Eldı eleŋ etkızgen
Fransiiadaǧy qandy şabuyl
Fransiiada qandy şabuyl boldy. Strasburg qalasynda belgısız bıreudıŋ äreketınen üş adam qaza bolyp, 13 tūrǧyn jaraqat aldy.
BBC basylymy boiynşa, oqiǧa Kleber alaŋyndaǧy merekelık järmeŋkede bolǧan. Belgısız bıreu jazyqsyz jūrtqa oq jaudyryp, artynşa tärtıp saqşylarymen atysqan. Oq atuşy oqiǧa ornynan ızın suytyp ülgerıptı. Qazır ony ızdeuge jüzdegen polisei jūmyldyryldy. Küdıktınıŋ osyǧan deiın de ıstı bolǧany belgılı boldy.
Strasburg – Fransiianyŋ şyǧysyndaǧy Europarlament, Europa Keŋesı, sondai-aq Europa Odaǧynyŋ mekemelerı men organdary ornalasqan qala. Däl osy künderı mūnda Europarlamenttıŋ kezekten tys sessiiasy ötıp jatqan edı.
Fransiia bilıgı 12 jeltoqsandy aza tūtu künı etıp jariialady.
Belgiia ükımetınde daǧdarys
BŪŪ-nyŋ köşı-qon boiynşa halyqaralyq kelısımın qūptai almaǧan Belgiianyŋ bırneşe ministrı otstavkaǧa kettı. Būl turaly The Associated Press jazady.
Būl qūjatta zaŋsyz migrasiia sany qysqaryp, bosqyndardyŋ barǧan elınde integrasiialanuyna, sondai-aq tuǧan elıne qaita oraluyna kömek beruı körsetılgen. Ony Belgiianyŋ ükımet basşysy Şarl Mişel qoldaitynyn mälım etken. Alaida mūndai şeşım eldegı bırqatar ministrdıŋ narazylyǧyn tudyrǧan.
Al qyzmetten ışkı ıster ministrı Iаn Iаmbon, qorǧanys ministrı Sander Lones, qarjy ministrı Iohan Van Overtveldti, sondai-aq memlekettık köşı-qon hatşysy Teo Franken kettı.
Iemende kömekke mūqtajdar köbeidı
Iemendegı gumanitarlyq jaǧdai jyldan- jylǧa naşarlap barady. Qazır halyqtyŋ 70 paiyzy, iaǧni 20 mln adam kömekke mūqtaj.
BŪŪ-nyŋ gumanitarlyq mäselelerımen ainalysatyn Mark Loukoktyŋ mälımetı boiynşa, būl ötken jylǧy körsetkışten ekı ese köp. Ol öz sözınde būl körsetkış eldıŋ 330 audanyn qamtyǧanyn mälım ettı. Qazırgı uaqytta Iemenge 152 memleket kömek körsetıp otyrǧan körınedı.
RİA «Novosti» basylymy keler jyly iemendıkterge kömek üşın 4 mlrd dollar qajet ekenın habarlady.