Futboldan Qazaqstan chempionatynyŋ premer-ligasynda kezektı turdyŋ oiyndary öttı.
Turnir kestesın bastap kele jatqan «Astana» būl joly biyl myqtylar qataryna qaita qosylǧan «Aqjaiyq» komandasyn qabyldady. Batys Qazaqstan futbolşylary elordaǧa jeŋıluge kelmegenderın bırden aŋǧartty. Alaŋ ielerı qanşa şabuyl ūiymdastyrǧanymen, qonaqtar qaqpasynyŋ qūlpy būzylmai qoidy. Oiynnyŋ 15-ınşı minutynda komanda kapitany Taŋat Nöserbaev esep aşatyndai mümkındıkke ie bolǧan edı. Alaida, onyŋ soqqan doby qaqpadan säl biık kettı. Serıkjan Mujikov ekı oiynşyny aldap ötıp, ala dopty «Aqjaiyq» qaqpasyna qarai äueletıp tüsırgen edı. Būl dopty Patrik Tvumasi ädemı qabyldap alyp, qaqpaǧa baǧyttaǧanymen, qonaqtar qaqpaşysy Roman Bagautdinov qyraǧylyq tanyta bıldı. Şomko men Despotovich te gol soǧatyndai jaǧdai jasady. Bıraq, barlyq qauıpsızdıktıŋ betın qaqpaşy qaitaryp otyrdy.
Oiynnyŋ bırınşı taimy aiaqtalar uaqyt ta jaqyndap qalǧan edı. Osy tūsta, iaǧni, matchtyŋ 45-ınşı minutynda «Aqjaiyq» qaqpasyna qarai būryştama dop belgılendı. Soŋǧy kezderı aiyp doptaryn jaqsy oryndap jürgen Serıkjan Mujikov būryştama soǧuǧa bet aldy. Onyŋ äueletıp baǧyttaǧan dobyn Taŋat Nöserbaev jerge tüsırmesten qaqpaǧa qarai būra teptı. Ala dop äp-sätte qaqpaǧa tulap tüstı. Osylaişa esep aşyldy. Al töreşı bolsa, bırınşı taimnyŋ aiaqtalǧanyn bıldırıp ysqyryq şaldy.
Üzılısten keiın astanalyqtar şabuyldy üdete tüstı. Jartylai qorǧauşy Nemania Maksimovich alaŋ ortasynan alǧa qarai pas şyǧardy. Ünemı qonaqtardyŋ aiyp alaŋynda dop aŋdyp jüretın Patrik Tvumasi būl joly däl kerek jerden tabyla bıldı. Ganalyq legioner äuelep kelgen dopty jaqsy igerıp aldy da, qaqpaǧa däl baǧyttady. Esep osylaişa eselendı. Būl Tvumasidıŋ biylǧy mausymdaǧy törtınşı goly boldy.
Ötken jyldan berı jaraqatyna bailanysty oiyndardy tolyq ötkıze almai jürgen Taŋat Nöserbaev biylǧy chempionatty öte jaqsy bastady deuge negız bar. Komanda kapitany qarsylastar qaqpasyn tört ret däl közdedı. Būl – komandadaǧy eŋ üzdık körsetkış. Osylaişa, «Astana» qūramyndaǧy qos şabuylşy tek qana komandanyŋ ǧana emes, jalpy chempionattaǧy mergenderdıŋ qatarynan körınıp otyr.
Osylaişa, «Aqjaiyq» komandasyn 2:0 esebımen tıze büktırgen «Astana» turnir kestesındegı bırınşı ornyn saqtap qaldy. Aitpaqşy, būl jeŋıs bas bapkerı Stanimir Stoilovtyŋ «Astana» komandasymen bırge 50-ınşı jeŋısı bolyp tırkeldı.
Bırınşılık bäsekesınde äzırge ekınşı orynda «Ertıs», üşınşı orynda «Oqjetpes» tūraqtap tūr.
Turdyŋ basqa oiyndarynda mynadai nätijeler tırkeldı: «Ordabasy» – «Şahter» 2:0, «Ertıs» – «Taraz» 2:1, «Aqtöbe» – «Atyrau» 1:0, «Jetısu» – «Oqjetpes» 1:4,
«Tobyl» – «Qairat» 1:2.
«Astana» kelesı oiyndy 15 mamyr künı Atyrauda ötkızedı.
Ǧalym QOJABEKOV
