Aşarşylyqqa baǧa berılse…
Senator Mūrat Baqtiiarūly saiasi quǧyn-sürgınderdıŋ qasıretıne jäne aşarşylyq qūrbandaryna Ükımet deŋgeiınde resmi qūqyqtyq baǧa beretın şeşım şyǧaru qajettıgın mälımdedı.
Halyqşyl deputat aşarşylyqtyŋ qūrbany bolǧan otandastarymyzdyŋ ortaq tızımın jasap, ǧylymi-zertteu ortalyǧyn qūrudy ūsyndy. Onyŋ paiymdauynşa, zobalaŋ jyldardyŋ qaiǧy-qasıretı men saldaryn älı de keŋınen aityp, BAQ-tar men kino arqyly jas ūrpaqtyŋ sanasyna sıŋıru – bärımızdıŋ mındetımız.
Ol 1930-33 jyldary ataqonysynda tūratyn qazaq halqy teŋ jartysynan aiyrylǧanyna, mūndai asa auyr qasırettı bırde-bır halyq bastan ötkermegenıne toqtaldy. Alapat zūlmat qazaq ūltynyŋ ösımın kem degende 100 jylǧa keiın şegerıp tastaǧanyn tılge tiek ettı. «Aita keterlıgı, mūndai aşarşylyq Qazaqstanda tūratyn basqa ūlttarǧa da qasıret äkeldı. Mysaly, qazaqstandyq ūiǧyrlardyŋ 13 paiyzy, ukraindar men nemısterdıŋ 11 paiyzy, tatarlardyŋ 10 paiyzy, özbekterdıŋ 8 paiyzy, orystardyŋ 6 paiyzy aşarşylyqqa ūşyrady. Qazır demograf mamandar qoldan jasalǧan osy aşarşylyq bolmasa, qazırgı kezde bızdıŋ halqymyzdyŋ sany 45 millionǧa jetuı mümkın ekenın däleldep jür» dedı deputat Ükımet basşysy Baqytjan Saǧyntaevtyŋ atyna joldaǧan saualynda. Deputat aşarşylyq tarihy men onyŋ zardabyn özge bır halyqtan kek alu üşın saiasi oiyn qūralyna ainaldyruǧa bolmaidy dep sanaidy.