Jaqynda elordanyŋ respublikaǧa taralatyn «Astana aqşamy» gazetınde «Jarnama jaiynda janaiqai» degen maqala jaryq kördı. Maqalanyŋ maqsaty bıreudı mūqatu nemese tyrnaq astynan kır ızdeu emes. Redaksiia poştasyna kelıp tüsken jarnamalyq mätınge bailanysty qazırgı qoǧamda qalyptasyp otyrǧan qazaq tılınıŋ müşkıl, şalajansar jai-küiıne köpşılıktıŋ nazaryn audartu. Tılımızdı keleke, mazaq qylatyn mūndai mätınder qai jerde, qai qalada bolsa da ūlttyq namysymyzǧa, qazaqi bolmysymyzǧa tietın ülken syn ekenın aşyq aitu edı.
Bızge osy maqalaǧa orai Nūr-Sūltan qalasynyŋ Tılderdı damytu jäne arhiv ısı basqarmasy qazırgı ıstelıp jatqan jūmystary men qazaq tılınıŋ keŋınen qoldanysqa ie boluyna qolbailau bolyp, kedergı keltırıp otyrǧan jailardy aşyq aityp, jauap jazypty.
Tılderdı damytu jäne arhiv ısı basqarmasy öz ökılettıgı aiasynda bar mümkındıktı paidalanyp jūmys jürgızıp jatyr. Alaida 2018 jyly Käsıpkerlık kodeksten jergılıktı atqaruşy organdardyŋ baqylau, tekseru ökıletın alyp tastaǧaly biznes, şaǧyn jäne orta käsıp ökılderı Qazaqstan Respublikasyndaǧy memlekettık tıl zaŋynyŋ talaptaryn aiaqasty etetın boldy. Oǧan Nūr-Sūltan qalasynyŋ jäne elımızdıŋ özge de şaharlarynyŋ köşelerındegı tek orys tılınde jazylǧan tömendegı jazular men qateler aiǧaq.
Eger būlai kete beretın bolsa, endı bır-ekı jylda bas şahar köşelerındegı maŋdaişa jazulary men jarnama mätınderınıŋ tılı tügelımen orys tılıne auysyp ketuı äbden mümkın. Körnekı jarnama bylai tūrsyn, otyz jyldan berı meiramhana men ashana mäzırın de memlekettık tılge köşıre almadyq qoi. Tamaq ışetınderdıŋ denı – qazaqtar. Öitkenı jergılıktı äkımdıkter men Tıl basqarmalarynan käsıpkerlerdıŋ Tıl turaly zaŋ talaptarynyŋ oryndaluyn baqylau qūzyretı alynyp tastalǧan.
Mūndai memlekettık tıldıŋ kegejesın keiın tartatyn jönsız qadamǧa Qazaqstan Respublikasynyŋ Ükımetı men Parlamentı qalai jol berıp qoiǧan degen oi mazalaidy. Memlekettık tıldıŋ jaiyn aityp kün saiyn tebınıp otyratyn deputattar mūny bılmei me?
Memlekettıktıŋ eŋ basty belgısı – tıl. Tılı damymaǧan, tılı örkendemegen ūlttyŋ bolaşaǧy būlyŋǧyr ekenı beseneden belgılı. Olai bolsa aldaǧy uaqytta Qazaqstan Respublikasyndaǧy Tıl, Jarnama, Käsıpkerlık turaly zaŋdarǧa qazaq tılınıŋ märtebesın köterıp, qoldanys aiasyn keŋeitetın özgerıster men tolyqtyrular engızu kerektıgı kezek küttırmeitın mäsele ekenın basa aitqymyz keledı.
