750 MLN ADAM SAUATSYZ
IýNESKO mälımetı köpşılıktı taŋdai qaqtyryp otyr.
Atalǧan ūiymnyŋ mälımetı boiynşa dünie jüzınde sauatsyzdyq deŋgeiı tolastar emes. Qazırgı uaqytta älemde 750 mln adam oqyp ta, jaza da almaidy eken. Al onyŋ basym bölıgı äiel adamdar körınedı.
Sauatyn aşpaǧandardyŋ 45 paiyzy – Oŋtüstık Aziia, 27 paiyzy – Qara Afrika (Sahara şölınıŋ oŋtüstık aimaǧy), 10 paiyzy – Şyǧys jäne Oŋtüstık-Şyǧys Aziia, 9 paiyzy – Soltüstık Afrika jäne Batys Aziia, 4 paiyzy Latyn Amerikasy men Karib basseinı elderınde ömır süredı.
SMARTFONǦA ŞEKTEU QOIDY
Moŋǧoliianyŋ Ministrler kabinetı jalpy bılım beru mektepterı men basqa da oqu oryndary aumaǧynda smartfondar qoldanuǧa şekteu qoiu turaly şeşım qabyldady. Ükımettıŋ būl qaulysy osy jyldyŋ 1 qazanynan bastap küşıne enedı.
Bügınde Moŋǧoliiada 8-17 jas aralyǧyndaǧy balalardyŋ 71,8 paiyzy ūialy telefondy belsendı qoldanady. Onyŋ 54,6 paiyzynda internet qosylǧan. Ǧalymdar men därıgerler 12 jasqa tolmaǧan balalarǧa smartfon beruge bolmaitynyn eskertedı. Sebebı joǧary däldıktegı elektromagnittık säuleler balalardyŋ densaulyǧyna ziian keltıredı.
DJEK MA ALIBABA BASŞYLYǦYNAN KETEDI
Qytaidaǧy eŋ ırı elektrondy sauda korporasiiasy – Alibaba-nyŋ negızın qalaǧan äigılı milliarder Djek Ma kelesı jyly qyzmetınen ketetının mälımdedı.
Būl aqparat Alibaba Group taratqan baiandama arqyly belgılı boldy. Djek Manyŋ aituynşa, būl şeşımdı soŋǧy 10 jyl boiy oilanyp kelgen eken. Endı ary qarai özı süiıp ısteitın bılım salasynda qyzmet etudı jön körıp otyr.
– Bügın Alibaba-nyŋ qūrylǧanyna 19 jyl tolyp otyr. Endı keler jyldyŋ däl osy künı, iaǧni 2019 jyldyŋ 10 qyrküiegınde Alibaba Group korporasiiasy basqarma keŋesınıŋ töraǧasy qyzmetınen ketetınımdı aitqym keledı, – delıngen kompaniianyŋ äleumettık jelıdegı resmi Weibo paraqşasynda taraǧan Djek Manyŋ habarlamasynda.
Aian ÄBDUÄLİ
