2019 jyldyŋ qorytyndylary boiynşa elordada 3-6 jasar balalardy balabaqşamen qamtu körsetkışı 98,4 paiyzdy qūraidy. Keiıngı üş jylda bas qalada mektepaldy tärbie mekemelerı edäuır artqan. Mäselen, 2017 jylmen salystyrǧanda 119 balabaqşaǧa köbeigen. Bıraq būl salada älı de özektı mäseleler bar. Nūr-Sūltan qalasy mäslihatynyŋ äleumettık-mädeni damu mäselelerı jönındegı tūraqty komissiiasynyŋ otyrysynda qalalyq Bılım basqarmasynyŋ basşysy Şolpan Qadyrova mektepaldy daiarlyq salasynyŋ qazırgı jaǧdaiyna jan-jaqty toqtaldy.
2016-2019 jyldarǧa arnalǧan bılım berudı damytudyŋ memlekettık baǧdarlamasyn ıske asyruǧa säikes, osy uaqytta bas qaladaǧy balalar 100 paiyz balabaqşamen qamtyluy tiıs edı. Osyny jasyrmaǧan basqarma basşysy mūnyŋ bırneşe obektivtı sebebın atap öttı. Onyŋ alǧaşqysy elorda halqynyŋ aitarlyqtai artuy bolsa, ekınşısı – bala tuu körsetkışınıŋ ösuı, al üşınşısı – ışkı migrasiianyŋ qarqyny. Onyŋ üstıne 2017-2019 jyldary jekemenşık balabaqşalarǧa memlekettık tapsyrys bolǧan joq.
Osyny aitqan Ş.Qadyrova deputattardyŋ nazaryn myna sandarǧa audardy. Onyŋ aituynşa, elordada 2018 jyly tuǧan 30452 bala biyl balabaqşaǧa baruy tiıs edı. Bıraq būl mümkın bolmai tūr. Osy jyly barlyq jastaǧy 15800 baldyrǧan ǧana mektepaldy daiarlyq mekemelerıne ornalastyrylady.
– Jekemenşık balabaqşalarǧa balalardy memlekettık tapsyryspen ornalastyru 2019 jyly ǧana bastaldy. Sonyŋ nätijesınde soŋǧy ekı jylda 735 million teŋge somasyna 5800 orynǧa memlekettık tapsyrys berıldı. Bızde ai saiyn ortaşa eseppen balabaqşa kezegıne 4 myŋ bala tūrǧyzylady. Solardyŋ jartysy ǧana, iaǧni 2 myŋnan säl asa baldyrǧan mektepaldy daiarlyq mekemelerıne joldama alady, – deidı Ş.Qadyrova.
«İndigo» atty elektrondy kezek portalynda 0-6 jasar 55989 bala, 1-6 jasar 50233 baldyrǧan jäne 3-6 jasar 5980 bala tırkelgen. Osy jyly tūrǧyn üilerdıŋ bırınşı qabattarynda mektepaldy daiarlyq mekemelerınıŋ 904 orynǧa arnalǧan üş filialyn aşu josparlanyp otyr. Sondai-aq, memlekettık-jekemenşık ärıptestık aiasynda 360 orynǧa arnalǧan balabaqşa qūrylysyn aiaqtau, 1 qyrküiekten bastap jekemenşık balabaqşalarǧa 2800 orynǧa memlekettık tapsyrys beru közdelude. Sonyŋ özınde problema tolyq şeşılmeidı. Balalardy balabaqşamen qamtu 99 paiyzǧa jetedı.
Qazırgı taŋda elordada barlyǧy 400-ge juyq balabaqşa bar. Onyŋ 94-ı memlekettık bolsa, 259-y – jekemenşık. Jekemenşık balabaqşalardyŋ 247-sıne memlekettık tapsyrys berıledı.
Basqarma basşysy mektepaldy daiarlyq mekemelerınde inkliuzivtı bılım beru mäselelerıne de toqtaldy. Bügınderı qalada №23 jäne №647 – ekı arnaiy balabaqşa bar. Būǧan qosa, 26 balabaqşada 570 tärbielenuşıge arnalǧan 45 densaulyqty tüzeu toby jūmys ısteidı. Osy jyldyŋ qazan aiynda közı naşar köretın balalarǧa arnalǧan 90 oryndyq balabaqşa aşylady. Jaŋa oqu jylynda №22, 23, 25 jäne 64 balabaqşalarda resurstyq ortalyqtardy aşu josparlanyp otyr. Būl ortalyqtarda erekşe qajettılıkterı bar balalardyŋ ata-analaryna ädıstemelık jäne konsultativtık kömek körsetıledı. Būǧan qosa, 28 mektepaldy daiarlyq mekemesınde osyndai balalarǧa arnalǧan arnaiy toptar aşylady.
2019 jyly balabaqşa tärbieşısınıŋ ortaşa jalaqysy 63235 teŋgenı qūraǧan. «Mūǧalım märtebesı turaly» zaŋyna säikes osy jyldyŋ 1 qaŋtarynan barlyq pedagogtardyŋ jalaqysy 25 paiyzǧa östı. 2023 jylǧa deiın ūstazdar ailyǧy jyl saiyn 25 paiyzǧa ösıp otyrady. Soǧan sai qazır tärbieşı 75324 teŋge alady. Al 2023 jylǧa qarai onyŋ jalaqysy 126 myŋ teŋgege jetedı.
– Biyl balabaqşa pedagogtary tūŋǧyş ret jaŋa formattaǧy attestattauǧa qatysady. Qazırgı kezde testıleu jürgızılıp jatyr. Ol oŋ nätijenı körsetken jaǧdaida pedagogtarǧa 30 paiyzdan 50 paiyzǧa deiın üstemeaqy tölenedı. Mektepke deiıngı ūiym ūstazdarynyŋ tapşylyǧy özektı küiınde qalyp otyr. Atalǧan mäselenı şeşu üşın Bılım basqarmasynyŋ saitynda «HP» portaly jūmysyn bastady. Qazır portalda 377 bos oryn ornalastyryldy. 2019-2020 jyldary mektepaldy bılım beru pedagogtarynyŋ 3313-ı bılıktılıktı joǧarylatu boiynşa qysqamerzımdık kurstardan öttı. Osy jyly elorda kolledjderıne 300 balabaqşa pedagogyn oqytuǧa memlekettık tapsyrys berıldı, «Astana» halyqaralyq universitetıne 50 grant bölındı, – deidı Ş.Qadyrova.
Alaida osy saladaǧy özektı mäselelerge qaramastan qalalyq Ekonomika jäne biudjettık josparlau basqarmasy Bılım basqarmasynyŋ biudjetınen balabaqşalarǧa arnalǧan 528 million teŋgenı qysqartqan. Mäslihat deputaty Ramziia Ömırbaeva osyǧan kelıspeitının, jalpy bılım salasynyŋ qarjysyn qysqartu arqyly ünemdeuge bolmaitynyn aitty. Ony ärıptesı Qaraqat Abden qoldady. Osy mäsele boiynşa Ekonomika jäne biudjettık josparlau basqarmasy basşysynyŋ orynbasary Aijan Tügelbaevanyŋ jauaby deputattardy sendırmedı. Aldaǧy künderı atalǧan qos basqarma basşylyǧy men deputattar jinalyp, būl mäselenı pysyqtaityn bolyp kelıstı.
