralardy köptep ötkızuge üles qosady.
– Būqaralyq sportty damytudyŋ joly – sporttyq infraqūrylymdy damytu jäne sporttyq ıs-şaralardy jiı ötkızu. Ärine, bırınşısı – şahar äkımşılıgınıŋ qūzyryndaǧy ıs. Būl baǧytta sporttyq keşender boi köterıp, halyqaralyq, respublikalyq deŋgeide ötetın chempionattardy qabyldaityn velotrek, mūz saraiy jäne jeŋıl atletikalyq zaldar esıgın aşty. Sondai-aq fitnes-ortalyqtar, trenajerlık zaldardy oŋai tabuǧa bolady. Alaida bas şahardyŋ är audanynda köpşılıkke arnalǧan sporttyq ǧimarattar köbeise artyqtyq etpeidı.
Al türlı deŋgeidegı turnirlerdı ötkızude kenje qalǧan emespız. Eldegı ırı kompaniialar – «Samūryq-Qazyna» AQ, «Qazatomönerkäsıp» ŪAK» AQ, «QazTransOil» AQ, «QazMūnaiGaz» ŪK jäne t. b. arasyndaǧy turnirlerdı, joǧary oqu oryndary arasyndaǧy spartakiadalardy ötkızudıŋ dästürı qalyptasty, – deidı öz ısıne berılgen maman.
Däulet Tūratūlynan otandyq sportşylar älem chempionattarynda chempion boluyna ne jetıspei jürgenın sūradyq.
– Chempiondar şyǧuda. Bar. Bıraq köp dei almaimyz. Oǧan türlı faktor äser etuı mümkın. Qazır älemdık sport qatty damyp kettı. Sportşylar da et pen süiekten jaralǧan. Olar da şarşaidy, şaldyǧady. Osyndai kezde sauyqtyru-oŋaltu ortalyqtarynda fizikalyq küş-quatyn tekserıp, sportşyǧa berıletın fizikalyq jüktemenı rettep otyru öte maŋyzdy. Bızde mūndai ortalyqtar el boiynşa bır-ekeu ǧana. Sosyn sportşymen psihologtar men arnaiy massajşylar jūmys ıstegenı abzal. Qysqasy, sport salasyn ǧylymmen ūştastyryp damytu maŋyzdy, – dep tüsındırdı ardager sportşy.
