Memleket basşysy N.Nazarbaev «Qazaqstan – 2050» strategiiasy – qalyptasqan memlekettıŋ jaŋa saiasi baǧyty» atty halyqqa arnaǧan Joldauynda «Deneşynyqtyru men sport memlekettıŋ airyqşa nazarynda boluy tiıs. Naq sol salamatty ömır salty ūlt densaulyǧynyŋ kıltı bolyp sanalady» degen bolatyn.
Osy oraida tamyz aiynyŋ üşınşı jeksenbısınde elımızde Sport künın toilau dästürge ainalǧan. Salauatty ömır saltyn qalyptastyru men būqaralyq sportty damytudy közdegen būl şara Astana qalasynda da keŋınen atalyp ötpek. Būl künı qala tūrǧyndary üşın türlı şaralar ūiymdastyrylady.
Astana – äuelden sportqa qara jaiau bolmaǧan şahar. Aqmola järmeŋkesınde ūlttyq oiyndarymyzdyŋ basty türlerınen delebenı qozdyrar bäigeler men türlı saiystar ötkızılıp kelgen. Sol dästür bügınge deiın saqtalyp, Astana qazırgı zamanǧy Qazaq elınıŋ ülken sportyn damytuǧa sübelı üles qosyp keledı. Būl tūrǧyda Astana qalasynda qazırgı zamanǧy standartqa sai bırneşe sporttyq ǧimarattar boi kötergenın aita ketu kerek. Sonymen qatar, qalada türlı sporttyq aqyly seksiialar, sport federasiialary men klubtardy bırıktıretın jeke jäne kommersiialyq emes 383 sport ūiymy jūmys ısteidı. Onda 159 318 astanalyq jüielı türde deneşynyqtyrumen ainalysady. Būl qala halqynyŋ 20,6 paiyzyn qūraidy eken. Jyl ışınde sport ǧimarattarynyŋ sany 508-den 525-ke deiın östı. Qala tūrǧyndarynyŋ jyl saiyn arta tüsuıne bailanysty älı de sport nysandary salyna beredı. Sport keşenderınıŋ būqaraǧa qoljetımdıgın qamtamasyz etu maqsatynda mektep oquşylary men student jastarǧa 35-50 paiyz aralyǧynda jeŋıldıkter bar. Onyŋ bır mysaly, jattyǧu ortalyqtarynyŋ keibır baǧdarlamalarynyŋ qūny 30 myŋnan 15 myŋǧa deiın tömendetıldı. Iаǧni, elordadaǧy keşender qarapaiym halyqqa esıkterın aiqara aşyp, qyzmet körsetu baǧalaryn arzandatty. Sonyŋ bırı – «Saryarqa» respublikalyq velotregı. Delebenı qozdyratyn dodalarǧa arnalǧan būl bıregei sport keşenı qala tūrǧyndarynyŋ igılıgıne jarap jatyr. Bır mezgılde 100-ge juyq adamdy qabyldaityn fitnes ortalyǧy, boidy jazatyn basseinı bar. Sondai-aq, jıgıtterdı boksqa baulityn, qyzdardy körkem gimnastikaǧa üiretetın käsıbi mamandar qyzmet atqarady. Şaǧyn futbol men basketbolǧa üiır jandarǧa da jaǧdai jasalǧan. Būl da jastarǧa küş-jıger berıp, joǧary jetıstıkterge jeteleitını haq. Jalpy, sporttaǧy jetıstıktıŋ köp boluy qarapaiym ǧana būqaralyq sporttan bastau alatyny belgılı. Būl jaǧynan bas qala tūrǧyndarynyŋ mümkındıgı mol.
Erkejan Sätımbek
e.satimbek@astana-akshamy.kz
