Astana qalasy äkımınıŋ orynbasary Malika Bektūrova Polşa astanasy Varşavada ötken jyl saiynǧy Jahandyq äielder sammitıne qatysty. Biylǧy sammit «Äielder – sandyq tehnologiialar däuırınde inkliuzivtı ekonomikany qūru üşın» taqyryby aiasynda öttı.
Älemnıŋ jetpıske juyq elınen jinalǧan eŋ tabysty sanalatyn myŋnan asa biznes jäne saiasat ökılderı bedeldı dialog alaŋynda öz täjıribelerımen bölıstı, türlı mäselelerde pıkır almasty.
«Qalalardyŋ bolaşaǧy» atty forum barysynda Qazaqstandy tanystyrǧan Malika Bektūrova: «Bügınde qazaqstandyq biznestegı basşy äielderdıŋ ülesı 42 paiyzǧa jetıp otyr jäne būl körsetkış tūraqty türde artyp keledı. Astanada būl ürdıs şaǧyn jäne orta biznes salasynda erekşe baiqalady. Sondyqtan ozyq täjıribenı meŋgeruge jäne jetıstıktermen bölısuge mümkındık tudyratyn osy siiaqty forumdardy ötkızu öte oryndy» dep baiandady.
Qala äkımınıŋ orynbasary ıs-sapar aiasynda Qazaqstan Elşılıgınıŋ qoldauymen Polşa astanasynyŋ vise-prezidentı M.Olşevskimen kezdestı. Onda Astana men Varşava arasyndaǧy yntymaqtastyqty odan ärı nyǧaitudyŋ mäselelerı talqylandy. Ekı jaqtaǧy taraptar qalalyq äkımdıkter arasyndaǧy serıktestıktıŋ ahual-äleuetın joǧary baǧalap, 2020 jylǧa deiıngı arnaiy yntymaqtastyq baǧdarlamasyna qol qoiu turaly kelısımge keldı. Būl qūjat sauda-ekonomikalyq, investisiialyq, ǧylymi-tehnikalyq, sondai-aq, mädeni-gumanitarlyq serıktestıktı damytuǧa baǧyttalǧan bırlesken şaralardy qamtidy.
Poliak tarapy sonymen bırge, Varşavada ötetın NATO sammitı qarsaŋynda «EKSPO-2017» syndy ırı halyqaralyq şarany joǧary deŋgeide ötkızu boiynşa Astana täjıribesın zerdeleuge zor qyzyǧuşylyq tanytty.
Biylǧy jyldyŋ mamyr aiynda Qazaqstan Elşılıgı Polşanyŋ Damu vise-ministrı R.Domagalski-Labendzki men Astana qalasynyŋ äkımdıgı arasynda kezdesu ūiymdastyrǧan bolatyn. Polşanyŋ Damu ministrlıgınde ötken seminar sol kelıssözderdıŋ jalǧasy boldy. M.Bektūrova seminar kezınde poliak biznes ökılderıne Astananyŋ investisiialyq şarttary men basymdy jobalary turaly baiandap berdı. Seminarǧa bügınde Qazaqstanda jūmys ıstep jürgen, bolaşaqtaǧy tyǧyz yntymaqtastyqqa qyzyǧuşylyq tanytyp otyrǧan Polşanyŋ 18 kompaniiasy qatysty.
Iskerlık äŋgımenı qorytyndylai kele taraptar Polşanyŋ qūrylys klasterımen belsendı yqpaldastyq ornatuǧa uaǧdalasyp, tūrǧyn-üi kommunaldyq şaruaşylyq, balamaly energetika, auyl şaruaşylyǧyndaǧy qaita öŋdeu jäne kölık-logistikalyq jobalary boiynşa yntymaqtastyq mümkındıkterın zerdeleu turaly kelısımge qol jetkızdı.
