Bügın «Qazaqstan» Ortalyq konsert zalynda Qūrmanǧazy atyndaǧy Qazaq memlekettık akademiialyq halyq aspaptary orkestrınıŋ el täuelsızdıgınıŋ 25 jyldyǧyna arnalǧan «Ūly dala mūrasy» atty merekelık konsertı ötedı. Osyǧan orai keşe QR Prezidentı janyndaǧy Ortalyq kommunikasiialar qyzmetınıŋ brifingıne qatysqan orkestr jetekşılerı öner ūjymynyŋ jaŋalyqtarymen bölısıp, elordadaǧy keş jönınde aqparattandyrdy.
Qūrmanǧazy orkestrınıŋ tarihy ötken ǧasyrdyŋ otyzynşy jyldarynan tamyr tartady. Onyŋ basynda äigılı muzykatanuşy, kompozitor Ahmet Jūbanov tūr. Alaida, qaraşaŋyraq öner ūjymy elordada alǧaşqy märte konsertın bergelı otyr.
«Osyǧan deiın orkestr älemnıŋ seksennen astam elınde bolyp, şetel jūrtyn önerımen täntı ettı. Būl arqyly qazaq muzyka mädenietın älem tanyp, oǧan Memleket basşysy «Qazaqtyŋ ınju-marjany» degen at bergenın özderıŋızge mälım. Küllı älemge qazaqtyŋ önerın tanystyryp kele jatqan orkestrdıŋ Qazaqstandaǧy öner ūjymdarynyŋ arasyndaǧy alatyn orny erekşe. Täuelsızdıktıŋ jiyrma bes jyldyǧyna orai ūiymdastyrylǧan keşımızdıŋ alǧaşqy bölımınde qazaqtyŋ töl şyǧarmalary oryndalatyn bolsa, ekınşı bölımınde älemnıŋ klassik kompozitorlarynyŋ şyǧarmalaryn qazaq orkestrı oryndaidy» deidı orkestrdıŋ direktory Nūrǧisa Däueşov.
Onyŋ aituynşa, orkestr araǧa 18 jyl salyp ekınşı üntaspany şyǧarǧaly otyr. Repertuaryn da jaŋǧyrta, jaŋarta otyryp, zaman aǧymynan qalmai alǧa basuda.
«Qazırgı taŋda bız repertuardy jan-jaqty keŋeitıp, qazaqtyŋ dästürlı muzykasymen qatar, zamanaui jäne älem klassikterınıŋ şyǧarmalaryn mümkındıgımızşe öŋdep otyramyz. Eskı partituralarymyzdy jaŋartyp, elektrondy jüiege keltıru mäselelerı basty nazarda ūstalyp otyr» deidı orkestrdıŋ bas dirijer Arman Jüdebaev.
Öner ūjymynyŋ repertuaryna kelsek, onda Qūrmanǧazynyŋ küilerınen bastap, Dina Nūrpeiısovanyŋ, Däuletkereidıŋ, özge de Batys Qazaqstan küi mektebı ökılderınıŋ tökpe küilerı, Tättımbet Qazanǧapūly syndy Arqa küiınıŋ negızın salǧan küişılerdıŋ, Ahmet Jūbanov, Evgenii Brusilovskii, Sydyq Mūhamedjanov, Mäkälım Qoişybaev, Nūrǧisa Tılendiev, Kenjebek Kümısbekov, Myŋjasar Maŋǧytaev syndy qazaqtyŋ klassik kompozitorlarynyŋ, Sergei Prokofev, Mihail Glinka, Aram Hachaturian, Dmitrii Şostakovich, Petr Chaikovskii, Jorj Bize, Djoakkino Rossini siiaqty älem moiyndaǧan kompozitorlardyŋ şyǧarmalary bar.
Elordadaǧy keşte orkestrdıŋ süiemeldeuımen osy kompozitorlardyŋ tuyndylaryn Maira Mūhamedqyzy, Gülnūr Orazymbetova, Saltanat Ahmetova, Batyrjan Myqtybaev, Erlan Rysqali, Edıl Qūsaiynov, Äsel Raqymjan, t.b. tanymal änşıler oryndaidy.
Amanǧali QALJANOV
