Türkiia AQŞ äreketın aiyptady
Ankara Vaşingtonnyŋ ärdaiym ädıldık jaǧynda emes, äldınıŋ jaǧynda jüretının synǧa aldy.
Türkiia prezidentınıŋ kömekşısı İbragim Kalyn mūny AQŞ BŪŪ Qauıpsızdık keŋesınıŋ İzrail men Gaza sektory jönındegı qararyna veto qoiǧannan keiın mälımdedı.
«Qūrama Ştattar basşylyǧynyŋ būl qadamy kütpegen närse bolǧan joq. Būl AQŞ-tyŋ ädıldık jaǧynda emes, äldınıŋ jaǧynda ekenın taǧy da tanytyp berıp otyr. Bıraq Palestina halqy jalǧyz emes. Bızdıŋ olardyŋ ädıldık jolyndaǧy küresıne qoldau körsetuımız jalǧasa beredı» dedı Kalyn.
Aita keteiık, AQŞ mūnyŋ aldynda BŪŪ Qauıpsızdık keŋesınıŋ Gaza sektory men İzrail basyp alǧan territoriiadaǧy palestinalyqtardyŋ halyqaralyq qorǧauǧa engızu jönındegı qararyn da ötkızbei tastaǧan edı.
Meidıŋ köŋılı qala bastapty
Ūlybritaniianyŋ premer-ministrı Tereza Mei AQŞ-tyŋ Euroodaq elderıne baj salyǧyn salyp jatqanyna renjıp qaldy.
Mausymnyŋ 1-ı künı Albion jerınıŋ basşysy London men Briusseldıŋ soqqy astynda qalǧan önerkäsıp sektoryn qorǧau jolynda bırlese küres jürgızetının mälımdedı.
«AQŞ, Euroodaq jäne Ūlybritaniia jaqyn odaqtastar bolyp tabylady, olar bükıl älemde saudanyŋ aşyqtyǧy men tazalyǧy jolyndaǧy qūndylyqtar üşın küresıp keldı, – dep sairady ol. – Ūlybritaniia üşın qorǧanys qūimasy men qalaiy önerkäsıbı qaşannan asa maŋyzdy sala, būl metaldar Amerika önerkäsıbı, sonyŋ ışınde onyŋ qorǧanys nysandary üşın de asa qajet».
Mūnyŋ aldynda Euroodaq Amerika tauarlaryna qatysty şekteuler engızetının jariialaǧan bolatyn. Ol būǧan Qūrama Ştattar 1 mausymnan bastap EO elderınen keletın bolat pen qalaiyǧa özınıŋ baj salyǧyn salatynyn mälımdegennen keiın öz käsıpkerlerın qorǧau üşın baruǧa mäjbür boldy.
Duterte «Şaitanǧa» jūmsady
Filippin prezidentı Rodrigo Duterte BŪŪ-nyŋ arnaiy baiandamaşysy Diego Garsiia-Saianuǧa «şaitanǧa» baruǧa keŋes berdı.
Duterte mūny sarapşynyŋ Filippindegı sot jüiesıne qatysty bıldırgen pıkırıne aşulanu üstınde aityp saldy.
Būdan būryn memleket basşysy eldıŋ bas sudiasy Mariia Lurdestı özınıŋ bırqatar ūsynystaryn jüzege asyrudan bas tartqany üşın «jau» dep jariialap, otstavkaǧa jıbergen bolatyn. Arnaiy baiandamaşy bolsa, sottar men advokattardyŋ täuelsızdıgı turaly aita kelıp, mūny sottyŋ täuelsızdıgıne töngen qauıp dep baǧalaǧan.
«Aityŋdarşy anaǧan, menıŋ elımnıŋ ışkı ısıne aralaspasyn. Ketsın ärı şaitanǧa» dedı Duterte onyŋ sözıne qarai. Prezident būǧan özınıŋ BŪŪ baiandamaşysy märtebesın moiyndamaitynyn qosty.
Jalpy, Filippin basşysy būǧan deiın de özınıŋ ärtürlı öreskel äreketterımen közge tüsıp jürgen bolatyn. Aitalyq, ol būdan bırneşe jyl būryn AQŞ-tyŋ prezidentı Barak Obamany «qanşyqtyŋ balasy», BŪŪ-nyŋ bas hatşysy Pan Gi Mundy «aqymaq» dep tıldegen edı. Qūrama Ştattardyŋ qazırgı prezidentı Donald Tramp ta odan «aqymaq» degen sögıs estıp qaldy.
