Astanada qazırgı bessaiystan Aziia chempionaty ötıp jatyr. Ötken senbıde «Saryarqa» velotregınde saltanatty türde aşylǧan qūrlyq bäsekesıne Avstraliia, Qytai, Ündıstan, Japoniia, Oŋtüstık Koreia, Qyrǧyzstan, Özbekstan, Taivan jäne Qazaqstan sportşylary synǧa tüsude. Jarystyŋ saltanatty aşylu räsımınde Halyqaralyq bessaiys federasiiasynyŋ prezidentı Klaus Şorman, Aziia konfederasiiasynyŋ basşysy Li Djei-Ion, Qazaqstan bessaiys federasiiasynyŋ prezidentı, Ädılet ministrı Berık İmaşev, QR sport jäne dene şynyqtyru ısterı agenttıgınıŋ töraǧasy Erlan Qojaǧapanov sportşylarǧa arnap qūttyqtau söz söilep, tabys tıledı.
Semserlesu, jüzu, atu, jügıru jäne konkurs jarystary boiynşa qūrlyq chempiony ataǧy eresekter men jastar arasynda ötkızılude. Sondai-aq, bırınşılık aiasynda Aziia men Okeaniia ökılderı arasynda jasöspırımder olimpiada oiyndaryna ırıkteu turnirı de ūiymdastyryluda.
Jarystyŋ alǧaşqy künı jasöspırımder synǧa tüstı. Aziia chempiony ataǧymen qatar jasöspırımder olimpiadasyna joldama beretın jarys qorytyndysynda jasöspırım ūldar arasynda bırınşı orynǧa ie bolǧan qytailyq Şuan Li men kümıs jüldeger atanǧan oŋtüstık koreialyq Djilung Park jeŋımpaz bolyp tanyldy. Al, qyzdar arasyndaǧy saiysta bırınşı jäne ekınşı oryndy ielengen qytailyqtar Danni Vei men Lişan Djeng jasöspırımder olimpiadasyna qatysatyn boldy.
Al, eresekter bäsekesınde aldymen estafeta jarysy öttı. Būl synda Oŋtüstık Koreia qūramasy jeŋımpaz atansa, Qytai jıgıtterı ekınşı orynnan körındı. Qūramynda P.İliaşenko, R.Sabirhuzin jäne A.Soldatov syndy sportşylary bar Qazaqstan qūramasy qola jüldeger atandy. Al äielder bäsekesınde Qytai qūramasy bırınşı, Japoniia qūramasy ekınşı. Oŋtüstık Koreia qūramasy üşınşı orynǧa ie boldy. Qazaqstan atynan synǧa tüsken qyzdarymyz tek törtınşı orynǧa taban tıredı.
Aziia chempionatynyŋ baǧdarlamasyna säikes bügın erler jäne äielder arasynda semserlesu jäne jüzu jarystary ötedı. Erteŋ «Qazanat» ippodromynda at sporty boiynşa jarystardyŋ jeŋımpazdary anyqtalady.
Ǧalym QOJABEKOV
