Mäskeu jäne Sankt-Peterburg qalalarynda şaibaly hokkeiden ötıp jatqan älem chempionatynda Qazaqstan qūramasy üş oiyn ötkızdı.
Bügınde toptyq bäsekeler ötıp jatyr. Qazaqstan hokkeişılerı Resei, Chehiia, Şvesiia, Şveisariia, Daniia, Norvegiia jäne Latviia qūramalarymen bırge bır topqa tüsıp, kelesı ainalymǧa ötetın tört oryn üşın synǧa tüsude.
Andrei Nazarov baptaityn Qazaqstan qūramasy älem chempionatyn öte sättı bastady deuge negız bar. Alǧaşqy oiynda jerlesterımız Şveisariia qūramasymen kezdestı. Būl oiynda qazaqstandyq hokkeişıler matchtan keiıngı bullit boiynşa jeŋıske jettı. Oiynnyŋ negızgı uaqytynda esep 2:2 bolyp tırkelgen edı. Odan keiın bes minuttyq over-taim belgılendı. Bıraq būl uaqytta da esep özgermedı. Al oiynnan keiıngı bullit ūrysynda Qazaqstan hokkeişılerı mergendıgımen tanyldy.
Osy match barysynda älem chempionatyndaǧy eŋ eleulı körsetkışterdıŋ bırı tırkeldı. Qazaqstan qūramasynyŋ qorǧauşysy Roman Savchenko alaŋ ortasynan, tıpten öz alaŋynan qarsylastar qaqpasyna gol soqty. Osy goldy körgen mamandardyŋ bärı «Qazaqstandyq hokkeişınıŋ Şveisariia qaqpasyna salǧan goly älem chempionatyndaǧy eŋ ädemı gol» degen pıkırlerın aituda. Şynymen de Savchenkonyŋ būl goly janküierler tarapynan joǧary baǧa aluda. Sondai-aq, osy match barysynda Qazaqstan qūramasynyŋ qaqpaşysy Vitalii Kolesnik te şeberlıgımen közge tüstı. Ol oiyn kezınde 49 seif jasady, iaǧni, osynşa ret öz qaqpasyna baǧyttalǧan şaibany qaitara bıldı.
Ekınşı oiynda jerlesterımız alaŋ ielerınen ūtyldy. Osyǧan deiın Chehiia qūramasynan 0:3 esebımen ūtylyp, öz janküierlerı aldynda ūiatqa batqan Resei hokkeişılerı Qazaqstanǧa qarsy oiynda baryn salyp baqty. Degenmen, būl oiynda da qazaqstandyq hokkeişıler qarap qalǧan joq. Matchtyŋ ortasyna deiın teŋ nätijenı ūstap tūrdy. Alaida, Resei qūramasy soŋǧy kezeŋde şiraqtyq tanytyp, 6:4 esebımen jeŋıske jettı.
Üşınşı oiynda jerlesterımız Norvegiia qūramasynan ūtylyp qaldy. Köpşılık janküier osy matchta Qazaqstan jeŋedı degendei boljamdar jasaǧan edı. Alaida, oiyndaǧy jaǧdai basqaşa örbıdı. Match 4:2 esebımen norvegiialyqtar paidasyna şeşıldı.
Taǧy bır aitarymyz, būryn legioner bolyp kelgen bırneşe şeteldık hokkeişıler Qazaqstan qūramasy sapynda alaŋǧa şyqty. Atap aitqanda, «Barys» komandasynda bırneşe jyldan berı oinap jürgen Brendon Bochenski, Naidjel Dous jäne Dastin Boid Qazaqstan qūramasynyŋ namysyn qorǧap jür.
Keşe Qazaqstan qūramasy Şvesiia hokkeişılerımen kezdestı.
Bızdıŋ topta Chehiia qūramasy köş bastap keledı. Ekınşı topta Kanada jeŋılıssız keledı.
Ǧalym QOJABEKOV
