Gülnara SKANDİROVA, qala tūrǧyny:
– 2018 jyldyŋ soŋyna deiın elımızde eŋbek kıtapşalary joiylady degen ras pa? Sonda jūmysqa tūratyn kezde qandai qūjatty körsetemız?
Būl saualǧa Eŋbek jäne halyqty äleumettık qorǧau ministrınıŋ orynbasary Nariman Mūqyşevtyŋ jauabyn ūsynamyz:
– Qazaqstanda e-HR jüiesı bırtındep engızıledı. 2019 jyldan bastap jūmysqa tūratyn kezde eŋbek şarttary onlain-tärtıppen toltyrylady. Aldaǧy uaqytta jūmysqa qabyldanatyn kezde tek jeke kuälık qana qajet bolady. Qalǧan mälımetter bazada saqtalady. Mūndai täsıl būrynǧy qaǧazbastylyqtan qūtqarady. Saiyp kelgende, barşa qazaqstandyqtardy jūmysqa qabyldau tek jeke basynyŋ kuälıgı arqyly jürgızıledı. Medisinalyq anyqtama, diplom siiaqty basqa qūjattar mälımetter bazasynda tūrady. Bız jūmysqa qabyldaityn kezdegı qūjattardy tırkeu prosesın jeŋıldetıp, jūmys beruşı men jūmysşynyŋ arasyndaǧy özara qarym-qatynasty elektrondyq formatqa köşıremız. Būl azamattardyŋ tezırek jūmys tabuyna da septıgın tigızedı. Mysaly, bır adam jūmyssyz qalsa, bız avtomatty türde ony elektrondy eŋbek birjasyna şyǧaryp, jūmys ızdeuıne kömektese alamyz.
