Keşe Ükımet pen Parlament basşylary «Otan qorǧauşylar» monumentıne gül şoqtaryn qoiyp, Ūly Otan soǧysynda erlıkpen qaza tapqan maidangerler ruhyna taǧzym ettı.
Ūly Jeŋıs künıne arnalǧan saltanatty şaraǧa QR Parlamentı Senatynyŋ töraǧasy Qasym-Jomart Toqaev pen QR Parlamentı Mäjılısınıŋ töraǧasy Nūrlan Nyǧmatulin, QR Prezidentı Äkımşılıgınıŋ basşysy Ädılbek Jaqsybekov, QR Premer-ministrı Baqytjan Saǧyntaev qatysty. Gül qoiu räsımınen soŋ soǧysta qaza bolǧandar bır minut ünsızdıkpen eske alynyp, elımızdıŋ Änūrany oryndaldy.
Qasym-Jomart Toqaev Ekınşı düniejüzılık soǧysqa qatysqan belgılı jazuşy Kemel Toqaevtyŋ ūly ekenın bılemız. Sol jerde Senat spikerı äkesınıŋ joryq joldaryn eske aldy.
«Äkem 1942 jyly äsker qataryna şaqyryldy. Ol ekınşı Belarus maidany qūramynda soǧysyp, Polşaǧa deiın jettı. 1944 jyly oq tiıp, jaralandy. Rjev tübındegı şaiqasta qaza tapqan Qasym Boltaev degen aǧam Tver oblysynyŋ Trubino degen auylynda jerlendı. Menıŋ atym sol kısınıŋ qūrmetıne qoiyldy» dedı Qasym-Jomart Toqaev.
Premer-ministr men Mäjılıs töraǧasy da – maidangerlerdıŋ ūrpaqtary. Äbdır Saǧyntaev 1941 jyly äsker qataryna alynyp, Mogilev maŋaiynda äskeri daiyndyqtan öttı. Ūly Otan soǧysynda auyr jaralanyp, 1943 jyly elge oraldy. Al Zairolla Nyǧmatulin öz erkımen maidanǧa attandy. Karel-findık, Leningrad pen Baltyq maŋyndaǧy maidandarda şaiqasyp, köptegen marapattarǧa ie boldy. Atqyştar polkınıŋ qūramynda barlauşy bolyp, Polşaǧa deiın jettı. 1944 jyldyŋ aiaǧyndaǧy sūrapyl şaiqastyŋ bırınde auyr jaralanyp, 4 jyl äskeri auruhanada emdeldı. Elge 1948 jyly ǧana oraldy.
Osyndai maidangerlerdıŋ ūrpaqtary eskertkış janyna jinalǧan Ūly Otan soǧysy ardagerlerımen bırauyz tıl qatysyp, olardyŋ jaǧdaiyn bılıp, merekemen qūttyqtady.
